<p><span style="color: #000000;"><strong>(ភ្នំពេញ)៖</strong> សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានបង្ហាញការប្រតិកម្មទៅនឹងអ្នករិះគន់ ដែលបានលើកឡើងថា គណៈរដ្ឋមន្រ្តីកម្ពុជា ពេលនេះជាគណៈរដ្ឋមន្រ្តី Facebook បន្ទាប់ពីរាជរដ្ឋាភិបាលប្រើប្រាស់ប្រព័ន្ធនេះ ដើម្បីដោះស្រាយបញ្ហាជូនប្រជាពលរដ្ឋ។</span></p>
<p><span style="color: #000000;">ក្នុងពិធីសម្ពោធដាក់ឲ្យប្រើប្រាស់ សាកលវិទ្យាល័យ ហេង សំរិន ត្បូងឃ្មុំ ស្ថិតនៅក្នុងខេត្តត្បូងឃ្មុំ នាព្រឹកថ្ងៃទី១១ ខែកុម្ភៈ ឆ្នាំ២០១៦នេះ សម្តេចតេជោ ហ៊ុន សែន បានលើកឡើងថា <strong>«ការពិតគឺប្រជាពលរដ្ឋ ឬក៏រហូតដល់ផ្នែកនានា គេបានស្វាគមន៍ទូទាំងប្រទេស វាទៅជាមានអ្នកវិភាគថា គណៈរដ្ឋមន្រ្តី Facebook "ខ្ញុំគិតថាអ្នកទាំងនោះ យើងត្រូវបង្កើតសាលាមួយ ហើយហៅឈ្មោះអ្នកហ្នឹងមកបង្រៀនយើងថាតើគួរធ្វើអ្វីខ្លះ"»</strong>។</span></p>
<p><span style="color: #000000;">កាលពីថ្ងៃទី០៨ ខែកុម្ភៈ ឆ្នាំ២០១៦ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានចេញលិខិតណែនាំឱ្យស្ថាប័ន ក្រសួងជំនាញ និងអាជ្ញាធរមូលដ្ឋាន បង្កើតក្រុមការងារ និងទំព័រ Facebook ហើយតាមដានទំព័រ Facebook របស់សម្តេចតេជោ និងបញ្ហារបស់ប្រជាពលរដ្ឋ ដើម្បីដោះស្រាយឱ្យទាន់ពេលវេលា។ សម្តេចថែមទាំងបានលើកឡើងថា សម្តេចនឹងបញ្ជូនរបស់ប្រជាពលរដ្ឋ ទៅកាន់ស្ថាប័នពាក់ព័ន្ធ តាមបណ្តាញសង្គម Facebook។</span></p>
<p><span style="color: #000000;">សម្តេចនាយករដ្ឋមន្រ្តី បានលើកឡើងថា នេះគឺជាការប្រើប្រាស់ប្រព័ន្ធ រដ្ឋាភិបាលអេឡិចត្រូនិច ដែលមានភាពប្រសើរឡើងច្រើន និងលឿនជាងការដោះស្រាយបញ្ហាកន្លងមក។ សម្តេចលើកឡើងថា<strong> «រដ្ឋាភិបាលអេឡិចត្រូនិចនេះ មានគ្រប់ប្រព័ន្ធរបស់វា រាប់ទាំងប្រព័ន្ធអ្វីដែលលឿនបំផុត ដែលអាចដោះស្រាយការងារ បានសម្រាប់ប្រជាពលរដ្ឋ»</strong>។</span></p>
<p><span style="color: #000000;">សម្តេចនាយករដ្ឋមន្រ្តី ហ៊ុន សែន បានបន្ថែមទៀតថា <strong>«នៅពេលដែលប្រជាពលរដ្ឋ គាត់មានសំណូមពរតាមរយៈអេឡិចត្រូនិកមក អញ្ជឹងតើឱ្យវាមកកកនៅត្រង់ នាយករដ្ឋមន្រ្តី ឬនាយករដ្ឋមន្រ្តី ត្រូវរកវិធីដើម្បីដោះស្រាយបញ្ហា»</strong>៕</span></p>
<p><span style="color: #000000;"><a class="thickbox" title="" href="/FileManager/Commons/2016/2/11/22-11-02-2016--15-34-21.jpg"><img src="/FileManager/Articles/mce/2016/2/11/22-11-02-2016--15-34-21.jpg" alt="" /></a></span></p>
<p> <span style="color: #000000;">* បញ្ជាក់ ៖ រូបភាព ឯកសារ</span><span style="color: #000000;"><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>
<p> </p>