<div class="item-page">
<p><span style="color: #000000;"><strong>(ភ្នំពេញ)៖</strong> សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បន្ទាប់ពីបញ្ចប់ការចូលរួមជាអធិបតីក្នុងទិវាមច្ឆាជាតិ នៅខេត្តកំពង់ស្ពឺ រួចមក នៅព្រឹកថ្ងៃទី០១ ខែកក្កដានេះ សម្តេចបានអនុញ្ញាតឲ្យលោកតាអាយុ៨៩ម្នាក់ ដែលប្រកបមុខរបរ ជាអ្នករត់ស៊ីក្លូ នៅរាជធានីភ្នំពេញ ដែលមានជីវភាពខ្វះខាត ចូលជួបសំណេះសំណាល ដោយសម្រេចរាប់គ្នាជាឪពុក និងកូនធម៌ រួមទាំងចិញ្ចឹមលោកតាពេញមួយជិវិត។</span></p>
<p><span style="color: #000000;">លោកតាអាយុ៨៩ឆ្នាំខាងលើ រស់នៅភូមិសង្កែ ឃុំឈើទាល ស្រុកស្វាយជ្រុំ ខេត្តស្វាយរៀង មានកូនចំនួន៨នាក់ ដោយមកទីក្រុងភ្នំពេញ ជួលស៊ីក្លូគេរត់ក្នុងមួយថ្ងៃ ៤ពាន់រៀល រកបានចំណូលបន្តិចបន្តួច។</span></p>
<p><span style="color: #000000;">ក្នុងឱកាសជួបសំណេះសំណាលនោះ សម្តេចតេជោ ហ៊ុន សែន នាយករដ្ឋមន្ត្រី បានសុំការអនុញ្ញាតលោកតាធ្វើជាឪពុកធម៌ ហើយនៅពេលនោះ សម្តេចតេជោ និងលោកតា ក៏បានស្រុះស្រួលគ្នាសម្រេចទទួលគ្នា ជាកូននិងឪពុកធម៌ចាប់ពីថ្ងៃនេះតទៅ។ ជាពិសេសជាងនេះទៅទៀតនោះ សម្តេចតេជោ ហ៊ុន សែន នាយករដ្ឋមន្ត្រី បានធានាចិញ្ចឹមលោកតាពេញមួយជីវិត និងផ្តល់ផ្ទះទេវតា ជូនលោកតា១ខ្នងផងដែរ។</span></p>
<p><span style="color: #000000;">ក្នុងការធានាចិញ្ចឹមនោះដែរ សម្តេចតេជោ ហ៊ុន សែន បានឧបត្ថម្ភថវិកាប្រចាំខែចំនួន៥០ម៉ឺនរៀល និងអង្ករ៥០គីឡូក្រាម រួមទាំងធានានូវការព្យាបាលជំងឺ ជូនជាប្រចាំនៅពេលដែល លោកតាមានបញ្ហាសុខភាព។ </span></p>
<p><span style="color: #000000;">សូមជម្រាបថា ការអនុញ្ញាតឲ្យលោកតា ដែលរកស៊ីធាក់ស៊ីក្លូ ចូលជួបសំណេះសំណាលនេះ ធ្វើឡើងបន្ទាប់ពីលោកតា បង្ហាញនូវទុក្ខលំបាករបស់ខ្លួន ហើយត្រូវបានគេបង្ហោះលើបណ្តាញសង្គម Facebook អំពីសេចក្តីប្រាថ្នារបស់គាត់ ចង់ជួបសម្តេចតេជោ ហ៊ុន សែន ដើម្បីស្នើសុំថវិកា សាងសង់ផ្ទះ នៅឯស្រុកកំណើត។ ព័ត៌មាននេះត្រូវបានដឹងដល់សម្តេចតេជោ ហ៊ុន សែន ហើយក៏មានការរៀបចំការជួបសំណេះសំណាល និងទទួលគ្នាជាឪពុកនិងកូនធម៌នេះ៕</span></p>
<p><span style="color: #000000;"><iframe src="https://www.facebook.com/plugins/video.php?href=https%3A%2F%2Fwww.facebook.com%2Fhunsencambodia%2Fvideos%2F1043648242350339%2F&show_text=0&width=400" frameborder="0" width="730" height="600"></iframe></span></p>
<p style="text-align: left;"> </p>
</div>