<p><span style="color: #000000;"><strong>(ភ្នំពេញ)៖</strong> មន្ត្រីជាន់ខ្ពស់ នៅមន្ទីរពេទ្យមិត្តភាពខ្មែរ-សូវៀត បានថ្លែងប្រាប់ទំព័រសារព័ត៌មាន ឲ្យដឹងនៅព្រឹកថ្ងៃនេះថា លោក ឈូក បណ្ឌិត អតីតអភិបាលក្រុងបាវិត ខេត្តស្វាយរៀង ដែលបានជាប់ពន្ធនាគារកាលពីដើមឆ្នាំនេះ ពីបទបាញ់ឲ្យកម្មកររោងចក្រ៣នាក់របួស ពេលមានការតវ៉ាក្នុងឆ្នាំ២០១២ ត្រូវគេបញ្ជូនមកព្យាបាល នៅក្នុងមន្ទីរពេទ្យមិត្តភាពខ្មែរ-សូវៀត ពីរ-បីថ្ងៃមកហើយ ដោយលោកមានជំងឺលើសឈាម ទឹកនោមផ្អែម និងជំងឺផ្សេងៗទៀត។</span></p>
<p><span style="color: #000000;">ចំណែកមន្រ្តីពន្ធនាគារខេត្តស្វាយរៀង បានឲ្យដឹងថា លោក ឈូក បណ្ឌិត ត្រូវគេបញ្ជូនពីពន្ធនាគារ ខេត្តស្វាយរៀង ទៅពន្ធនាគារព្រៃស នាពេលថ្មីៗនេះ ព្រោះមានការស្នើសុំពីមេធាវី។</span></p>
<p><span style="color: #000000;">សូមបញ្ជាក់ថា លោក ឈូក បណ្ឌិត អតីតអភិបាលក្រុងបាវិត បានបាញ់ទៅលើកម្មការិនី ៣នាក់ ឲ្យរងរបួសធ្ងន់ធ្ងរ ខណៈដែលពួកគេធ្វើកូដកម្ម នៅរោងចក្រកៅវេ កាលពីខែកុម្ភៈ ឆ្នាំ២០១២ ដែលរហូតមកដល់បច្ចុប្បន្នរយៈពេល៣ឆ្នាំ ហើយជនរងគ្រោះមិនទាន់ទទួល បានយុត្តិធម៌នៅឡើយ។ លោកត្រូវបានចៅក្រម សាលាដំបូងខេត្តស្វាយរៀង កាត់ទោសកាលពីថ្ងៃទី២៥ ខែមិថុនា ឱ្យជាប់ពន្ធនាគារ រយៈពេល១ឆ្នាំកន្លះ ពីបទបាញ់ប្រហារ ទៅលើកម្មការិនី៣នាក់ ឱ្យរងរបួសដោយអចេតនា។ តុលាការក៏តម្រូវឲ្យអតីតអភិបាលក្រុងបាវិតរូបនេះ បង់ប្រាក់សំណង ទៅឲ្យជនរងគ្រោះទាំង៣នាក់សរុប ៣៨លានរៀលផងដែរ។</span></p>
<p><span style="color: #000000;">នៅម៉ោង១៖១០នាទីរសៀល ថ្ងៃទី០៨ ខែសីហា ឆ្នាំ២០១៥ លោក ឈូក បណ្ឌិត អតីតអភិបាលក្រុងបាវិត ដែលរត់គេចខ្លួន ពីការតាមចាប់ របស់សមត្ថកិច្ច អស់ពេល៣ឆ្នាំ បន្ទាប់បាញ់កម្មការិនី៣នាក់រងរបួសបានប្រគល់ខ្លួន ឱ្យស្នងការដ្ឋាននគរបាលរាជធានីភ្នំពេញ ហើយត្រូវសមត្ថកិច្ចបញ្ជូនភ្លាមៗ បញ្ជូនទៅកាន់តុលាការខេត្តស្វាយរៀង ហើយតុលាការ ក៏បានសម្រេចបញ្ជូន ទៅពន្ធនាគារខេត្តស្វាយរៀង ដើម្បីធ្វើការឃុំឃាំង៕</span></p>
<p style="text-align: center;"><span style="color: #000000;"><img src="http://s3-ap-southeast-1.amazonaws.com/images.freshnews/fn.photo/Aug2015/K-5432.jpg" alt="" width="730" /></span></p>
<p style="text-align: center;"><span style="color: #000000;"><img src="http://s3-ap-southeast-1.amazonaws.com/images.freshnews/fn.photo/Aug2015/K-5439.jpg" alt="" width="730" /></span></p>
<p style="text-align: right;"><span style="color: #000000;">ផ្ដល់សិទ្ធដោយ៖ ហ្វ្រេសញ៉ូវអាស៊ី</span></p>