<p><span style="color: #000000;"><strong>អាការៈទាំងឡាយនៃប្រព័ន្ធសរសៃប្រសាទចុះខ្សោយ គឺបង្ហាញឱ្យឃើញលក្ខណៈផ្សេងៗគ្នា អាស្រ័យទៅលើ ផ្នែកណាមួយនៃប្រព័ន្ធនោះត្រូវបានរងនូវផលប៉ះពាល់ ដែលអាចមានកម្រិតស្រាល ឬកម្រិតធ្ងន់ធ្ងរ។ អាការៈទាំងឡាយ ដែលអាចបង្ហាញថា ប្រព័ន្ធសរសៃប្រសាទចុះខ្សោយនោះរួមមានដូចជា ដកដង្ហើមបានខ្លីៗ ឈឺក្បាល បែកញើសច្រើន ខ្សោយសាច់ដុំ មានការចងចាំមិនល្អ ពិបាកផ្ដោតអារម្មណ៍ ឈឺចាប់ ស្ពឹកស្រពន់ និងមានអារម្មណ៍ថាក្ដៅ ដៃ និងជើង។ ដើម្បីកាត់បន្ថយហានិភ័យ នៃការរងវិបត្ដិពីប្រព័ន្ធសរសៃប្រសាទចុះខ្សោយ វាជារឿងចាំបាច់ ដែលអ្នកត្រូវទទួលខុសត្រូវចំពោះសុខភាពរាងកាយរបស់អ្នក។ ការគ្រាន់តែផ្លាស់ប្ដូរទម្លាប់រស់នៅប្រចាំថ្ងៃ ផ្លាស់ប្ដូររបបអាហារ និងប្រើវិធីធម្មជាតិមួយចំនួន អ្នកក៏អាចពង្រឹងប្រព័ន្ធសរសៃប្រសាទរបស់អ្នកឱ្យរឹងមាំ និងដឹកនាជីវិតប្រកបដោយសុខភាពល្អបានដែរ។ ខាងក្រោមនេះ </strong><strong>CamNews សូមណែនាំនូវវិធី ៣ យ៉ាង ដើម្បីជួយឱ្យប្រព័ន្ធសរសៃប្រសាទរបស់អ្នករឹងមាំ៖</strong></span></p>
<p><span style="color: #000000;"><strong>១. ដកដង្ហើមឱ្យបានវែងៗ៖ </strong>ការដកដង្ហើមបានវែងៗគឺជាវិធីងាយៗក្នុងការអនុវត្ដ ប៉ុន្ដែវាជាទិកនិកដ៏មានប្រសិទ្ធភាពក្នុងការដោះស្រាយបញ្ហាប្រព័ន្ធសរសៃប្រសាទខ្សោយ។ វាអាចជួយឱ្យអ្នកមានអារម្មណ៍សម្រាកសម្រាន្ដ និងកាត់បន្ថយស្រ្ដេស។ លើសពីនេះទៀត ការដកដង្ហើមបានវែងៗលើកកម្ពស់សមត្ថភាពព្យាបាលរោគឱ្យជាសះស្បើយរបស់រាងកាយ និងជួយទប់ស្កាត់ឥទ្ធិពលនៃស្រ្ដេស និងការព្រួយចិត្ដ។</span></p>
<p><span style="color: #000000;"><br /><a class="thickbox" title="" href="/FileManager/Commons/2021/5/5/deep-breathing-05-05-2021--11-54-46.jpg"><img src="/FileManager/Articles/mce/2021/5/5/deep-breathing-05-05-2021--11-54-46.jpg" alt="" /></a><br /></span></p>
<ul>
<li><span style="color: #000000;">សូមទម្រេតខ្លួនឱ្យបានស្រួល ឬអង្គុយនៅក្នុងចលនាដ៏ល្អប្រសើរមួយ ដោយដាក់ដៃទាំងពីររបស់អ្នកនៅលើពោះ។</span></li>
<li><span style="color: #000000;">សូមដកដង្ហើមឱ្យបានវែងៗតាមច្រមុះរបស់អ្នក ដោយបញ្ឈរខ្លួនរបស់អ្នកឱ្យត្រង់ ហើយបន្ទាប់មកហឺតចូលទៅវិញ។</span></li>
<li><span style="color: #000000;">ទប់ខ្យល់ដង្ហើមរបស់អ្នកឱ្យបាន ៣វិនាទី បន្ទាប់មកដកដង្ហើមចេញក្រៅយឺតៗតាមមាត់របស់អ្នក និងបញ្ចេញខ្យល់ឱ្យអស់ពីសួតរបស់អ្នក។</span></li>
<li><span style="color: #000000;">បន្ដដកដង្ហើមចេញ និងចូលឱ្យបានវែងៗ រយៈពេល ៥ ទៅ ១០នាទី។</span></li>
<li><span style="color: #000000;">សូមរីករាយក្នុងការអនុវត្ដការដកដង្ហើមវែងៗនេះ ឱ្យបានពីរ ឬបីដងក្នុងមួយថ្ងៃ។</span></li>
</ul>
<p> </p>
<p><br /><a class="thickbox" title="" href="/FileManager/Commons/2021/5/5/woman-sunbathing-on-a-tropical-beach-05-05-2021--11-55-06.jpg"><img src="/FileManager/Articles/mce/2021/5/5/woman-sunbathing-on-a-tropical-beach-05-05-2021--11-55-06.jpg" alt="" /></a></p>
<p><span style="color: #000000;"><strong>២. ពន្លឺព្រះអាទិត្យ៖ </strong>ពន្លឺព្រះអាទិត្យមានប្រសិទ្ធភាពជួយគ្រប់គ្រងប្រព័ន្ធសរសៃប្រសាទ ដែលជួយឱ្យរាងកាយផលិតចេញនូវវីតាមីនD។ ការសិក្សាស្រាវជ្រាវមួយកាលពីឆ្នាំ ២០១៣ ចុះផ្សាយនៅក្នុងរបាយការណ៍ឱសថចលនាសាស្រ្ដបានបង្ហាញ ពីទំនាក់ទំនងរវាងភាពកង្វះវីតាមីនD និងការធ្លាក់ចុះនូវជំងឺនៃប្រព័ន្ធសរសៃប្រសាទកណ្ដាល(ខួរក្បាល និងខួរឆ្អឹងខ្នង) ជាពិសេសជំងឺវិកលចរិត និងជំងឺ multiple sclerosis។</span></p>
<ul>
<li><span style="color: #000000;">សូមឱ្យរាងកាយរបស់អ្នកប៉ះនឹងពន្លឺព្រះអាទិត្យ នាពេលព្រឹកព្រលឹមស្រាងៗ ដោយមិនចាំបាច់ប្រើក្រែមការពារពន្លឺព្រះអាទិត្យប្រភេទ Sunscreen នោះទេ ឱ្យបាន ១០ ទៅ ១៥នាទីរាល់ថ្ងៃ ដើម្បីលើកកម្ពស់កម្រិតវីតាមីនD នៅក្នុងរាងកាយរបស់អ្នក។</span></li>
<li><span style="color: #000000;">ម្យ៉ាងទៀត អ្នកអាចទទួលបានវីតាមីនD ពីប្រភេទអាហារមួយចំនួនដូចជា ត្រីសាម៉ុន ត្រីទូណា ទឹកដោះគោ ស៊ុត និងធញ្ញជាតិសម្រាប់អាហារពេលព្រឹក ដែលសម្បូរទៅដាយវីតាមីនD។ អ្នកអាចប្ដូរជម្រើសទៅប្រើឱសថបង្រ្គប់ជាតិវីតាមីនD បាន ក្រោយការប្រឹក្សាជាមួយវេជ្ជបណ្ឌិត។</span></li>
</ul>
<p><span style="color: #000000;"><strong> </strong></span></p>
<p><span style="color: #000000;"><strong>៣. ជាតិម៉ាញ៉េស្យូម៖ </strong>ម៉ាញ៉េស្យូម គឺជាសារធាតុរ៉ែដ៏សំខាន់មួយប្រភេទ សម្រាប់ញ៉ាំងឱ្យប្រព័ន្ធសរសៃប្រសាទមានសុខភាពល្អ។ ភាពកង្វះសារធាតុរ៉ែប្រភេទនេះ មានឥទ្ធិពលរារាំងនូវធាតុ Neurotransmitter ដែលទ្រទ្រង់ការបញ្ជូនសញ្ញារវាងកោសិកាសរសៃប្រសាទ។ លើសពីនេះទៀត វាជំនួយដល់ការផលិតចេញនូវសារធាតុ Serotonin របស់រាងកាយ ដែលមានប្រសិទ្ធភាពជួយឱ្យប្រព័ន្ធសរសៃប្រសាទបានសម្រាក និងជួយឱ្យមានអារម្មណ៍ល្អ ព្រមទាំងជួយលើកកម្ពស់ឱ្យសាច់ដុំបានសម្រាកផងដែរ។</span></p>
<p><span style="color: #000000;"><br /><a class="thickbox" title="" href="/FileManager/Commons/2021/5/5/523070689-h-05-05-2021--11-55-25.jpg"><img src="/FileManager/Articles/mce/2021/5/5/523070689-h-05-05-2021--11-55-25.jpg" alt="" /></a><br /></span></p>
<ul>
<li><span style="color: #000000;">សូមពិសាអាហារ ដែលសម្បូរដោយជាតិម៉ាញ៉េស្យូមដូចជា ស្ករសូកូឡាពណ៌ខ្មៅ ស្លឹកផ្ទី សាឡាដ ចេក គ្រាប់អាល់ម៉ិន អង្ករសម្រូប និងគ្រាប់ល្ពៅ។</span></li>
<li><span style="color: #000000;">ម្យ៉ាងទៀត អ្នកក៏អាចជ្រើសមកប្រើឱសថបង្រ្គប់ជាតិម៉ាញ៉េស្យូមបានដែរ ប៉ុន្ដែត្រូវប្រឹក្សាជាមួយវេជ្ជបណ្ឌិត ដើម្បីឱ្យការប្រើឱសថនេះបានត្រឹមត្រូវល្អ៕</span></li>
<li><span style="color: #000000;"><a class="c_tab" href="http://facelinecambodia.com/" target="_blank"><img src="/FileManager/Articles/mce/2021/5/5/faceline-with-food-penda-3-05-05-2021--11-55-59.jpg" alt="" /></a><br /></span></li>
</ul>
<p> </p>
<p><span style="color: #000000;">ប្រែសម្រួល៖ សារ៉ាត</span></p>
<p><span style="color: #000000;">ប្រភព៖ top10homeremedies</span></p>
<p> </p>
<p> </p>
<p> </p>