<p><span style="color: #000000;"><strong>(ភ្នំពេញ)៖</strong> ផ្កាកូលាប ជាផ្កាដែលយុវវ័យ ឬសាធារណជន និយមប្រើក្នុងឱកាសពិធីផ្សេងៗ រួមមាន ពិធីអាពាហ៍ពិពាហ៍ ខួបកំណើត ខួបអាពាហ៍ពិពាហ៍ ឬក៏ជាកាដូជូនទៅ ដល់មនុស្សជាទីស្រលាញ់ ហើយសម្រាប់ឱកាសបុណ្យ នៃក្ដីស្រលាញ់ ដែលនឹងចូលមកដល់នៅថ្ងៃទី១៤ ខែកុម្ភៈស្អែកនេះ គេសង្កេតឃើញថា ការនាំចូលផ្កាកូលាប ពីក្រៅប្រទេស មានការកើតឡើងយ៉ាងគំហុក ជាពិសេសការនាំចូលពីប្រទេសវៀតណាម ដើម្បីបំពេញតម្រូវការរបស់អតិថិជន។</span></p>
<p><span style="color: #000000;">ការនាំចូលផ្កាកូលាប ពីក្រៅប្រទេសច្រើន ដោយសារតែប្រជាកសិករ ក្នុងប្រទេសកម្ពុជាប្រកបរបរនេះ មិនទទួលបានផលល្អនៅឡើយ ព្រោះតែការដាំនៅខ្វះបច្ចេកទេស និងអាកាសធាតុ ក្នុងប្រទេសកម្ពុជាមិនសូវអំណោយផល ហេតុដូច្នេះប្រជាកសិករភាគច្រើន ងាកមកជ្រើសរើសការដាំផ្កាអ័រគីដេ និងផ្ការាសីជំនួសផ្កាកូលាបវិញ ព្រោះវាងាយស្រួលដាំដុះ និងមានតម្លៃសមរម្យ។ ប៉ុន្ដែតម្រូវការផ្កាកូលាបនៅកម្ពុជា មានការកើនឡើងច្រើន ដូច្នេះទើបបណ្ដាលឲ្យការនាំចូលផ្កានេះ ពីប្រទេសជិតខាង មានការកើនឡើងយ៉ាងច្រើនសន្ធឹកសន្ធាប់។</span></p>
<p><span style="color: #000000;">លោក ជិន ឌីណា ម្ចាស់ហាងផ្កាយីហោ «មង្គលពិធី» បានថ្លែងប្រាប់អង្គភាពព័ត៌មាន Fresh Newsថា <strong>«ផ្កាកូលាប ដែលមានលក់ក្នុងហាងរបស់ខ្ញុំ ភាគច្រើននាំចូលពីបណ្ដាប្រទេសជិតខាង រួមមានប្រទេសវៀតណាម និងប្រទេសថៃ និងខ្លះនាំយកមកពីចិនផងដែរ»</strong>។</span></p>
<p><span style="color: #000000;">លោកបន្ថែមថា ផ្កាកូលាបនៅកម្ពុជាមិនសូវសម្បូរ និងមិនអាចផ្គត់ផ្គង់គ្រប់គ្រាន់នោះឡើយ ព្រោះកសិករដែលប្រកបរបរនេះ ដាំមិនសូវទទួលបានផលល្អ ផ្កាដែលដាំបានផលច្រើន គឺផ្កាអ័រគីដេ និងផ្ការាសីប៉ុណ្ណោះ។</span></p>
<p><span style="color: #000000;">លោក ឌីណា បន្ដថា ក្នុងឱកាសបុណ្យនៃក្ដីស្រលាញ់នេះ បញ្ជាទិញផ្កាកូលាបចំនួន៤៤០០ទង យកមកពី៣ប្រទេសខាងលើ ហើយប្រទេសដែលនាំយកមកច្រើនជាងគេ គឺប្រទេសវៀតណាម ដែលនាំយករហូតដល់៤ពាន់ទង ហើយកូលាបចិន និងថៃមានចំនួនតែ ៤០០ទង តែប៉ុណ្ណោះ។</span></p>
<p><span style="color: #000000;">លោកថា <strong>«កូលាបវៀតណាម នាំយកមកក្នុងតម្លៃ ១២០០រៀលក្នុងមួយទង កូលាបចិនតម្លៃ១ដុល្លារ និងកូលាបថៃ តម្លៃប្រហាក់ប្រហែលកូលាបចិនដែរ សម្រាប់តម្លៃលក់ចេញវិញក៏ខុសគ្នាដែរ ដោយកូលាបចិន និងថៃតម្លៃ ២ដុល្លារក្នុងមួយទង ចំណែកកូលាបវៀតណាមវិញ តម្លៃត្រឹមតែ១ដុល្លារប៉ុណ្ណោះ។ ខ្ញុំគិតថាសម្រាប់ជាង៤ពាន់ដើមនេះ គឺមិនអាចលក់អស់ទេ ក្នុងរយៈពេល១ថ្ងៃ អាចសល់តិចតួចប៉ុណ្ណោះ»</strong>។</span></p>
<p><span style="color: #000000;">ដោយឡែកសម្រាប់ អ្នកស្រី សួង សារ៉ា បុគ្គលិកហាងផ្កា Flora Express បានឲ្យដឹងថា ទិវាបុណ្យនៃក្ដីស្រលាញ់នឹងឈានចូលមកដល់នៅថ្ងៃស្អែក។ ផ្កាកូលាប គឺជាកាដូដ៏ល្អបំផុត នាឱកាសបុណ្យនៃក្ដីស្រលាញ់នេះ ដូច្នេះយើងបាននាំចូលផ្កាជាបណ្ដើរៗ ពីបណ្ដាប្រទេសជិតខាង ដើម្បីទុកលក់បន្ដឲ្យអតិថិជន។</span></p>
<p><span style="color: #000000;">អ្នកស្រីបន្ដថា <strong>«យើងបាននាំចូលផ្កាកូលាប ពីបណ្ដាប្រទេសចំនួនបីមានដូចជា ប្រទេសវៀតណាម ថៃ និងចិន ហើយផ្កាដែលយើងនាំចូលច្រើនជាងគេ គឺកូលាបវៀតណាម បន្ទាប់មកកូលាបថៃ និងចុងក្រោយកូលាបចិន។ បានជាមានការទទួល កូលាបពីប្រទេសវៀតណាម ច្រើនជាងប្រទេសផ្សេងៗ ព្រោះប្រទេសវៀតណាម សំបូរផ្កាកូលាប រីឯតម្លៃវិញធូរថ្លៃជាងប្រទេសថៃ និងប្រទេសចិន»</strong>។</span></p>
<p><span style="color: #000000;">អ្នកស្រីបន្ដថា <strong>«កូលាបក្នុងស្រុកក៏មានដែរ ប៉ុន្ដែយើងមិនបានទទួលលក់នោះទេ ព្រោះផ្កាមានគុណភាពមិនសូវល្អ ណាមួយមិនអាចផ្គត់ផ្គង់ អតិថិជនបានគ្រប់តម្រូវការ»</strong>។</span></p>
<p><span style="color: #000000;">អ្នកស្រីថា ក្នុងថ្ងៃ១៤កុម្ភៈខាងមុខនេះ ការទទួលផ្កាពីប្រទេសវៀតណាមមានជាង១ពាន់ទង ពីប្រទេសចិន និងប្រទេសថៃមានប្រមាណ ជាង១ពាន់ទងដូចគ្នា សម្រាប់តម្លៃលក់ចេញ គឺមួយទង២ដុល្លារ ក្នុងថ្ងៃបុណ្យនៃក្ដីស្រលាញ់នេះ នឹងមានការទទួលជាវច្រើន ពីសំណាក់អតិថិជនជាងថ្ងៃធម្មតា ចំណែកឯចំណូលវិញអាចលក់បានប្រមាណ</span><br /><span style="color: #000000;">ជាង២ពាន់ដុល្លារក្នុង១ថ្ងៃ៕</span></p>
<p><span style="color: #000000;"><img src="http://image.freshnewsasia.com/2017/113/fn-2017-02-13-11-16-36-1.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/113/fn-2017-02-13-11-16-36-2.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/113/fn-2017-02-13-11-16-36-3.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/113/fn-2017-02-13-11-16-36-4.jpg" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>