<p><span style="color: #000000;"><strong>ភ្នំពេញ)៖</strong>ទូកបុរាណដែលម្ចាស់ការដ្ឋានបូមខ្សាច់ ប្រទះឃើញកប់នៅក្នុងដីជម្រៅជាង៧ម៉ែត្រ នៅក្នុងភូមិបំពេញរាជ្យ ឃុំលាងដៃ ស្រុងអង្គរធំ ខេត្តសៀមរាប ត្រូវបានអាជ្ញាធរជាតិអប្សរាទទួលយកមករក្សាទុក ក្នុងកសិណអង្គរវត្តហើយ នារសៀលថ្ងៃទី៨ ខែមេសា ឆ្នាំ២០១៦។</span></p>
<p><span style="color: #000000;">ទូកបុរាណនេះមានប្រវែង១២,៨៣ម៉ែត្រ ជាប្រភេទទូកឃ្លោង ត្រូវបានគេសន្និដ្ឋានបឋមថា ធ្វើពីដើមគគីរ និងជាប្រភេទទូកដែលធ្វើពីដើមឈើ តែមួយដើមគត់។ អ្នកជំនាញពុំទាន់ហ៊ានសន្និដ្ឋានថា វាត្រូវបានគេធ្វើឡើងក្នុងសម័យកាលណា មានអាយុប៉ុន្មាននៅឡើយ គេគ្រាន់តែដឹងថា ទូកប្រភេទនេះ ជាទូកកម្រដែលអ្នកស្រាវជ្រាវមិនងាយបានប្រទះឃើញ។</span></p>
<p><span style="color: #000000;">លោកសាស្ត្រាចារ្យ Azedine BESCHAOUCH លេខាធិការវិទ្យាសាស្ត្រនៃគណៈកម្មការធិការ អាយស៊ីស៊ី-អង្គរ ដែលបានទៅពិនិត្យ មើលទូកនៅទីតាំង រកឃើញផ្ទាល់ បានបញ្ជាក់ថា យោងតាមកំណកដីដែលកប់ពីលើទូកមានជម្រៅបែបនេះ វាបញ្ជាក់ប្រាប់ថា ទូកនេះមានអាយុកាលយូរមកហើយ។ ទូកនេះ ជាប្រភេទទូកដែលគេលែងប្រទះឃើញប្រើប្រាស់ក្នុងប្រទេសកម្ពុជាបន្តទៀតដែរ។</span></p>
<p><span style="color: #000000;">នេះជាពិតជាសំណាងណាស់ដែលយើងបានប្រទះឃើញវត្ថុបុរាណ ដែលជាបេតិកភណ្ឌដ៏មានតម្លៃបែបនេះ។ លោកសាស្ត្រាចារ្យបន្ថែមថា លោកនឹងយកបំណែកតូចនៃទូកនេះទៅធ្វើការវិភាគតាមបច្ចេកវិទ្យាវិទ្យាសាស្ត្រ ដើម្បីកំណត់កាលបរិច្ឆេទជាក់លាក់នៃទូកនេះ។</span></p>
<p><span style="color: #000000;">លោក ហង់ ពៅ អគ្គនាយករងទទួលបន្ទុកនាយកដ្ឋានគ្រប់គ្រងទឹកបញ្ជាក់ថា ក្រោយពីទទួលបានដំណឹងពីប្រជាពលរដ្ឋដែលថា គេបានប្រទះឃើញ ទូកបុរាណនៅក្នុងការដ្ឋានបូមខ្សាច់មក លោកបានបញ្ជូនក្រុមការងារធ្វើការជាមួយអាជ្ញាធរភូមិឃុំ ដើម្បីទទួលបានព័ត៌មានជាក់លាក់តាំងពីថ្ងៃទី១៧ ខែមីនា មកម្ល៉េះ តែរកមិនឃើញ ដោយសារម្ចាស់ការដ្ឋានមិនព្រមសហការជាមួយ។ ប៉ុន្តែដោយក្រុមការងារនៅតែបន្តសហការជិតស្និទ្ធ ជាមួយអាជ្ញាធរភូមិឃុំ និងព្យាយាមពន្យល់ម្ចាស់ការដ្ឋានឲ្យបានយល់អំពីតម្លៃនៃបេតិកភណ្ឌ និងច្បាប់នៃការគ្រប់គ្រងនេះជាច្រើនលើកច្រើនសា ទើបនៅព្រឹកថ្ងៃទី៨ ខែមេសានេះគាត់ព្រមសហការជាមួយ ហើយកាយយកទូកដែលកប់ទៅក្នុងភក់នោះឡើងមកវិញ។</span></p>
<p><span style="color: #000000;">លោក គឹម ឆន មេឃុំលាងដៃបានលើកឡើងថា លោកបានទទួលដំណឹងនៃការឃើញទូកបុរាណនេះជាងពីរសប្តាហ៍មកហើយ ព្រមទាំងបានបញ្ជូនក្រុមប្រឹក្សាឃុំទៅតាមដានទៀតផង។ តែក្រោយមក ម្ចាស់ការដ្ឋានបែរជានិយាយថា មិនបានឃើញទូកបុរាណនោះទៅវិញ ប្រហែលជាដោយសារតែគាត់បារម្ភពីការបិទការដ្ឋានបូមខ្សាច់របស់គាត់ ទើបគាត់ព្យាយាមលាក់ពីពួកយើង។ ប៉ុន្តែ ដោយក្រុមការងារចេះតែតាមដានជាប្រចាំ និងពន្យល់គាត់សព្វគ្រប់ទើបគាត់ព្រមបង្ហាញការពិតដល់ពួកយើង។</span></p>
<p><span style="color: #000000;">អ្នកស្រី សំ យិន រស់នៅភូមិប្រដាក និងជាម្ចាស់ការដ្ឋានបូមខ្សាច់ ដែលបានប្រទះឃើញទូកបុរាណនេះរៀបរាប់ថា អ្នកស្រីបានប្រទះឃើញទូកនេះមែន តាំងតែពីជាង១០ថ្ងៃមុន តែអ្នកស្រីបានឲ្យគេពន្លិចទៅវិញ។ អ្នកស្រីបញ្ជាក់ថា ការដែលអ្នកស្រីចេះតែលាក់នោះគឺដោយសារអ្នកស្រីបាន យល់សប្តិឃើញម្ចាស់ទូក គេមកប្រាប់ថា ត្រូវរៀបចំទូកជាតំណាងឲ្យគេ ព្រមទាំងរៀបចំបាយសី លេងភ្លេងជូនគេ ទើបអាចយកទូកចេញបាន។ </span><br /><span style="color: #000000;">ឥឡូវនេះអ្នកស្រីបានរៀបចំទូកតំណាងដែលធ្វើពីដើមខ្លែងគង់ប្រវែង២ចំអាមកន្លះ និងរៀបចំបាយសី១២ថ្នាក់បានរួចរាល់ហើយ ទើបអ្នកស្រីសម្រេចបា្រប់ដល់អាជ្ញាធរនៅពេលនេះ។</span></p>
<p><span style="color: #000000;">សូមបញ្ជាក់ថា ក្នុងពិធីទទួលទូកបុរាណនេះ អាជ្ញាធរជាតិអប្សរាក៏បានឧបត្ថម្ភថវិកាដល់ ម្ចាស់ការដ្ឋានក្នុងការរៀបចំបាយសី និងធ្វើពិធីតំឡើងនៅ ថ្ងៃទី១៣ ខែមេសាខាងមុខ ព្រមទាំងឧបត្ថម្ភដល់កម្មករទាំង២៥នាក់ និងអាជ្ញាធរមូលដ្ឋានដែលបានផ្តល់កិច្ចសហការជ្រោមជ្រែង នាំយកទូកមករក្សាទុកនៅកសិណអង្គរវត្ត ដែលនេះជាគំរូល្អមួយ ក្នុងកិច្ចសហការល្អលើការងារអភិរក្សបេតិកភណ្ឌដូនតាខ្មែរ៕</span></p>
<div class="fb-video fb_iframe_widget fb_iframe_widget_fluid_desktop" style="width: 100%;" data-allowfullscreen="1" data-href="/1383579305302984/videos/vb.1383579305302984/1595302770797302/?type=3"></div>
<p style="text-align: center;"><span style="color: #000000;"><img src="https://fbcdn-sphotos-a-a.akamaihd.net/hphotos-ak-xpt1/t31.0-8/12976977_488015661400793_5315130344331684052_o.jpg" alt="" width="730" /></span></p>
<p style="text-align: center;"><span style="color: #000000;"><img src="https://fbcdn-sphotos-c-a.akamaihd.net/hphotos-ak-xpf1/t31.0-8/12976714_488015644734128_9023005916035227785_o.jpg" alt="" width="730" /></span></p>
<p style="text-align: center;"><span style="color: #000000;"><img src="https://scontent-kul1-1.xx.fbcdn.net/hphotos-xat1/t31.0-8/12970875_488015651400794_8634431224261063190_o.jpg" alt="" width="730" /></span></p>
<p style="text-align: center;"><span style="color: #000000;"><img src="https://scontent-kul1-1.xx.fbcdn.net/hphotos-xap1/t31.0-8/12901521_488015714734121_558535444650387054_o.jpg" alt="" width="730" /></span></p>
<p style="text-align: center;"><span style="color: #000000;"><img src="https://fbcdn-sphotos-e-a.akamaihd.net/hphotos-ak-xaf1/v/t1.0-9/12991006_488015724734120_8939727476292519452_n.jpg?oh=80f3b6eb18da059b742b13ec95995124&oe=5788002F&__gda__=1471627678_32af7ee3c3aaf00053fd1617a20b1f35" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>