<p><span style="color: #000000;"><strong>(ភ្នំពេញ)៖</strong> បន្ទាប់ពីបើកកិច្ចប្រជុំ នៅព្រឹកថ្ងៃទី០៤ ខែវិច្ឆិកា ឆ្នាំ២០១៦នេះ សមត្ថកិច្ចបានសម្រេចថា នឹងដាក់កម្លាំងជាង១ម៉ឺននាក់ ដើម្បីការពារសន្តិសុខ សណ្តាប់ធ្នាប់ ក្នុងព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ដែលចាប់ផ្តើមឡើងនៅអំឡុងពាក់កណ្តាលខែវិច្ឆិកានេះ។</span></p>
<p><span style="color: #000000;">ព្រះរាជពិធីបុណ្យអុំទូកឆ្នាំ២០១៦នេះ នឹងធ្វើឡើងរយៈពេល៣ថ្ងៃ ចាប់ពីថ្ងៃទី១៣ ដល់១៥ ខែវិច្ឆិកា ឆ្នាំ២០១៦ បន្ទាប់ពីខកខានអស់រយៈពេលច្រើនឆ្នាំ។ តាមការកត់សម្គាល់ ចាប់តាំងពីឆ្នាំ២០១១ រហូតដល់ឆ្នាំ២០១៦នេះ បុណ្យអុំទូកនៅកម្ពុជា ពុំបានរៀបចំឱ្យជាប់លាប់រាល់ឆ្នាំឡើយ ពោលទើបនឹងប្រារព្ធបានម្តងនៅឆ្នាំ២០១៤ប៉ុណ្ណោះ។ មូលហេតុដែលបណ្តាលឱ្យកម្ពុជា មិនអាចប្រារព្ធពិធីបុណុ្យអុំទូក ដ៏សប្បាយរីករាយនេះបាន ដោយសារតែគ្រោះទឹកជំនន់ គ្រោះរាំងស្ងួត និងការសោយទិវង្គតរបស់អតីតព្រះមហាក្សត្រជាដើម។</span></p>
<p><span style="color: #000000;">សូមបញ្ជាក់ថា នៅក្នុងកិច្ចប្រជុំស្តីពីការត្រៀមកម្លាំងសមត្ថកិច្ច ដើម្បីការពារបុណ្យអុំទូកនេះ មានការចូលរួមដោយ លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ និង នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ព្រំទាំងមានការចូលរួមពីសមត្ថកិច្ចពាក់ព័ន្ធជាច្រើនទៀត។</span></p>
<p><span style="color: #000000;">តាមការគ្រោងទុក នៅអំឡុងព្រះរាជពិធីបុណ្យអុំទូករយៈពេល៣ថ្ងៃ ចាប់ពីថ្ងៃទី១៣ ដល់១៥ ខែវិច្ឆិកា ឆ្នាំ២០១៦ ខាងមុខនេះ នឹងមានទូក-ង ចូលរួមប្រឡងប្រណាំងចំនួន២៥៦ទូក ហើយមានកីឡាករចូលរួមអ៊ុទូកប្រមាណ ១៦,០០០នាក់ មកពី១៦រាជធានី-ខេត្ត។ នេះបើតាមការបញ្ជាក់ពី លោក កឹម គុណវឌ្ឍ អគ្គនាយកទូរទស្សន៍ជាតិកម្ពុជា។</span></p>
<p><span style="color: #000000;">លោក កឹម គុណវឌ្ឍ បានឲ្យដឹងថា ទីកន្លែងចំណតទូកនិងកាណូត នៅពេលសម្រាកគឺត្រូវស្ថិតនៅប៉ែកខាងត្បូងស្ពានមិត្តភាពកម្ពុជា-ចិន ប្រមាណ១០០ម៉ែត្រ ឯកន្លែងប្រមូលផ្តុំនិងផ្គូរទូក ក្នុងពេលប្រកួតមានទីតាំងស្ថិតនៅប៉ែកខាងជើងត្រើយខាងកើតនៃស្ពានមិត្តភាពកម្ពុជា-ជប៉ុន។ ដោយឡែកលានទឹកប្រណាំងទូកវិញ មានបណ្តោយ១,៧០០ម៉ែត្រ ក្នុងទន្លេសាប មុខព្រះបរមរាជវាំង ហើយការប្រកួតមាន២ជើងដោយផ្លាស់ប្តូរខ្សែទឹកក្នុង-ក្រៅម្តងម្នាក់៕</span></p>
<p><span style="color: #000000;"><img src="http://image.freshnewsasia.com/2016/ID-111/fn-2016-11-04-13-34-04-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/ID-111/fn-2016-11-04-13-34-04-1.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/ID-111/fn-2016-11-04-13-34-04-2.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/ID-111/fn-2016-11-04-13-34-04-3.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/ID-111/fn-2016-11-04-13-34-04-4.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/ID-111/fn-2016-11-04-13-34-05-5.jpg" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>