<p><span style="font-size: 12px; color: #000000;">សកម្មជនម្នាក់ បាននិយាយថា ក្មេងស្រីអាយុ ១០ ឆ្នាំម្នាក់ហូរឈាមរហូតដល់ស្លាប់ ក្រោយអនុវត្ដប្រពៃណីច្រឹបស្បែកទ្វារមាស នៅក្នុងប្រទេសសូម៉ាលី ជាមរណភាពដ៏កម្រមួយនៅក្នុងប្រទេស ដែលអនុវត្ដប្រពៃណីនេះក្នុងអត្រាខ្ពស់បំផុត នៅក្នុងពិភពលោក។</span></p>
<p><span style="color: #000000;">អ្នកស្រី Hawa Aden Mohamed បម្រើការនៅមជ្ឈមណ្ឌលអប់រំដើម្បីសន្ដិភាព និងការអភិវឌ្ឍន៍ Galkayo បាននិយាយ នៅក្នុងសេចក្ដីថ្លែងការណ៍មួយថា ក្មេងស្រីដ៏កំសត់នោះ បានស្លាប់នៅក្នុងមន្ទីរពេទ្យ កាលពីថ្ងៃចន្ទ ក្រោយម្ដាយរបស់នាង បានយកនាងទៅច្រឹបប្រដាប់ភេទតាមប្រពៃណីទំនៀមទម្លាប់ នៅក្នុងភូមិដាច់ស្រយាលមួយ ក្រៅទីក្រុង Dhusamareb ភាគកណ្ដាលរដ្ឋ Galmudug ។</span></p>
<p><span style="color: #000000;">អ្នកស្រី Mahamed និយាយថា៖ “ការអនុវត្ដច្រឹបប្រដាប់ភេទ ត្រូវបានគេសង្ស័យថា បានកាត់ត្រូវចំសរសៃឈាមដ៏សំខាន់មួយ នៅអំឡុងប្រតិបត្ដិការកាត់ច្រឹបនោះ”។</span></p>
<p><span style="color: #000000;">ស្រ្ដី និងក្មេងស្រីចំនួនប្រហែល ៩៨ ភាគរយ នៅអាហ្រ្វីក បានអនុវត្ដប្រពៃណីច្រឹបប្រដាប់ភេទ នេះបើយោងតាមការឱ្យដឹងរបស់អង្គការសហប្រជាជាតិ។ ខណៈដែល រដ្ឋធម្មនុញ្ញសូម៉ាលី ហាមប្រាមចំពោះការអនុវត្ដប្រពៃណីនេះ អ្នកស្រី Mohamed បាននិយាយថា ពុំមានច្បាប់ណាមួយអនុម័ត ដើម្បីធ្វើឱ្យជាក់ប្រាកដថា បុគ្គលដែលអនុវត្ដប្រពៃណីច្រឹបប្រដាប់ភេទនេះ ត្រូវផ្ដន្ទាទោសនោះទេ។</span></p>
<p><span style="color: #000000;">អ្នកស្រី បន្ថែមថា៖ “អ្នកបង្កើតច្បាប់ទាំងឡាយ ខ្លាចបាត់បង់អំណាចនយោបាយ នៅក្នុងក្រុមអ្នកអភិរក្សប្រពៃណី និងសាសនាដ៏មានឥទ្ធិពលទាំងអស់ ដូច្នេះទើបពួកគេ បង្អោនទៅរក្សាការអនុវត្ដប្រពៃណីនោះ”។</span></p>
<p><span style="color: #000000;"><a class="thickbox" title="" href="/FileManager/Commons/2018/7/21/36-21-07-2018--10-42-19.PNG"><img src="/FileManager/Articles/mce/2018/7/21/36-21-07-2018--10-42-19.PNG" alt="" /></a><br /></span></p>
<p><span style="color: #000000;">បុគ្គលិកផ្នែកសុខាភិបាល បានប្រមានពីគ្រោះថ្នាក់នៃការអនុវត្ដប្រពៃណីច្រឹបប្រដាប់ភេទ ដែលក្នុងករណីភាគច្រើន ស្បែកទ្វារមាសផ្នែកខាងក្រៅត្រូវច្រឹបចេញ ហើយទ្វារមាសទៀតសោត ត្រូវបានគេដេរស្ទើរតែជិតទៅទៀត។</span></p>
<p><span style="color: #000000;">អគ្គលេធិការអង្គការសហប្រជាជាតិលោក Antonio Gutterres បាននិយាយកាលដើមឆ្នាំនេះថា៖ “ស្រ្ដី និងក្មេងស្រីជាង ២០០ លាននាក់ នៅ ៣០ ប្រទេសក្នុងទ្វីបចំនួន ៣ ធ្លាប់អនុវត្ដប្រពៃណីច្រឹបប្រដាប់ភេទនេះ ដោយលោកបានហៅការអនុវត្ដនេះថា ជាការរំលោភសិទ្ធិស្រ្ដី និងក្មេងស្រីដ៏កំរោល”។</span></p>
<p><span style="color: #000000;">គម្រោងមូនិធិពលរដ្ឋរបស់អង្គការសហប្រជាជាតិ បានប៉ាន់ប្រមាណថា កេ្មងស្រីប្រមាណ ៣,៩ លាននាក់ គឺជាកម្មវត្ថុនៃការកាត់ច្រឹបប្រដាប់ភេទជារៀងរាល់ឆ្នាំ ហើយប្រសិនបើពុំមានចាត់វិធានការអ្វីទេនោះ ចំនួននេះ នឹងកើនឡើងដល់ ៤,៦ លាននាក់នៅឆ្នាំ ២០៣០ ដោយសារតែកំណើនប្រជាពលរដ្ឋ ៕</span></p>
<p><span style="color: #000000;"><a class="c_tab" href="http://mekongnet.com.kh/pages/SpecialOfferCamnews.aspx" target="_blank"><img src="/FileManager/Articles/mce/2018/7/21/mekongnet-21-07-2018--10-42-29.PNG" alt="" /></a></span></p>
<p style="text-align: right;"><span style="color: #000000; font-size: 12px; text-align: right;">ប្រែសម្រួល៖ សារ៉ាត</span></p>
<p style="text-align: right;"><span style="color: #000000; font-size: 12px;">ប្រភព៖ news.com.au</span></p>