<p><span style="color: #000000;"><strong>(ក្រុងកៀវ)៖</strong> អតីតកីឡាករខ្សែប្រយុទ្ធពិភពលោក Andriy Shevchenko ត្រូវបានសហព័ន្ធកីឡាបាល់ទាត់ប្រទេសអ៊ុយក្រែន សម្រេចតែងតាំងជាគ្រូបង្វឹកបង្គោលដឹកនាំជម្រើសជាតិចាប់ពីថ្ងៃសៅរ៍ ទី១៦ ខែកក្កដា ឆ្នាំ២០១៦ នេះតទៅ បន្ទាប់ពីបុរសវ័យ៣៩ឆ្នាំរូបនេះ បានចូលនិវត្តន៍ពីកីឡាករអាជីពក្នុងឆ្នាំ២០១២មក ជំនួសកៅអីគ្រូបង្វឹក Mykhaylo Formenko ដែលត្រូវបានបញ្ចប់តួនាទី ក្រោយជ្រុះចេញពី Euro 2016 នៅបារាំងពីក្នុងពូល។</span></p>
<p><span style="color: #000000;">សារព័ត៌មាន BBC បានផ្សាយឲ្យដឹងថា អតីតកីឡាករខ្សែប្រយុទ្ធក្លឹបអាជីព AC Milan របស់អ៊ីតាលី និងក្លឹបតោខៀវ Chelsea របស់អង់គ្លេសខាងលើនេះ ពុំធ្លាប់មានបទពិសោធន៍ជាគ្រូបង្វឹកម្តងណាទេពីមុនមក ជាមួយនឹងការធ្លាប់ចូល លេងឲ្យក្រុមជម្រើសជាតិអ៊ុយក្រែនបាន ១១១ប្រកួត និងស៊ុតបញ្ចូលទីបាន ៤៨គ្រាប់ មុនការសម្រេចចូលនិវត្តន៍ជាផ្លូវការនៅក្រោយបញ្ចប់ព្រឹត្តិការណ៍ Euro 2012 ដែលអ៊ុយក្រែន និងប៉ូឡូញបានធ្វើម្ចាស់ផ្ទះរួម។</span></p>
<p><span style="color: #000000;">ក្នុងការឡើងតំណែងជាគ្រូបង្គោលនេះដែរ អតីតកីឡាករខ្សែការពារអ៊ីតាលី Mauro Tassotti ក៏ត្រូវបានតែងតាំងជាជំនួយការគ្រូបង្វឹក Shevchenko ដើម្បីដឹកនាំអ៊ុយក្រែន លេងក្នុងវគ្គជម្រុះនៃ World Cup 2018 នៅរុស្ស៊ីនាពេល ខាងមុខ ចាប់ផ្តើមពីខែកញ្ញា ឆ្នាំ២០១៦ តទៅហើយ៕</span></p>
<p><span style="color: #000000;"><img src="http://www.themalaymailonline.com/images/sized/ez/Andriy_Shevchenko2811_620_385_100.JPG" alt="" width="730" /></span></p>
<p><span style="color: #000000;"><img src="http://static.goal.com/35600/35659_heroa.jpg" alt="" width="730" /></span></p>
<p><span style="color: #000000;"><img src="http://www.thesecretfootballer.com/wp-content/uploads/2015/05/shev.jpg" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>