<p><span style="color: #000000;"><strong>(ភ្នំពេញ)៖</strong> សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានប្រកាសជូនប្រជាពលរដ្ឋថា អ្នកដែលបានទិញយានយន្តតពីអ្នកដទៃរួចហើយ ពេលនេះមិនបាច់ទៅកាត់ឈ្មោះនោះទេ ហើយក៏មិនត្រូវបង់សេវាអ្វីទាំងអស់។</span></p>
<p><span style="color: #000000;">កាលពីម្សិលមិញ សម្តេចក្រឡាហោម ស ខេង ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ បានចេញសេចក្តីប្រកាសមួយ ដោយបញ្ជាក់ថា ការផ្ទេរកម្មសិទ្ធិយានយន្តទាំងរថយន្ត និង ម៉ូតូ មិនតម្រូវឲ្យបញ្ជាក់ពីម្ចាស់ដើមនោះឡើយ។ ការមិនតម្រូវឲ្យបញ្ជាក់ពីម្ចាស់ដើមនេះ ដើម្បីដោះស្រាយការលំបាកជូនប្រជាពលរដ្ឋ ចំពោះការផ្ទេរកម្មសិទ្ធិយានយន្ត សំដៅធានាការពារផលប្រយោជន៍ ស្របច្បាប់របស់ប្រជាពលរដ្ឋ ក៏ដូចជារួមចំណែកអនុវត្តច្បាប់ ស្តីពីចរាចរណ៍ផ្លូវគោកឲ្យកាន់តែប្រសើរឡើង។</span></p>
<p><span style="color: #000000;">សម្តេចនាយករដ្ឋមន្រ្តី ហ៊ុន សែន បានសរសេរសារបន្ថែមជូនប្រជាពលរដ្ឋថា <strong>«ក្នុងសេចក្តីប្រកាសរបស់ សម្តេចក្រឡាហោម ស ខេង គឺបានបញ្ជាក់ច្បាស់ហើយ គឺទទួលស្គាល់ការកាន់កាប់ជាក់ស្ដែង ដោយមិនតម្រូវឱ្យមានការបញ្ជាក់ពីម្ចាស់ដើមនោះឡើយ។ ពាក្សនេះមានន័យថាបងប្អូន ដែលបាននិងកំពុងប្រើប្រាស់យានយន្តទិញត ពីគេមិនបាច់កាត់ឈ្មោះ និងមិនត្រូវបង់សេវាអ្វីទាំងអស់។ បងប្អូនបន្តប្រើឯកសារ និងផ្លាកលេខយានយន្តដែលកំពុង មានស្រាប់ជាបន្តទៅទៀត»។</strong></span></p>
<p><span style="color: #000000;">ទោះជាយ៉ាងនេះក្តី សម្តេចតេជោ ហ៊ុន សែន ក៏បានជំរុញឱ្យម្ចាស់រថយន្តទាំងអស់ ទៅបង់ពន្ធផ្លូវប្រចាំឆ្នាំតាមច្បាប់កំណត់ និងបើកបរត្រូវតែត្រូវគោរពច្បាប់ចរាចរណ៍។ រាប់យានយន្តដែលមិនទាន់បង់ពន្ធ និងមិនទាន់មានស្លាកលេខ គឺត្រូវទៅបង់ពន្ឋនិងត្រូវធ្វើស្លាកលេខឱ្យបានត្រឹមត្រូវ ដើម្បីទទួលបានសិទ្ធិស្របច្បាប់ក្នុងការធ្វើចរាចរ៕</span></p>
<p><span style="color: #000000;"><a class="thickbox" title="" href="/FileManager/Commons/2016/1/11/1-11-2016-3-09-18-pm-11-01-2016--15-16-29.png"><span style="color: #000000;"><img src="/FileManager/Articles/mce/2016/1/11/1-11-2016-3-09-18-pm-11-01-2016--15-16-29.png" alt="" /></span></a></span></p>
<p style="text-align: right;"><span style="color: #000000;">ផ្ដល់សិទ្ធដោយ៖ ហ្វ្រេសញ៉ូវអាស៊ី</span></p>