<div>
<p><span style="color: #000000;"><strong>(ភ្នំពេញ)៖</strong> គ្រូបង្វឹកជនជាតិស្វីសលោក Sam Schweingruber បានវិលត្រឡប់មកដឹកនាំក្រុមភ្នំពេញក្រោនវិញហើយ បន្ទាប់ពីសម្រាកព្យាបាលរបួស ដែលលោកជួបគ្រោះថ្នាក់ចរាចរណ៍ អស់រយៈពេលជិត២ខែកន្លងទៅ ។</span></p>
<p><span style="color: #000000;">លោក លី ហៀង អគ្គលេខាធិការក្លឹបភ្នំពេញក្រោន បានឲ្យដឹងថា ដំណើរវិលត្រឡប់របស់លោក Sam Schweingruber គឺជាមោទនភាពមួយ សម្រាប់ក្លឹបជើងឯក៦សម័យកាលនេះ ហើយក៏ជាក្ដីសង្ឃឹម ដើម្បីការពារតំណែងជើងឯកលីកកំពូលកម្ពុជា នារដូវកាលថ្មីផងដែរ ។ ជាពិសេសអ្នកគាំទ្ររបស់ក្លឹបភ្នំពេញក្រោន បានសម្ដែងការសប្បាយចិត្តជាខ្លាំង ចំពោះការបង្ហាញវត្តមានរបស់គ្រូបង្វឹកជនជាតិស្វីសរូបនេះ ។</span></p>
<p><span style="color: #000000;">លោក លី ហៀង បានបញ្ជាក់ទៀតថា លោក Sam នឹងដឹកនាំក្រុមភ្នំពេញក្រោន ក្នុងនាមជាគ្រូបង្គោលធម្មតាវិញ នៅពេលរបួសលោកជាសះស្បើយ ១០០% ប៉ុន្ដែពេលនេះលោកគ្រាន់តែចូលរួមផ្ដល់យោបល់ជាមួយលោក Oriol Mohedano គ្រូបង្វឹកថ្មី ដែលក្លឹបទើបតែងតាំងកាលពីពេលថ្មីៗកន្លងទៅសិន ។ ប៉ុន្ដែនៅពេលលោក Sam មានលទ្ធភាពដឹកនាំក្រុម ១០០% ហើយនោះ គ្រូបង្វឹកជនជាតិអេស្ប៉ាញលោក Oriol Mohedano នឹងក្លាយជាគ្រូជំនួយវិញ ។</span></p>
<p><span style="color: #000000;">អគ្គលេខាធិការដដែល បានសង្កត់ធ្ងន់ថា ទោះជាយ៉ាងណាការបង្ហាញវត្តមានដឹកនាំក្រុមភ្នំពេញក្រោនរួមគ្នារវាងលោក Sam និងលោក Oriol Mohedano ដែលជាគ្រូបង្វឹកពោរពេញដោយបទពិសោធន៍ នារដូវកាលថ្មីនេះ នឹងធ្វើឲ្យភ្នំពេញក្រោន មានសមត្ថភាពកាន់តែអស្ចារ្យ ដើម្បីប្រកួតប្រជែងពានរង្វាន់ផ្សេងៗ ពិសេសគឺការប្រកួតបាល់ទាត់ក្របខណ្ឌលីកកំពូលកម្ពុជា និងពានរង្វាន់សម្ដេចតេជោ ហ៊ុន សែន លើកទី១០ ក្នុងឆ្នាំ២០១៦ នេះតែម្ដង ។</span></p>
<p><span style="color: #000000;">គួរបញ្ជាក់ថា កាលពីចុងឆ្នាំ២០១៥ កន្លងទៅ បន្ទាប់ពីជួយក្រុមភ្នំពេញក្រោន លើកពានលីកកំពូលកម្ពុជា ជាលើកទី៦ លោក Sam Schweingruber បានជួបគ្រោះថ្នាក់ចរាចរណ៍ ធ្វើឲ្យលោកអវត្តមានមិនអាចដឹកនាំក្រុមបានឡើយ ។ ជាមួយគ្នានោះ លោកត្រូវបានបញ្ជូនទៅព្យាបាលនៅប្រទេសថៃ និងស្វីសទៀតផង ប៉ុន្ដែឥឡូវនេះ របួសរបស់លោកបានជាសះស្បើយ ហើយលោកក៏បានវិលមកកាន់កីឡដ្ឋាន RSN ដើម្បីដឹកនាំក្រុមភ្នំពេញក្រោនបន្ដផងដែរ ៕</span></p>
<p style="text-align: center;"><span style="color: #000000;"><img src="https://scontent-hkg3-1.xx.fbcdn.net/hphotos-xtp1/v/t1.0-9/12662705_1048530798533011_1444859834973572754_n.jpg?oh=25f1398e75fccf9c95f10c22f4269ea9&oe=5769E9C1" alt="" width="730" /></span></p>
<p style="text-align: center;"><span style="color: #000000;">លោក Sam Schweingruber</span></p>
<p style="text-align: center;"><span style="color: #000000;"><img src="https://scontent-hkg3-1.xx.fbcdn.net/hphotos-xfp1/v/t1.0-9/12662499_1048530805199677_8276720556319785044_n.jpg?oh=cb2232fc622f8f4d971e50f4f0b74beb&oe=5729959D" alt="" width="730" /></span></p>
<p style="text-align: center;"><span style="color: #000000;">ក្រុមកីឡាករភ្នំពេញក្រោន</span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>
</div>