<p><span style="color: #000000;"><strong>(បាត់ដំបង)៖</strong> គួរឲ្យអាសូរសម្រាប់ប្រជាពលរដ្ឋមួយគ្រួសារ ដែលប្រកបរបរដុតធ្យូង បានជួបគ្រោះអកុសល នៅល្ងាចថ្ងៃទី៣១ ខែមករា ឆ្នាំ២០១៦នេះ ដោយបុរសជាប្តី ដោយធ្លាក់ចូលក្នុងឡធ្យូង ដែលមានអណ្តាតភ្លើងយ៉ាងក្រហមឆ្អិនឆ្អៅ បណ្តាលឲ្យស្លាប់ យ៉ាងអាណោចអាធ័ម ខណៈប្រពន្ធ និងកូនរបួសធ្ងន់ នៅពេលខំជួយទាញជនរងគ្រោះមកវិញ។ ហេតុដ៏រន្ធត់មួយនេះ បានកើតឡើងនៅចំណុចអូរខ្វាត ស្ថិតក្នុងភូមិរស្មីសង្ហា ឃុំរស្មីសង្ហា ស្រុករតនមណ្ឌល ខេត្តបាត់ដំបង។</span></p>
<p><span style="color: #000000;">សមត្ថកិច្ចបានឲ្យដឹងថា បុរសជាប្ដីបាត់បង់ជីវិត ក្នុងឡធ្យូងនោះមាន ឈ្មោះ យូន ស៊ត អាយុ៤៨ឆ្នាំ រីឯស្ត្រីជាប្រពន្ធឈ្មោះ ឆែម ដេត អាយុ៤៥ឆ្នាំ និងកូនប្រុសឈ្មោះ យួន ចិត្រា អាយុ១៥ឆ្នាំ ទាំង៣នាក់ មានមុខរបជាអ្នកដុតធ្យូងលក់ រស់នៅភូមិ ឃុំកើតហេតុខាងលើ។</span></p>
<p><span style="color: #000000;">អ្នកភូមិនៅទីនោះបាននិយាយថា មុនកើតហេតុ គ្រួសាររងគ្រោះ បាននាំគ្នាទៅបើកឡ យកធ្យូងដើម្បីយកទៅលក់ ពេលនោះ បុរសជាប្តីបានទំលាយ គំរបក្នុងឡ ទាំងភ្លើងឆេះយ៉ាងសន្ធោសន្ធៅនៅឡើយ ស្រាប់តែ ត្រូវចំហេះភ្លើង ស្រូបធ្លាក់ចូលក្នុងឡ។</span></p>
<p><span style="color: #000000;">ភ្លាមៗនោះប្រពន្ធ និងកូនបាននាំគ្នា ចាប់ទាញដៃជនរងគ្រោះ ឲ្យឡើងមកលើវិញ តែដោយសារអំណាចចំហាយភ្លើងឈួលមកក្រៅខ្លាំងពេក ធ្វើឲ្យពួកគេ២នាក់ ម្តាយកូន ឆេះរលាកពេញខ្លួន ក៏របូតដៃបុរសជាប្តី ទៅក្នុងឡកំពុងតែឆេះសន្ធោសន្ធៅនោះ បណ្តាលឲ្យ ឆេះស្លាប់ទាំងរស់ ក្នុងឡដុតធ្យូងនោះទៅ។</span></p>
<p><span style="color: #000000;">ក្រោយកើតហេតុទាំងម្ដាយ និងកូនត្រូវបានបញ្ជូនតាមទៅ សង្គ្រោះបន្ទាន់នៅមន្ទីរពេទ្យខេត្ត ចំណែកសព ត្រូវបានអ្នកភូមិជួយជះទឹកនាំយកចេញពីក្នុងឡធ្យូង។ បច្ចុប្បន្នសពត្រូវបានសាច់ញាតិនិងអ្នកភូមិរៀបចំធ្វើបុណ្យតាមប្រពៃណី៕</span></p>
<p style="text-align: center;"><span style="color: #000000;"><img src="https://scontent-hkg3-1.xx.fbcdn.net/hphotos-xpa1/v/t1.0-9/12662695_464355523766807_565970399626021419_n.jpg?oh=34dceaa341bcba3e199a69bf11deeb43&oe=57437F7C" alt="" width="730" /></span></p>
<p style="text-align: center;"><span style="color: #000000;"><img src="https://scontent-hkg3-1.xx.fbcdn.net/hphotos-xft1/v/t1.0-9/12592310_464355533766806_600735008305515751_n.jpg?oh=51257001a0ec05592472b6e5866f0cc0&oe=57245645" alt="" width="730" /></span></p>
<p style="text-align: center;"><span style="color: #000000;"><img src="https://scontent-hkg3-1.xx.fbcdn.net/hphotos-xfp1/v/t1.0-9/12645059_464355510433475_8717048486615350460_n.jpg?oh=e41f2220b4153df62ddd91c0f1516e10&oe=57313BA3" alt="" width="730" /></span></p>
<p style="text-align: center;"><span style="color: #000000;"><img src="https://scontent-hkg3-1.xx.fbcdn.net/hphotos-xpf1/v/t1.0-9/12662457_464355500433476_645001538828322851_n.jpg?oh=54d9f9d068760d1a0c8297f9bcffb2dc&oe=57233BF9" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>