<p><span style="color: #000000;"><strong>(ប៉ារីស)៖</strong> បេក្ខភាពដែលត្រៀមធ្វើការប្រកួតប្រជែង យកតំណែងប្រធានាធិបតីបារាំងនៅឆ្នាំ២០១៧ និងជាប្រធានគណបក្សរណសិរ្សជាតិ (Front National) លោកស្រី ម៉ារីន ឡឺប៉ែន (Marine Le Pen) បានអះអាងពីគោលបំណងរបស់លោកស្រី ក្នុងការរៀបចំការបោះឆ្នោតប្រជាមតិមួយស្ដីពី Frexit ឬឱ្យបារាំងចាកចេញពីសហភាពអឺរ៉ុប ព្រមទាំងចែកផ្លូវផងដែរជាមួយអង្គការ NATO ដែលលោកស្រីចាត់ទុកថាជាអង្គការហួស សម័យ។ នេះបើតាមការចេញផ្សាយដោយសារព័ត៌មាន Russian Today នៅមុននេះបន្តិចនារសៀលថ្ងៃចន្ទ ទី២៦ ខែធ្នូ ឆ្នាំ២០១៦។</span></p>
<p><span style="color: #000000;">ថ្លែងនៅក្នុងបទសម្ភាសន៍ជាមួយទស្សនាវដ្ដីក្រិក Dimokratia លោកស្រី ម៉ារីន ឡឺប៉ែន បានលើកឡើងយ៉ាងដូច្នេះថា «Frexit» គឺជាកម្មវិធីនយោបាយមួយរបស់ខ្ញុំ ហើយបើខ្ញុំជាប់ឆ្នោតនៅឆ្នាំ២០១៧ ប្រជាជនបារាំងគួរតែមានឱកាសបោះឆ្នោតដើម្បីរំដោះខ្លួនពីភាពជាទាសករ និងការគំរាមកំហែងពីសំណាក់អ្នកនយោបាយ ព្រុចសែល (សហភាពអឺរ៉ុប) ក៏ដូចជាដើម្បីស្វែងរកដែនអធិបតេយ្យភាពប្រទេសរបស់យើងមកវិញ»។ </span><br /><span style="color: #000000;">ឆ្លើយតបនឹងសំណួរពាក់ព័ន្ធនឹងអង្គការ NATO លោកស្រី ម៉ារីន ឡឺប៉ែន បានឆ្លើយដោយគ្មានការស្ទាក់ស្ទើរថា<strong> «អង្គការ NATO ត្រូវបានបង្កើតឡើងនៅចំពេលដែលកត្តិកសញ្ញាវ៉ាសូវី ទទួលរងការគំរាមកំហែង និងការពង្រីកឥទ្ធិពលនៃលិទ្ធិកុម្មុយនីស្ដរបស់អតីតសហភាពសូវៀត ក៏ប៉ុន្តែនៅពេលបច្ចុប្បន្នលែងមានហើយ សហភាពសូវៀត និងកត្តិកសញ្ញាវ៉ាសូវី ដូច្នេះបារាំងមិនចាំបាច់អី្វត្រូវបន្តនៅជាសមាជិកអង្គការ NATO ខណៈសហរដ្ឋអាមេរិកកំពុងរក្សាវត្តមានអង្គការ NATO នៅអឺរ៉ុបដើម្បីបម្រើផលប្រយោជន៍ផ្ទាល់ខ្លួន»</strong>។</span></p>
<p><span style="color: #000000;">គួរបញ្ជាក់ថាលោកស្រី ម៉ារីន ឡឺប៉ែន ជាបេក្ខភាពម្នាក់ដែលនឹងត្រូវចូលរួមប្រកួតប្រជែងជាមួយ អតីតនាយករដ្ឋមន្ត្រីបារំាងលោក ហ្រ្វង់ស័រ ហ្វីយ៉ុង និងបេក្ខភាពមិនទាន់ជ្រើសរើសម្នាក់ទៀតមកពីគណបក្សសង្គមនិយមរបស់ប្រធានាធិបតីបារំាង លោក ហ្រ្វង់ស័រ ហូឡង់ នៅក្នុងការបោះឆ្នោតជ្រើសរើសប្រធានាធិបតីបារាំងនៅ ខែឧសភា ឆ្នាំ២០១៧៕</span></p>
<p><span style="color: #000000;"><br /><a class="thickbox" title="" href="/FileManager/Commons/2016/12/26/13b-26-12-2016--16-11-09.jpg"><img src="/FileManager/Articles/mce/2016/12/26/13b-26-12-2016--16-11-09.jpg" alt="" /></a></span></p>
<p style="text-align: right;"><br /><span style="color: #000000;">ប្រភព ៖ អ័រតេ</span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>