<p><span style="color: #000000;"><strong>(ភ្នំពេញ)៖</strong> ក្រុមកំពុងផែស្វយ័តខេត្តព្រះសីហនុ បានបង្កភាពភ្ញាក់ផ្អើលជាខ្លាំង សម្រាប់ការប្រកួតលីគលំដាប់ទី២ League-II របស់កម្ពុជា បន្ទាប់ពីបន្ដយកឈ្នះក្រុមម្ចាស់ផ្ទះខេត្តកំពង់ស្ពឺ ដោយលទ្ធផល ១-០ ក្នុងជំនួបសន្សំពិន្ទុប្រចាំសប្ដាហ៍ទី៣ កាលពីម្សិលមិញ ដើម្បីឡើងឈរកំពូលតារាងពិន្ទុបណ្ដោះអាសន្នទៀតផង។</span></p>
<p><span style="color: #000000;">ការឈរកំពូលតារាងរបស់ក្រុមមកពីខេត្តជាប់មាត់សមុទ្រនេះ គឺក្រោយយកឈ្នះ ៣ប្រកួតផ្ទួនៗ ក្នុងនោះបានយកឈ្នះក្រុមយុវជនសាលាបាល់ទាត់ជាតិបាទី ក្រុមខេត្តកំពង់ឆ្នាំង និងក្រុមជម្រើសខេត្តកំពង់ស្ពឺ ដោយលទ្ធផល ១-០ ដូចៗគ្នា ដូច្នេះអាចនិយាយបានថា ឧបសគ្គធំនៅសល់សម្រាប់ក្រុមកំពង់ផែស្វយ័តខេត្តព្រះសីហនុ គឺមានក្រុមគិរីវង់សុខសែនជ័យ និងក្រុមអគ្គិសនី ដែលមិនទាន់បានជួប។</span></p>
<p><span style="color: #000000;">ប៉ុន្ដែយ៉ាងណាក្រុមគិរីវង់សុខសែនជ័យ ដែលបានគ្រង់តំណែងកំពូលតារាង ២សប្ដាហ៍ជាប់គ្នានោះ បានធ្លាក់មកឈរលេខ៣វិញហើយ ក្រោយប្រកួតចាញ់ក្រុមយុវជនសាលាបាល់ទាត់ជាតិបាទី ដោយលទ្ធផល ២-០ ពីម្សិលមិញ ដែលធ្វើឲ្យក្រុមតំណាងខេត្តតាកែវនេះមាន ៦ពិន្ទុជាមួយលទ្ធផល ៣ប្រកួតឈ្នះ២ និងចាញ់១។ រីឯក្រុមយុវជនសាលាបាល់ទាត់ជាតិបាទី បានស្គាល់ឈ្នះដំបូងក្នុងចំណោម ៣ប្រកួតឈ្នះ១ ស្មើ១ និងចាញ់១ មាន ៤ពិន្ទុក្នុងដៃ។</span></p>
<p><span style="color: #000000;">ចំណែកលទ្ធផល ២ប្រកួតផ្សេងទៀត នៅក្នុងសប្ដាហ៍ទី៣ នេះរួមមានក្រុមម្ចាស់ផ្ទះខេត្តកំពង់ឆ្នាំងបានយកឈ្នះក្រុមមជ្ឈមណ្ឌហ្វឹកកហ្វឺនកីឡាខេមរៈភូមិន្ទ ដោយលទ្ធផល ៤-១ ហើយនេះក៏ជាជ័យជម្នះលើកដំបូងរបស់ក្រុមជម្រើសខេត្តកំពង់ឆ្នាំងផងដែរ។ រីឯក្រុមអគ្គិសនីកម្ពុជា បានលត់ក្រុមម្ចាស់ផ្ទះខេត្តសៀមរាប ៣-០ ដើម្បីឡើងឈររៀងទី២ និងមាន ៦ពិន្ទុជាមួយនឹងលទ្ធផល ៣ប្រកួតឈ្នះ៣ និងចាញ់១៕</span></p>
<p><span style="color: #000000;"><img src="https://scontent-kul1-1.xx.fbcdn.net/v/t1.0-9/14595718_1791091207797063_924765352051288268_n.jpg?oh=4538c9424f003c3d0030ca07613f55dc&oe=589EB38F" alt="" width="730" /></span></p>
<p><span style="color: #000000;"><img src="https://scontent-kul1-1.xx.fbcdn.net/v/t1.0-9/14708146_1791091211130396_3778418440666509102_n.jpg?oh=4f81d336809e9fb109f0006ebe9361d4&oe=589E56E7" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>