<p><span style="color: #000000;"><strong>(តៃប៉ិ)៖</strong> អាជ្ញាធរតៃវ៉ាន់បានជម្លៀសប្រជាជនរាប់ពាន់នាក់ បិទសាលារៀន និងការិយាល័យនានា នៅទូទាំងកោះ ហើយជើងហោះហើររាប់រយ ត្រូវបានផ្អាកជាបណ្តោះអាសន្នផងដែរ ខណៈព្យុះទីហ្វុង ថ្មីមួយផ្សេងទៀតឈ្មោះ Megi ត្រូវបានគេព្យាករណ៍ថា បានបង្កឲ្យមានការបាក់ដីនៅភាគខាងកើត កោះតៃវ៉ាន់ នៅល្ងាចថ្ងៃអង្គារនេះ ប៉ុន្តែវាបានជះឥទ្ធិពលជាបណ្តើរៗរួចទៅហើយមកលើកោះតៃវ៉ាន់ ដោយបានបណ្តាលឲ្យមនុស្សចំនួន ៣២នាក់ទទួលរងរបួស។ នេះបើតាមការផ្សាយដោយ សារព័ត៌មាន Channel News Asia នៅមុននេះបន្តិច នារសៀលថ្ងៃអង្គារ ទី២៧ ខែកញ្ញា ឆ្នាំ២០១៦។</span></p>
<p><span style="color: #000000;">មជ្ឈមណ្ឌលប្រតិបត្តិការសង្រ្គោះបន្ទាន់តៃវ៉ាន់បានប្រាប់ថា ប្រជាជនច្រើនជាង ៥,៣០០នាក់ ត្រូវបានជម្លៀសខ្លួនចេញពីលំនៅដ្ឋានរបស់ពួកគេ ហើយប្រហែល ២,០០០នាក់ កំពុងស្ថិតនៅ ទីជម្រកសុវត្ថិភាព ខណៈមកដល់ពេលនេះ ផ្ទះប្រមាណ ៩៥,០០០ខ្នង បានដាច់ចរន្តអគ្គិសនី ដោយសារតែឥទ្ធិពលព្យុះខាងលើ។</span></p>
<p><span style="color: #000000;">បន្ថែមពីនេះទៀត ជើងហោះហើរជាតិនិងអន្តរជាតិសរុបចំនួន ៥៧៥ ត្រូវបានលុបចោល គិតត្រឹមព្រឹក ថ្ងៃអង្គារនេះ និងចំនួន ១០៩ជើងទៀតត្រូវបានពន្យារពេល ចំណែកឯជើងធ្វើដំណើរតាមរថភ្លើង ក៏ត្រូវបានផ្អាកដូចគ្នា។ ដោយឡែកភ្ញៀវទេសចរប្រមាណ ៣,៧០០នាក់ ត្រូវបានជម្លៀសចេញពីកោះ Orchid Island និង Green Island ដែលជាកន្លែងពេញនិយមសម្រាប់ភ្ញៀវទេសចរផងដែរ។</span></p>
<p><span style="color: #000000;">គួរបញ្ជាក់ដែរថា តៃវ៉ាន់ទើបតែទទួលរងការវាយប្រហារ ដោយព្យុះទីហ្វុង Meranti ដែលជាព្យុះទីហ្វុង សាហាវជាងគេនៅក្នុងឆ្នាំ២០១៦ កាលពីដើមខែកញ្ញានេះប៉ុណ្ណោះ។ ព្យុះទីហ្វុងនេះ បានឆក់យកជីវិត មនុស្សម្នាក់នៅតៃវ៉ាន់ មុនពេលដែលវាបានបន្តផ្តាច់យកជីវិតមនុស្ស ចំនួន២៨នាក់ទៀត រួចក៏ឆ្ពោះទៅកាន់ ភាគខាងកើតប្រទេសចិន៕</span></p>
<p><span style="color: #000000;"><a class="thickbox" title="" href="/FileManager/Commons/2016/9/27/15a-27-09-2016--15-45-00.jpg"><img src="/FileManager/Articles/mce/2016/9/27/15a-27-09-2016--15-45-00.jpg" alt="" /></a><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>