<p><span style="color: #000000;"><strong>(ភ្នំពេញ)៖</strong> ប្រភពព័ត៌មានដែលបានទម្លាយចេញនាពេលថ្មីនេះបានឲ្យដឹងថា តារាចម្រៀងកំពុងពេញនិយម ក្នុងស្រទាប់យុវវ័យប្រចាំក្នុងផលិតកម្ម ថោន គឺលោក ខេម កំពុងតែរងនូវការព្រមានប្ដឹង ពីសំណាក់សហព័ន្ធកីឡាប្រដាល់កម្ពុជា ក្រោយពីលោក បានចេញចម្រៀងមួយបទមានចំណងជើងថា <strong>«ជីវិតអ្នកប្រដាល់»</strong> ដែលសហព័ន្ធកីឡា បានចាត់ទុកថា បទចម្រៀងនេះ មានអត្ថន័យមើលងាយ មើលថោក ដល់កីឡាករប្រដាល់ ក៏ដូចជាអ្នកមានអាជីពប្រដាល់ទាំងអស់។</span></p>
<p><span style="color: #000000;">ប្រភពព័ត៌មានដដែលបានបង្ហើបឲ្យដឹងថា បន្ទាប់ពីព្រមានប្ដឹងតារាចម្រៀង ខេម រួចហើយ សហព័ន្ធកីឡា បានផ្ញើលិខិតមួយច្បាប់ ទៅដល់ក្រសួងវប្បធម៌ និងវិចិត្រសិល្បៈ ដើម្បីឲ្យចេញលិខិតព្រមានមួយ ដល់ផលិតកម្ម ថោន ដែលបានអនុញ្ញាតឲ្យថតបទចម្រៀងនេះ និងចរាចរផ្សាយជាសាធារណៈ ធ្វើឲ្យប៉ះពាល់យ៉ាងធ្ងន់ធ្ងរ ដល់វិស័យកីឡាប្រដាល់កម្ពុជា។ ក្រសួងវប្បធម៌ និងវិចិត្រសិល្បៈ បានចេញសេចក្ដីព្រមាន និងដាក់បម្រាមចំនួន ៦ចំណុច ជាពិសេស ហាមមិនឲ្យបណ្តាញផ្សព្វផ្សាយ ដូចជា វិទ្យុ និងទូរទស្សន៍ ចាក់ផ្សាយបទចម្រៀងមួយនេះផងដែរ។</span></p>
<p><span style="color: #000000;">បម្រាមទាំង៦ចំណុច របស់ក្រសួងវប្បធម៌ និងវិចិត្រសិល្បៈរួមមាន ទី១៖ គឺព្រមានចុងក្រោយ ដល់ផលិតកម្មថោនឲ្យឈប់រំលោភ បំពានលើច្បាប់សិទ្ធិអ្នកនិពន្ធ និងសិទ្ធិប្រហាក់ប្រហែល។ ទី២៖ ហាមមិនឲ្យផលិតកម្ម ថោន បន្តធ្វើការចែកផ្សាយបទចម្រៀង<strong> «ជីវិតអ្នកប្រដាល់»</strong> តាមគ្រប់រូបភាព និងគ្រប់មធ្យោបាយ និងដកបទចម្រៀងនេះចេញពី Youtube ផ្លូវការរបស់ផលិតកម្មថោន ។ ទី៣៖ ហាមមិនឲ្យប្រព័ន្ធផ្សព្វផ្សាយ ទាំងវិទ្យុ និងទូរទស្សន៍យកបទចម្រៀងនេះទៅចាក់ផ្សាយ។ ទី៤៖ ហាមមិនឲ្យអ្នកចម្រៀង ខេម ឬ អ្នកចម្រៀងដទៃទៀតយកបទចម្រៀងនេះ ទៅច្រៀងក្នុងវេទិកាប្រគំតន្ត្រី និងគ្រប់វេទិកាដទៃផ្សេងៗទៀត។ ទី៥៖ ហាមមិនឲ្យផលិតកម្ម ថោន យកបទចម្រៀងនេះ ទៅផលិតជាខារ៉ាអូខេ ឬជាចម្រៀងកាយវិការឡើយ និងទី៦៖ បង្គាប់ឲ្យផលិតកម្ម ថោន ធ្វើលិខិតសុំទោសជាសាធារណៈ ជូនចំពោះសហព័ន្ធកីឡាប្រដាល់កម្ពុជា។</span></p>
<p><span style="color: #000000;">លោក ងួន សុបិន អ្នកនិពន្ធបទចម្រៀង <strong>«ជីវិតអ្នកប្រដាល់»</strong> បានថ្លែងប្រាប់ Khmertalking នៅមុននេះបន្តថា តាមការពិតបទនេះ លោកនិពន្ធឡើង ចង់ឆ្លុះបញ្ចាំងពីជីវិតពិតរបស់ កីឡាករម្នាក់ គឺកីឡាករ កែវ រំចង់ ដែលលោកបានស្គាល់ច្បាស់ពីប្រវត្តិ និងការតស៊ូក្នុងវិស័យជាកីឡាប្រដាល់ ពោលពុំបានផ្ចាញ់ផ្ចាល ឬសំដៅដល់កីឡាករដទៃណាម្នាក់ ដែលមានជីវភាពធូរធាក្នុងវិស័យនេះឡើយ។</span></p>
<p><span style="color: #000000;">យ៉ាងណាមិញ ប្រសិនបើសហព័ន្ធមិនពេញចិត្ត ក៏ដូចជាមានការហាមប្រាម ពីក្រសួងវប្បធម៌នោះ រូបលោក ក៏ដូចជាផលិតកម្មទាំងមូល ក៏បានគោរពតាមបំរាមទាំង៦ចំណូចនោះ រួចរាល់អស់ហើយ ដោយយើងមានការហាមតារាចម្រៀង មិនឲ្យច្រៀងបទនេះ ពេលឡើងឆាកតន្រ្តី និងបានដកចេញពីប្រព័ន្ធផ្សាព្វផ្សាយ ទាំងអស់របស់ផលិតកម្ម ថោន មានដូចជា Youtube , Facebook វិទ្យុ និងប្រព័ន្ធផ្សព្វផ្សាយដទៃទៀតរួចរាល់ហើយដែរ។ ជាមួយគ្នានេះ ការផលិតជា VCD ក៏មិនត្រូវបានផលិតឡើងឡើយ។</span></p>
<p><span style="color: #000000;">យ៉ាងណាមិញ ខុសផ្ទុយស្រឡះពីការគាំទ្ររបស់មហាជន ទៅលើបទចម្រៀងថ្មីរបស់ផលិតកម្ម ថោន ដែលបកស្រាយយ៉ាងពីរោះ និងពោរពេញទៅដោយអត្ថន័យ នៃសំឡេងរបស់ តារាចម្រៀង លោក ខេម ដែលបង្ហាញពីក្ដីឈឺចាប់ និងទុក្ខលំបាករបស់ជីវិតកីឡាករប្រដាល់កម្ពុជានោះ បែរជាសហព័ន្ធកីឡាប្រដាល់ សម្ដែងនូវការមិពេញចិត្ត ហើយប្ដឹងលោក ខេម ទៅវិញ។</span></p>
<p><span style="color: #000000;">សូមបញ្ជាក់ថា បទចម្រៀង ដែលក្រសួងវប្បធម៌ សម្រេចហាមឃាត់មិនឲ្យចាក់ផ្សាយតាមស្ថានីយវិទ្យុ ទូរទស្សន៍ រួមមានបទ «អាមុំប៉ុមពីត, ស៊ីបាន ចេះតែស៊ីទៅ,ទាល់តែយូរ ទើបស៊ីអូនបាន» និងចុងក្រោយនេះ គឺបទ «ជីវិតអ្នកប្រដាល់»៕</span></p>
<p><object width="480" height="380" data="http://www.youtube.com/v/oUzuq0oV1bU&rel=1" type="application/x-shockwave-flash"><param name="wmode" value="transparent" /><param name="src" value="http://www.youtube.com/v/oUzuq0oV1bU&rel=1" /></object></p>
<p style="text-align: right;"><span style="color: #000000;"><img src="http://www.lareine.com.kh/img/news-img/26-10-2016-1477449962.jpg" alt="" width="730" />ផ្តល់សិទ្ធដោយ ៖ ខ្មែរថកឃីង</span></p>