រាជធានីភ្នំពេញ ៖ នាងកែវ នីសា មានវ័យ២៦ឆ្នាំ ប្រកបដោយរូបសម្ផស្សស្រស់ផូរផង់គួរឱ្យចង់គយគន់។ នាងមានទឹកមុខញញឹមជានិច្ច និងមានកេរ្តិ៍ឈ្មោះល្បីគួរសមក្នុងពិភពសិល្បៈភាពយន្ត និងកាយវិការខារ៉ាអូខេ ។ កន្លងមកនាងចូលរួមសំដែងកាយវិការខារ៉ាអូខេឱ្យផលិតកម្ម ទាំងក្នុង និងក្រៅប្រទេស ។ លើសពីនេះនាងសំដែងខ្សែវីដេអូបានជាច្រើនរឿង ដូចជារឿង បំពេព្រលឹង ជាតួឯក រឿង ទ្រុងមាសបក្សីស្នេហ៍ រឿង កែចិត្តស្អប់បង រឿង ត្រៀមចិត្តសំរាប់ឈឺ ដែលសុទ្ធតែជារឿងភាគចាក់ផ្សាយតាមកញ្ចក់ទូរទស្សន៍បាយ័ន។ ចុងក្រោយនេះ នាងសំដែងរឿងភាគ ឧត្តមដួងចិត្ត ឱ្យស្ថានីយទូរទស្សន៍អាស៊ីគ្នេយ៍ដោយអ្នកដឹកនាំរឿងតំរូវឱ្យនាង សំដែងជាតួឯកឈ្មោះអេឡែន ដែលជាមនុស្សស្រីរឹងប៉ឹងម៉ឺងម៉ាត់ក្នុងការងារ ។
នាងកែវ នីសា និយាយថា រឿង ឧត្តមដួងចិត្ត បានចេញថតកាលពីថ្ងៃទី ១៩ មករា ឆ្នាំ២០១១ ដោយក្នុងមួយសប្តាហ៍ថត៤ថ្ងៃ គឺ ថ្ងៃចន្ទដល់ថ្ងៃព្រហស្បតិ៍ ។ នាងនឹងខិតខំប្រឹងប្រែងសំដែងឱ្យបានល្អ ដើម្បីទាក់ទាក់ការចាប់អារម្មណ៍ពីសំណាក់មហាជនទូទៅឱ្យកាន់តែ គាំទ្រនាង ។
នាងកែវ នីសា បានចូលប្រឡូកក្នុងពិភពសិល្បៈសំដែងតាំងពីឆ្នាំ២០០២ មក ហើយទទួលជោគជ័យជានិច្ច ទោះបីជាជួបប្រទះឧបសគ្គខ្លះៗក៏ដោយ ។តារា សំដែងរូបនេះមានប្រភពកំណើតនៅរាជធានីភ្នំពេញ ក្នុងសង្កាត់ស្រះចក ខណ្ឌដូនពេញ។ នាងមានបងប្អូន២នាក់គឺ រូបនាង និងប្អូនប្រុស។
ថ្វីបើទទួលជោគជ័យក្នុងអាជីពសិល្បៈសំដែងពិតមែន តែរឿងស្នេហានាងជួបរឿងបរាជ័យ ដូច្នេះហើយពេលនេះនាងសុំមិននិយាយរំលឹករឿងស្នេហាទៀតទេ។ នាងនិយយាថា និយយាពីរឿងស្នេហានាំតែឈឺចាប់ ហើយនាងបានបំភ្លេចចោលយូរហើយ៕
http://kohsantepheapdaily.com.kh/art...30-205338.html