<p><span style="color: #000000;"><strong>(ម៉ានីល)៖</strong> ប្រធានាធិបតីហ្វីលីពីន លោក រ៉ូឌ្រីហ្គោ ឌូធើតេ ចាប់ផ្ដើមបន្ធូរបន្ថយភាពតានតឹងជាមួយ សហរដ្ឋអាមេរិកតាមរយៈការបកស្រាយឡើងវិញ ពាក់ព័ន្ធនឹងការផ្តាច់ខ្លួនពីទីក្រុងវ៉ាស៊ីនតោន ដែលលោកផ្ទាល់បានលើកឡើង នៅក្នុងឱកាសបំពេញដំណើរទស្សនកិច្ច ក្នុងទីក្រុងប៉េកំាងប្រទេសចិន មុននឹងផ្ដើមធ្វើទស្សនកិច្ចផ្លូវរដ្ឋរយៈពេល៣ថ្ងៃ ចាប់ពីថ្ងៃអង្គារនេះ ទៅកាន់ប្រទេសជប៉ុនដែលកំពុង ព្រួយបារម្ភក្រែងលោហ្វីលីពីន ដើរចេញពីសហរដ្ឋអាមេរិក រួចងាកទៅរកចិនមែន។ នេះបើយោងតាម ការចុះផ្សាយរបស់សារព័ត៌មាន Channel News Asia នៅព្រឹកថ្ងៃអង្គារ ទី២៥ ខែតុលា ឆ្នាំ២០១៦។</span></p>
<p><span style="color: #000000;"><a class="thickbox" title="" href="/FileManager/Commons/2016/10/25/09j-25-10-2016--11-22-42.jpg"><img src="/FileManager/Articles/mce/2016/10/25/09j-25-10-2016--11-22-42.jpg" alt="" /></a><br /></span></p>
<p><span style="color: #000000;">យោងតាមសារព័ត៌មានជប៉ុន Kyodo លោក ឌូធើតេ បានគូសបញ្ជាក់ថា <strong>«វាគ្មានអ្វីគួរឱ្យបារម្ភនោះទេអំពីការ ផ្លាស់ប្ដូរសម្ព័ន្ធភាពព្រោះថាខ្ញុំមិនត្រូវការសម្ព័ន្ធភាពជាមួយប្រជាជាតិដទៃទៀតទេ។ ម្យ៉ាងទៀតកាលដែល ខ្ញុំនិយាយថាចែកផ្លូវគ្នាជាមួយសហរដ្ឋអាមេរិក គ្រាន់តែជាគំនិតផ្ទាល់ខ្លួនរបស់ខ្ញុំតែប៉ុណ្ណោះ ពោលគឺមិនមែន ជាការនិយាយក្នុងនាមតំណាងឱ្យរដ្ឋាភិបាលហ្វីលីពីននោះទេ»</strong>។</span></p>
<p><span style="color: #000000;">យ៉ាងណាក៏ដោយកាសែតជប៉ុន The Yomiuri newspaper បានរាយការណ៍ថា លោក ឌូធើតេ នៅតែប្រកាន់ជំហរចង់បញ្ឈប់ការធ្វើសមយុទ្ធ យោធារួមគ្នាជាមួយសហរដ្ឋអាមេរិក ព្រមទំាងបញ្ចប់កិច្ចព្រមព្រៀងសហប្រតិបត្តិការយោធា ដែលជាផែនការដ៏សំខាន់របស់ទីក្រុងវ៉ាស៊ីនតោននៅក្នុងតំបន់អាស៊ី ប្រឈមមុខនឹងការកើនឡើងនៃឥទ្ធិពលរបស់ចិន។</span></p>
<p><span style="color: #000000;">គួរបញ្ជាក់ថា លោកឌូធើតេ នឹងផ្ដើមធ្វើទស្សនកិច្ចផ្លូវរដ្ឋរយៈពេលបីថ្ងៃទៅកាន់ប្រទេសជប៉ុន នៅថ្ងៃអង្គារនេះ ហើយបើតាមគំរោងលោកនឹងជួបពិភាក្សាការងារ ជាមួយនាយករដ្ឋមន្ត្រីជប៉ុន លោក ស៊ីន ហ្សូអាបេ នៅថ្ងៃ ពុធ ស្អែកនេះ ខណៈដែលប្រជាជាតិជប៉ុនទាំងមូលមានការចាប់អារម្មណ៍ចំពោះលោក ឌូធើតេ តាមរយៈការ ចុះផ្សាយព័ត៌មានតាមកាសែតនិងទូរទស្សន៍ស្ទើរមិនលោះថ្ងៃឡើយ៕</span></p>
<p><br /><br /></p>
<p style="text-align: right;"><span style="color: #000000;">ប្រភព ៖ CNA</span></p>