<p><span style="color: #000000;"><strong>(ប៉េកាំង)៖</strong> ប្រធានក្រុមហ៊ុនប្រព័ន្ធទំនាក់ទំនងសង្គម Twitter ប្រចាំប្រទេសចិន បានប្រកាសលាឈប់ បន្ទាប់ពីការកាន់ដំណែង ទើបតែបានរយៈពេល ៨ខែ ដែលនេះជាករណីលាឈប់ថ្មីមួយ ក្នុងពេលដែលពិភពលោក កំពុងចាប់ផ្តើមទទួលស្គាល់ ប្រព័ន្ធទំនាក់ទំនងសង្គមមួយនេះ។</span></p>
<p><span style="color: #000000;">ការលាលែងរបស់នាយកប្រតិបត្តិរូបនេះ ត្រូវបានធ្វើឡើង បន្ទាប់ពីក្រុមហ៊ុននេះ បានប្រកាសកាលពីខែតុលា អំពីការខាតបង់របស់ខ្លួន។ ប្រាក់ចំណេញបានក្លាយជា បញ្ហាប្រឈមមួយ សម្រាប់ប្រព័ន្ធ ទំនាក់ទំនងសង្គមមួយនេះ ដោយប្រាក់ចំណូល បានកើនឡើងយឺតបំផុត។</span></p>
<p><span style="color: #000000;">ក្នុងសារមួយ ដែលសរសេរឡើង កាលពីថ្ងៃទី៣១ ខែធ្នូ កន្លងទៅនេះ ប្រធានគ្រប់គ្រងក្រុមហ៊ុន ប្រចាំប្រទេសចិន លោកស្រី Kathy Chen បានប្រកាសពីការចាកចាញរបស់ខ្លួន ប៉ុន្តែបញ្ជាក់ថា ការិយាល័យក្រុមហ៊ុន Twitter ប្រចាំទីក្រុងហុងកុង នៅតែបន្តបើកទ្វា។</span></p>
<p><span style="color: #000000;">គួររំលឹកផងដែរថា ប្រព័ន្ធ Twitter ក្នុងប្រទេសចិន ត្រូវបានបិទ ចាប់តាំងពីឆ្នាំ២០០៩ មកម្ល៉េះ។ លោកស្រី Chen ត្រូវបានគេតែងតាំង ដើម្បីជួយអូសទាញអតិថិជនចិន ដែលត្រូវការផ្សព្វផ្សាយ ពាណិជ្ចកម្មបន្ថែម។ ការតែងតាំងលោកស្រី បានរងការរិះគន់ជាខ្លាំង ដោយសារកន្លងមក លោកស្រី ធ្លាប់បម្រើការងារ ដែលជាប់ពាក់ព័ន្ធនឹងវិស័យយោធា។ អ្នករិះគន់បានលើកឡើងថា សារដែលនាងបង្ហោះម្តងៗ ហាក់ឆ្លុះបញ្ជាំងពីភាពទន់ខ្សោយ ក្នុងទំនាក់ទំនងជាមួយក្រុមការងារ Twitter និងភាពគ្មានឆន្ទៈ ក្នុងការធ្វើកិច្ចសហប្រតិបត្តិការ ជាមួយសារព័ត៌មាន ដែលស្ថិតក្រោមការគ្រប់គ្រង របស់រដ្ឋាភិបាលចិន។</span></p>
<p><span style="color: #000000;">ក្នុងសារទាំងនោះ ហាក់មិនបង្ហាញពី ការពង្រីកយុទ្ធសាស្ត្រ Twitter ឬការបង្កើតកិច្ចខិតខំប្រឹងប្រែងណាមួយ ក្នុងការជម្រុញធ្វើយ៉ាងណា ឱ្យប្រព័ន្ធទំនាក់ទំនងនេះ អាចប្រើប្រាស់ ដោយសេរីក្នុងប្រទេសចិន វិញនោះឡើយ។ តែនាងធ្លាប់បានសរសេរថា ប្រព័ន្ធ Twitter នៅតែបន្តប្តេជ្ញា បម្រើលើកិច្ចការ ជម្រុញទីផ្សារប្រទេសចិន និងផ្តោតការយកចិត្តដាក់ ក្នុងការបម្រើដល់អតិថិជន បំណងចង់ប្រលូកក្នុងទីផ្សារអន្តរជាតិ។</span></p>
<p><span style="color: #000000;">នៅក្នុងប្រព័ន្ធ Twitter កាលពីចុងសប្តាហ៍នេះ លោកស្រី Chen បានបញ្ជាក់ថា បន្ទាប់ពីការលាលែង នាងនឹងប្រើប្រាស់ពេលវេលា ដើម្បីបង្កើនថាមពលជាថ្មី សិក្សាបន្ថែមអំពីវប្បធម៌អន្តរជាតិ និងជម្រុញឱកាសរបស់ខ្លួន ក្នុងវិស័យពាណិជ្ចកម្មអន្តរជាតិ៕</span></p>
<p><span style="color: #000000;"><img src="http://image.freshnewsasia.com/2016/ID-113/fn-2017-01-04-09-51-33-0.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>