<p><span style="color: #000000;"><strong>ភ្នំពេញ៖</strong> លោកឧត្តមសេនីយ៍ សត ណាឌី ស្នងការនគរបាលខេត្តសៀមរាប បានឱ្យដឹងថា ពេលនេះប៉ូលិសបានស្គាល់ទីតាំង របស់ជនដៃដល់ម្នាក់ ជាកូនប្រសាររបស់ប្រធានពន្ធនាគារមួយ ដែលបានវាយទៅលើស្រ្តី ជាប៉ូលិសចរាចរណ៍ឱ្យរបួសធ្ងន់ ព្រមទាំងស្រែកជេរថា «បើង៉ែងមិនសុំទោសអញទេ! ថ្ងៃណាមួយនឹងងាប់ នៅឡានអញជាមិនខាន!» ខណៈនៅពេលដែលនាង បំពេញកិច្ចការនៅក្នុងក្រុងសៀមរាប ជាប៉ូលិសចរាចរណ៍។</span></p>
<p><span style="color: #000000;">ហេតុការណ៍នេះបានកើតឡើង កាលពីរសៀលថ្ងៃទី០៤ ខែសីហា ឆ្នាំ២០១៥ នៅលើផ្លូវមួយ នាក្រុងសៀមរាប នាពេលដែលស្រ្តីប៉ូលិសចរាចរណ៍ បានអនុវត្តតួនាទី ដោយធ្វើការឃាត់ម៉ូតូរបស់ជនដៃដល់ ដែលជិះដោយមិនពាក់មួកសុវត្ថិភាព និងម៉ូតូគ្មានស្លាកលេខ។</span></p>
<p><span style="color: #000000;">ជនដៃដល់មានឈ្មោះ លឹម ស្នេហ៍គំនិត ហៅ ធូ ជាថៅកែចិញ្ចឹមក្រពើ ដែលត្រូវជាកូនប្រសាររបស់លោក ឆែម សាវុធ ប្រធានពន្ធនាគារខេត្តសៀមរាប រស់នៅម្តុំអាងក្រពើ ភូមិវត្តស្វាយ សង្កាត់សាលាកំរើក ក្រុងសៀមរាប។</span></p>
<p><span style="color: #000000;">គេហទំព័រអគ្គស្នងការនគរបាលជាតិ បានឱ្យដឹងថា នៅថ្ងៃកើតហេតុជនដៃដល់បានជិះម៉ូតូមួយគ្រឿង ម៉ាកហុងដាសេ១២៥ ពណ៌ខ្មៅឌុបប្រពន្ធ ដោយពុំមានពាក់មួកការពារសុវត្ថិភាព និងម៉ូតូគ្មានស្លាកលេខ ឃើញដូចនោះ ជនរងគ្រោះដែលជាប៉ូលិសចរាចរ បានចេញទៅឃាត់ឲ្យឈប់ម៉ូតូ ស្រាប់តែបុរសម្នាក់នោះ អត់ឈប់ហើយជិះម៉ូតូតម្រង់មករកបុកនាង ព្រមទាំងយកដៃគ្រវាសដំបងចរាចរណ៍នាងចេញ ពេលនោះនាងក៏តាមកាក់ម៉ូតូនោះ រហូតដល់ឈប់ក្រោយមកទៀត បុរសម្នាក់បានចុះពីលើម៉ូតូ មកហើយវាយនាងមួយដៃ ត្រូវដើមដៃខាងស្តាំ ហើយរត់ឡើងម៉ូតូប្រុងបើករត់គេច តែនាងរត់ទៅចាប់ម៉ូតូ កុំឲ្យបើករត់គេច តែបុរសនោះបានវាយនាងមួយដៃទៀត ត្រង់ចំណុចដដែល បណ្តាលឲ្យដៃរបស់នាងឡើងជាំ ហើយភ្លត់ដៃខាងស្តាំ។</span></p>
<p><span style="color: #000000;">ប្រភពដដែលបានឱ្យដឹងថា នៅពេលបន្ទាប់មកលោកអនុសេនីយ៍ឯក សាយ ឌីណា បានរត់មកជួយ ហើយលោកពលបាលឯក សាត ពឿន រត់មកជួយទៀត ទើបឃាត់បុរសម្នាក់នោះជាប់ ហើយរាយការណ៍ទៅថ្នាក់លើ។ ដោយតាមបញ្ជាថ្នាក់លើ ក៏ឲ្យដកយកម៉ូតូនោះ ទៅរក្សាទុកនៅស្នងការនគរបាលខេត្តសៀមរាបតែម្តង ហើយបុរសនោះក៏គេចខ្លួនបាត់ ។ លុះកន្លះម៉ោងក្រោយមកបុរសនោះ ក៏ត្រលប់មកវិញម្តងទៀត បើករថយន្តម៉ាកកាម៉ារីហាយប្រ៊ីត ពណ៌ស មកដល់កន្លែងនាងឈជើង ហើយចុចកញ្ចក់ឡានចុះ ហើយស្រែកជេរយ៉ាងកម្រោលមកលើនាងថា៖ « បើង៉ែងមិនសុំទោសអញទេ! ថ្ងៃណាមួយនឹងងាប់ នៅឡានអញជាមិនខាន!»៕</span></p>
<p><span style="color: #000000;"><a class="thickbox" title="" href="/FileManager/Commons/2015/8/8/8-8-2015-9-06-06-am-08-08-2015--09-12-52.png"><span style="color: #000000;"><img src="/FileManager/Articles/mce/2015/8/8/8-8-2015-9-06-06-am-08-08-2015--09-12-52.png" alt="" /></span></a></span></p>
<p style="text-align: right;"><span style="color: #000000;">ផ្ដល់សិទ្ធដោយ៖ ដើមអម្ពិល</span></p>