<p><span style="color: #000000;"><strong>(ភ្នំពេញ)៖</strong> ក្រសួងធម្មការ និងសាសនា ព្រមជាមួយគណៈសង្ឃនាយក បាននិងកំពុងតាមស្វែងរកព្រះភិក្ខុអគ្គមុន្នី វ៉ា ស៊ីណាន ដែលបានបង្ហោះរូបអាក្រាតកាយ និងវីដេអូសេពកាមលើ Facebook បណ្ដាលឱ្យប៉ះពាល់ដល់សេចក្ដីថ្លៃថ្នូរ និងតម្លៃព្រះពុទ្ធសាសនានោះ ដើម្បីយកមកអប់រំតាមធម្មវិន័យ នៃពុទ្ធសាសនា។ នេះបើតាមលោក សេង សុមុន្នី អ្នកនាំពាក្យក្រសួងធម្មការ និងសាសនា ថ្លែងប្រាប់អង្គភាពសារព័ត៌មាន Fresh News នៅមុននេះបន្តិច។។</span></p>
<p><span style="color: #000000;">លោក សេង សុមុន្នី បានឱ្យដឹងថា គណៈសង្ឃនាយកទាំង២គណៈ បានជួបប្រជុំជាមួយថ្នាក់ដឹកនាំក្រសួងធម្មការ ដើម្បីតាមដានស្វែងរកព្រះសង្ឃ វ៉ា ស៊ីណាន យកមកស៊ើបសួរថា មានអាការៈដូចម្ដេច និងចាត់ចែងអប់រំ លើកទឹកចិត្តឱ្យជាសះស្បើយឡើងវិញ ទៅតាមអ្វីដែលជាធម្មវិន័យ នៃព្រះពុទ្ធសាសនា តែបើមិនអាចអប់រំបានទេ ខាងគណៈសង្ឃនឹងអនុម័តគ្នាធ្វើការផ្សឹកព្រះសង្ឃអង្គនេះ ដើម្បីកុំឱ្យមានការប៉ះពាល់ដល់តម្លៃព្រះពុទ្ធសាសនាតទៅទៀត។</span></p>
<p><span style="color: #000000;">លោក សេង សុមុន្នី បានបន្ថែមថា «កន្លងមក គណៈសង្ឃនាយក ក៏បានធ្វើការណែនាំពីធម្មវិន័យ និងបានធ្វើការផ្សព្វផ្សាយជាច្រើនលើកច្រើនសារ រួចមកហើយដែរ ដូចជាការហាមមិនឱ្យសម្ដែងនូវអាការៈមិនសមរម្យ ការជេរប្រមាថ ការបង្កើតជាចលាចល ការដើរធ្វើបាតុកម្ម កុំថាឡើយចេញអាក្រាតកាយ សូម្បីតែមានការលាត់ស្បង់ចីវរ ដែលធ្វើឱ្យបាត់បង់ការជ្រះថ្លារបស់ពុទ្ធបរិស័ទ ក៏មិនឱ្យប្រព្រឹត្តខុសផង នៅសម័យព្រះក៏មានព្រះសង្ឃ ដែលប្រព្រឹត្តអំពើបែបនេះដូចគ្នា តែព្រះពុទ្ធបានធ្វើការអប់រំទៅតាមធម្មវិន័យ និងមានការផ្សឹកផងដែរ ព្រោះបុគ្គលប្រភេទនេះ មិនអាចប្រតិបត្តិនូវព្រះធម៌ ឬធម្មវិន័យបានដូចមុនឡើយ គ្រាន់តែនៅសម័យនោះមិនសូវមានអ្នកណាដឹងច្រើន ព្រោះមិនមានប្រព័ន្ធផ្សព្វផ្សាយទូលំទូលាយ ដូចបច្ចុប្បន្ន»។</span></p>
<p><span style="color: #000000;">សូមរំលឹកថា កាលពីពេលថ្មីៗនេះ ព្រះភិក្ខុអគ្គមុន្នី វ៉ា ស៊ីណាន បានបង្ហោះរូបភាពអាក្រាត និងថតវីដេអូសេពកាមខ្លួនឯង បង្ហោះលើបណ្ដាញសង្គម Facebook ដែលមានប្រជាពលរដ្ឋ ក៏ដូចជាពុទ្ធបរិស័ទជាច្រើន បានលើកឡើងនូវការរិះគន់ថា បណ្ដាលឱ្យប៉ះពាល់ដល់តម្លៃព្រះពុទ្ធសាសនា យ៉ាងខ្លាំងក្លា។</span></p>
<p><span style="color: #000000;">ក្រសួងធម្មការ និងសាសនា ក៏បានធ្វើការអំពាវនាវដល់ប្រជាពលរដ្ឋ ក៏ដូចជាពុទ្ធបរិស័ទទាំងអស់ សូមកុំឱ្យមានការយល់ច្រឡំលើក្រសួងដែលថា មានការប្រព្រឹត្តខុសបែបនេះហើយ បែរជាមិនមានចំណាត់ការអ្វីនោះ ព្រោះក្រសួងបាននិងកំពុងធ្វើការស្រាវជ្រាវរកព្រះសង្ឃខាងលើ យកមកធ្វើការអបរំហើយ។ ម្យ៉ាងទៀត ក្រសួងក៏អំពាវនាវដល់សាធារណជន ប្រសិនបើបានឃើញព្រះសង្ឃអង្គនេះ សូមផ្ដល់ដំណឹងមកជាបន្ទាន់ ដើម្បីឱ្យក្រសួងចាត់វិធានការ សមស្របតាមធម៌វិន័យព្រះពុទ្ធសាសនា៕</span></p>
<p><span style="color: #000000;"><img src="http://image.freshnewsasia.com/2016/ID-020/fn-2016-06-15-17-13-35-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/ID-020/fn-2016-06-15-17-13-35-1.jpg" alt="" width="730" /></span></p>
<p><span style="color: #000000;"><img src="https://scontent-kul1-1.xx.fbcdn.net/v/t1.0-9/13406844_524759984401845_6987024181649759508_n.jpg?oh=0ff6d8fc6979f45aaff5c5ee90971200&oe=5806E15A" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី</span></p>