<p><span style="color: #000000;"><strong>(វ៉ាស៊ីនតោន)៖</strong> យន្តហោះយោធាអាមេរិកមួយគ្រឿងបានទម្លាក់គ្រាប់បែក សម្រាប់ប្រើក្នុងការហ្វឹកហ្វឺនចំនួន០៦គ្រាប់ និងមីស៊ីលចំនួនមួយគ្រាប់ផ្សេងទៀត អំឡុងពេលហោះហើរនៅលើតំបន់ Oscoda ក្នុងរដ្ឋ Michigan ភាគឦសានសហរដ្ឋអាមេរិក ប៉ុន្តែជាសំណាងល្អពុំមានមនុស្សបានទទួលរងរបួសឬបាត់បង់ជិវិតនោះឡើយហើយខណៈពេលនេះ មន្ត្រីយោធាកំពុងតែចោទប្រកាន់ហេតុការណ៍នេះថាបានបណ្តាលមកពីកំហុសបច្ចេកទេស។ នេះបើតាមការចេញផ្សាយដោយសារព័ត៌មានរុស្ស៊ី Sputnik នារសៀលថ្ងៃសៅរ៍ ទី០៥ ខែវិច្ឆិកា ឆ្នាំ២០១៦។</span></p>
<p><span style="color: #000000;">លោកវរសេនីយ៍ទោ Matthew Trumble មេបញ្ជាការក្នុងបន្ទាយហ្វឹកហ្វឺនយោធា Camp Grayling បានឲ្យដឹងថា ឧបទ្ទវហេតុនេះបានកើតឡើងអំឡុងពេលដែលយន្តហោះទម្លាក់គ្រាប់បែក A-10 Thunderbolt មួយគ្រឿងកំពុងធ្វើដំណើរចាកចេញពីទីបញ្ជាការការពារដែនអាកាសជាតិ Selfridge នៃទីក្រុង Detroit ដោយដឹកជញ្ជូនសព្វាវុធមួយចំនួនរួមមានមីស៊ីល និងគ្រាប់បែក ស្ថិតនៅចម្ងាយប្រមាណជាង ៣០០គីឡូម៉ែត្រភាគពាយ័ព្យពីបន្ទាយ Camp Grayling ហើយលោកវរសេនីយ៍ Trumble បានចាត់ទុកហេតុការណ៍នេះថា ជារឿងដែលកម្រនឹងកើតមានបំផុតមួយ ព្រោះថាលោកពុំធ្លាក់ជួបប្រទះនោះឡើយ ចាប់តាំងតែលោកបានចូលបម្រើជាតិអស់រយៈពេល២០ឆ្នាំមកនេះ។ </span></p>
<p><span style="color: #000000;">ជុំវិញរឿងនេះទីបញ្ជាការការពារជាតិនៃរដ្ឋ Michigan បានបញ្ជាក់ថាគ្រាប់បែកដែលប្រើសម្រាប់ការហ្វឹកហាត់ទាំង០៦គ្រាប់អាចបញ្ចេញផ្សែងបានដូច្នេះអាកាសយានិកអាចរកទីតាំង ដែលពួកវាបានធ្លាក់ឃើញ ហើយមីស៊ីលមួយគ្រាប់ផ្សេងទៀតនោះមិនមានជាតិផ្ទុះនោះឡើយ។ ក្រោយមកទៀតមានសេចក្តីរាយការណ៍ថា គ្រាប់បែកនិងមីស៊ីលទាំងនោះត្រូវបានគេរកឃើញនៅតំបន់ Luzerne ភាគខាងត្បូងរដ្ឋ Michigan ដែលជាតំបន់ព្រៃដាច់ស្រយ៉ាលនិងមិនបានបណ្តាលឲ្យមានអ្នករងរបួសឬបាត់បង់ជីវិតអ្វីឡើយ៕</span></p>
<p><a class="thickbox" title="" href="/FileManager/Commons/2016/11/5/10a-05-11-2016--15-18-29.png"><img src="/FileManager/Articles/mce/2016/11/5/10a-05-11-2016--15-18-29.png" alt="" /></a></p>
<p> </p>
<div class="span9" style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></div>
<div><span><br /></span></div>