ទេសចរណ៍
រមណីយដ្ឋានកាំពីកន្លែងរីករាយនិងការងូតទឹកកំសាន្តលេង
ខេត្តក្រចេះ ៖ ទោះបីជាកំណាត់ផ្លូវក្រាលកៅស៊ូមួយខ្សែ ឆ្ពោះទៅរមណីយដ្ឋានអន្លង់ផ្សោត រមណីយដ្ឋានកាំពី និងវត្តសសរមួួយរយ មានលក្ខណៈតូចចង្អៀតក្តី ក៏ប្រជាពលរដ្ឋ ភ្ញៀវទេសចរជាតិ និងអន្តរជាតិ នៅតែព្យាយាមធ្វើដំណើរទៅទស្សនាកំសាន្ត តាមមធ្យោបាយ រៀងៗខ្លួនដែរ ព្រោះថាជាផ្លូវសំខាន់ហើយតែងមានសភាពកុះករក្នុងពេលមានបុណ្យទាន ម្តងៗ។ នាឱកាសបុណ្យចូលឆ្នាំចិនកន្លងទៅ ចាប់ពីថ្ងៃទី២ រហូតដល់ថ្ងៃទី៤ ខែកម្ភៈ គេឃើញភ្ញៀវទេសចរជាតិនិងអន្តរជាតិធ្វើដំណើរទាំង៣ថ្ងៃជាប់ៗគ្នា លើកំណាត់ផ្លូវក្រាលកៅស៊ូនេះឆ្ពោះទៅកាន់រមណីយដ្ឋានអន្លង់ផ្សោត រមណីយដ្ឋានកាំពី និងវត្តសសរ១០០ ថ្វីដ្បិតសភាពផ្លូវមានលក្ខណៈតូចចង្អៀតនិងជិះប្រជ្រៀតគ្នា យ៉ាងណាក៏ដោយ ។
នៅរមណីយដ្ឋានកាំពី តាំងពីព្រឹកដល់ព្រលប់ក្នុងរយៈពេល៣ថ្ងៃនេះ មានភ្ញៀវទេសចរជាតិ និងអន្តរជាតិ មកងូតទឹកលេង និងហូបចំណីអាហារយ៉ាងច្រើនកុះករ ខ្លះជាលក្ខណៈគ្រួសារ ខ្លះជាលក្ខណៈមិត្តភក្តិ ព្រមទាំងហោ៊កញ្ជ្រៀវយ៉ាងសប្បាយអឺងកងទាំងនៅក្នុងទឹកហូរ និងនៅតាមបណ្តារោងស្បូវដែលអាជីវករបានសង់ជាជួរ នៅតាមមាត់ទន្លេ ។ ប៉ុន្តែយ៉ាងណាក៏ដោយ ភ្ញៀវជាតិនិងអន្តរជាតិដែលមកលេងនៅរមណីយដ្ឋានមួយចំនួនក្នុង ខេត្ត ក្នុងរយៈពេល៣ថ្ងៃជាប់ៗគ្នានារដូវបុណ្យចូលឆ្នាំប្រពៃណីចិននា ឆ្នាំ២០១១នេះ គឺមានអត្រាថយចុះជាងឆ្នាំ២០១០ បន្តិច ឯគ្រោះថ្នាក់ចរាចរណ៍ក៏ថយចុះជាងឆ្នាំ២០១០ដែរ ។ នេះបើតាមការឱ្យដឹងពីមន្ត្រីអាជ្ញាធរខេត្ត ។
កញ្ញាសៅ រចនា អាយុ១៩ឆ្នាំ ជាអ្នកលក់ម្ហូបអាហារនៅរមណីយដ្ឋានកាំពី បានរៀបរាប់ថា នៅក្នុងឱកាសចូលឆ្នាំប្រពៃណីចិនរយៈពេល៣ថ្ងៃនេះ ចំនួនភ្ញៀវទេសចរដែលមកលេងនៅរមណីយដ្ឋានកាំពី មានតិចជាងឆ្នាំ២០១០ ហើយរបស់របរជាច្រើនមិនបានលក់ដាច់ដូចកាលពីឆ្នាំទៅ ទេ ។ ម្យ៉ាងទៀតភ្ញៀវទេសចរដែលមកងូតទឹកលេងនៅរមណីយដ្ឋានកាំពី រយៈពេល៣ថ្ងៃបន្តបន្ទាប់គ្នានេះ ពួកគាត់សុទ្ធតែមានចំណីអាហារវេចខ្ចប់មកហើយស្រេចគឺមិនសូវយក ចិត្តទុកដាក់ទិញចំណីអាហារនៅរមណីយដ្ឋាននេះទេ ។
មានភ្ញៀវទេសចរមួយចំនួនបានរអ៊ូរទាំថា ការមកងូតទឹកលេង និងទទួលទានអាហារនៅរមណីយដ្ឋានកាំពីនេះ គឺម្ហូបមានតម្លៃថ្លៃ ហើយរោងអង្គុយក៏ថ្លៃដែរគឺ១ម៉ឺនរៀលក្នុងមួយម៉ោង។ ជាពិសេស ពួកគាត់បានរិះគន់ទៅលើបញ្ហាអនាម័យព្រោះមានសំរាមនៅចាក់ចោល ពាសវាលពាសកាលហើយការធ្វើម្ហូបរបស់អាជីវករក៏យកកាកសំណល់ ទំលាក់ចូលទឹកទន្លេ ។ ឆ្លើយតបចំពោះការរអ៊ូរទាំនេះ នារីអ្នកលក់ម្ហូបអាហារនៅក្នុងរមណីយដ្ឋាននិយាយថា ចំពោះមុខម្ហូបគឺខុសត្រូវតម្លៃគ្នាបន្តិចបន្តួចប៉ុណ្ណោះ ពីថ្ងៃបុណ្យទាន និងថ្ងៃធម្មតា ចំណែករោងអង្គុយទើបមានតម្លៃកើនឡើង១០០%ពីថ្ងៃបុណ្យទាននិងថ្ងៃ ធម្មតា ។
លោកអនុសេនីយ៍ទោ អ៊ុន ហយ នាយប៉ុស្តិ៍រដ្ឋបាលសំបុកបានឱ្យដឹងថា តាមការសង្កេតមើលទៅលើទិដ្ឋភាពភ្ញៀវទេសចរដែលមកកំសាន្តនៅ រមណីយដ្ឋានរយៈពេល៣ថ្ងៃក្នុងឱកាសបុណ្យចូលឆ្នាំថ្មីប្រពៃណីចិននេះ គឺមានអត្រាថយចុះជាងឆ្នាំមុនបន្តិច ។ ដោយឡែកចំពោះបញ្ហាសន្តិសុខសណ្តាប់ធ្នាប់ លោកនាយប៉ុស្តិ៍រដ្ឋបាលបានបញ្ជាក់ថា ដោយអនុវត្តទៅតាមបទបញ្ជារបស់លោកឧត្តមសេនីយ៍ស្នងការនគរបាល ខេត្ត កំលាំងប៉ុស្តិ៍រដ្ឋបាលដើរល្បាត ជាប្រចាំនៅតាមរមណីយដ្ឋាន ដើម្បីរក្សាសន្តិសុខសណ្តាប់ធ្នាប់មិនមានអ្វីកើតឡើងនោះទេ ។ លោកវរសេនីយ៍ត្រីគង់ វណ្ណារឹទ្ធ នាយរងការិយាល័យកណ្តាលសណ្តាប់ធ្នាប់នៃស្នងការដ្ឋានខេត្តឱ្យ ដឹងថា គ្រោះថ្នាក់ចរាចរណ៍រយៈពេល៣ថ្ងៃនាឱកាសបុណ្យចូលឆ្នាំចិន ក្នុងឆ្នាំ២០១១នេះគឺកើតឡើងចំនួន៤ករណី បង្កឱ្យខូចខាតម៉ូតូស្រាល ហើយជនរងគ្រោះក៏រងរបួសស្រាលដែរ គឺមានអត្រាថយចុះជាងឆ្នាំ២០១០ ដែលបានកើតឡើងចំនួន៦ករណី ៕
http://kohsantepheapdaily.com.kh/art...06-030854.html
Tags: