អាជីវករ ១៥០ នាក់នៅអង្គរវត្តយល់ព្រមផ្លាស់ប្តូរទីតាំងលក់ដូរដើម្បីលើកស្ទួយសោភ័ណភាពតំបន់ទេសចរណ៍
អាជ្ញាធរជាតិអប្សរាបានប្រកាសថា មានតូបសរុបចំនួន ១៥០ តូបស្ថិតនៅខាងលិចប្រាសាទអង្គរវត្ត និងស្រះត្រពាំងសេសក្នុងខេត្តសៀមរាបបានស្ម័គ្រចិត្តផ្លាស់ប្តូរទីតាំងដើម្បីថែរក្សាសោភ័ណភាពប្រាសាទអង្គរ។
ការសម្រេចនេះត្រូវបានធ្វើឡើងបន្ទាប់ពីផែនការដែលបានប្រកាសកាលពីខែមករាដើម្បីកែលម្អប្រាសាទ ក្នុងគោលបំណងលើកកម្ពស់តម្លៃរបស់ប្រសាទដែលជានិមិត្តរូបនៃមរតកដូនតាខ្មែរ។
ចាប់តាំងពីការប្រកាសនេះអាជ្ញាធរជាតិអប្សរាបាននិយាយថា ម្ចាស់ភោជនីយដ្ឋាន និងតូបដែលសាងសង់ក្នុងបរិវេណប្រាសាទអង្គរវត្តបានចាកចេញពីទីតាំងនោះ ហើយប្រគល់ដីឡូតិ៍របស់ទាំងនោះទៅឱ្យអាជ្ញាធរ។
អ្នកនាំពាក្យអាជ្ញាធរជាតិអប្សរា លោក ឡុង កុសល បាននិយាយនៅថ្ងៃនេះថា រហូតមកដល់ពេលនេះយុទ្ធនាការរុះរើភោជនីយដ្ឋានប្រមាណ ១៥០ ក៏ដូចជាតូបលក់អាហារ និងតូបលក់វត្ថុអនុស្សាវរីយ៍ត្រូវបានបញ្ចប់ដោយមានការយល់ព្រមពីម្ចាស់ក្រុមហ៊ុន។
លោកបាននិយាយបន្តថា មានការអភិវឌ្ឍហេដ្ឋារចនាសម្ព័ន្ធថ្មី និងសួនច្បារកំពុងសាងសង់នៅទីធ្លាខាងលិចនៃប្រាសាទអង្គរវត្តដែលរចនាឡើងដើម្បីបង្ហាញពីសម្រស់ធម្មជាតិនៃតំបន់នោះដល់ភ្ញៀវទេសចរ។
លោកបាននិយាយថា៖ «ចាប់ពីថ្ងៃនេះតទៅបរិវេណខាងលិចនៃប្រាសាទអង្គរវត្តទាំងមូលនឹងត្រូវបានផ្លាស់ប្តូរទៅជាទេសភាពស្រស់ស្អាតជាងមុនជាមួយនឹងដើមឈើបៃតង សួនច្បារ និងផ្កាចម្រុះពណ៌» ។
លោកបាននិយាយបន្ថែមទៀតថា បច្ចុប្បន្ននេះក្រុមការងារអាជ្ញាធរអប្សរាកំពុងមមាញឹករៀបចំសួនច្បារបន្ថែមទៀតដោយដាំស្មៅ រៀបចំផ្លូវ និងថែរក្សារុក្ខជាតិដែលបានដាំរួចហើយ។
លោកបាននិយាយបន្តថា ក្រុមការងារក៏បានរៀបចំប្រព័ន្ធលូបង្ហូរទឹកផងដែរ ហើយបានរៀបចំតុបតែងទេសភាពនៅប៉ែកខាងលិចនៃប្រាសាទអង្គរវត្តដើម្បីឱ្យមើលទៅមានសណ្តាប់ធ្នាប់ និងស្រស់ស្អាតជាងមុនសម្រាប់ភ្ញៀវទេសចរដែលមកលំហែកាយនៅតំបន់នោះ៕
ប្រភពខ្មែរថាមស៍