<p><span style="color: #000000;">ភ្នំពេញ៖ ក្រសួងអភិវឌ្ឍន៍ជនបទ បានឲ្យដឹងថា គិតមកដល់បច្ចុប្បន្ន ប្រជាពលរដ្ឋរស់នៅតំបន់ជនបទជាង ៣០ភាគរយ នៅពុំទាន់ទទួលបានទឹកស្អាតប្រើប្រាស់នៅឡើយទេ។</span></p>
<p><span style="color: #000000;">ក្នុងទិវាទឹកពិភពលោកលើកទី២៦ នៅរាជធានីភ្នំពេញ កាលពីព្រឹកមិញ លោក នួន ដាញ៉ិល រដ្ឋលេខាធិការក្រសួងអភិវឌ្ឍន៍ជនបទ បានលើកឡើងថា បច្ចុប្បន្ន ប្រជាពលរដ្ឋនៅសហគមន៍ជនបទ បានទទួលសេវាទឹកស្អាតចំនួន ៦៨ភាគរយហើយ ប៉ុន្តែនៅសល់ជាង៣០ភាគរយទៀត នៅពុំទាន់មានទឹកស្អាតប្រើប្រាស់ ដែលទាមទារឲ្យភាគីពាក់ព័ន្ធទាំងអស់ ចូលរួមសហការជាមួយក្រសួងបន្ថែមទៀត ដើម្បីដោះស្រាយបញ្ហានេះ។</span></p>
<p><span style="color: #000000;">លោកថា៖ «បើសិនជាសកម្មភាពនៃការផ្គត់ផ្គង់ទឹកស្អាតមិនត្រូវបានបង្កើនឡើងទេ នោះចំនួនប្រជាពលរដ្ឋដែលគ្មានទឹកស្អាតប្រើប្រាស់ នឹងមានចំនួនកើនឡើងជាលំដាប់នៅឆ្នាំខាងមុខៗទៀត ហើយចំនួនប្រជាពលរដ្ឋដែលស្លាប់ដោយសារទឹកគ្មានសុវត្ថិភាព ក៏នឹងកើនឡើងយ៉ាងឆាប់រហ័សផងដែរ»។</span></p>
<p><span style="color: #000000;">តែយ៉ាងណា លោកថា ដើម្បីដោះស្រាយបញ្ហាទឹកស្អាតសម្រាប់ប្រជាពលរដ្ឋប្រើប្រាស់នេះ រាជរដ្ឋាភិបាល ក៏បានដាក់ចេញនូវគោលនយោបាយជាតិ ស្តីពីការផ្គត់ផ្គង់ទឹកស្អាត និងអនាម័យជនបទ ដោយថា នៅឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទ ត្រូវទទួលបានសេវាផ្គត់ផ្គត់ទឹកស្អាត និងអនាម័យគ្រប់គ្រាន់ ព្រមទាំងរស់នៅក្នុងបរិស្ថានដែលមានអនាម័យប្រកបដោយនិរន្តភាព។</span></p>
<p><span style="color: #000000;">លោកស្រ៊ិន ពុទ្ធី ប្រធាននាយកដ្ឋានផ្គត់ផ្គង់ទឹកជនបទនៃក្រសួងអភិវឌ្ឍន៍ជនបទ បានលើកឡើងដែរថា ទឹកជាផ្នែកមួយដ៏មានសារៈសំខាន់លើគ្រប់វិស័យ ហើយប្រទេសកម្ពុជា សំបូរទឹកធម្មជាតិច្រើន ប៉ុន្តែនៅមានប្រជាពលរដ្ឋមួយចំនួនតូចដែលរស់នៅជនបទ នៅមិនទាន់ទទួលបានទឹកពីប្រភពកែលម្អសម្រាប់ប្រើប្រាស់ពេញមួយឆ្នាំនៅឡើយ។</span></p>
<p><span style="color: #000000;">លោកថា៖ «ទឹកលើដី និងទឹកក្រោមដី បានផ្តល់ជាប្រភពទឹកសំខាន់សម្រាប់ទទួលទាន ប៉ុន្តែទឹកនៅលើដី ជាទូទៅមានពពួកមេរោគបង្កជំងឺរាគរូស ខណៈទឹកក្រោមដីមានសារធាតុគីមីសេរានិច ដូច្នេះយើងត្រូវដោះស្រាយបញ្ហាសុវត្ថិភាពទឹក និងត្រូវផ្តោតលើបញ្ហាបរិស្ថាន ដែលអាចប៉ះពាល់ធ្ងន់ធ្ងរដល់គុណភាពទឹក ទាំងទឹកលើដី និងទឹកក្រោមដីផងដែរ»។</span></p>
<p><span style="color: #000000;">បើតាមលោក ពុទ្ធី ការប្រារព្ធទិវាទឹកពិភពលោកឆ្នាំ២០១៩នេះ បានផ្តោតទៅលើប្រធានបទ «ប្រជាពលរដ្ឋនៅជនបទគ្រប់រូបត្រូវទទួលបានសេវាផ្គត់ផ្គង់ទឹកស្អាត» ដោយគ្រប់ភាគីពាក់ព័ន្ធបានពិភាក្សាអំពីដំណោះស្រាយផ្សេងៗ ដើម្បីការពារ និងថែទាំទឹកតាមបែបធម្មជាតិ និងធ្វើយ៉ាងណាដើម្បីឆ្លើយតបនឹងបញ្ហាឬកាត់បន្ថយគ្រោះទឹកជំនន់ គ្រោះរាំងស្ងួត និងការបំពុលទឹកដោយការប្រើដំណោះស្រាយតាមបែបធម្មជាតិ។</span></p>
<p><span style="color: #000000;"><a class="thickbox" title="" href="/FileManager/Commons/2019/3/27/3-27-03-2019--15-37-12.PNG"><img src="/FileManager/Articles/mce/2019/3/27/3-27-03-2019--15-37-12.PNG" alt="" /></a><br /></span></p>
<p><span style="color: #000000;">កញ្ញា សាន ស៊ាវណាន់ អាយុ១៨ឆ្នាំ មកពីខេត្តបន្ទាយមានជ័យ ដែលជានិស្សិតរៀននៅសកលវិទ្យាល័យភូមិន្ទភ្នំពេញ ហើយបានចូលរួមទិវាទឹកពិភពលោក បាននិយាយថា តំបន់ដែលកញ្ញារស់នៅ នៅពុំទាន់មានទឹកស្អាតប្រើប្រាស់នៅឡើយទេ គឺអ្នកភូមិបានប្រើប្រាស់ទឹកស្រះ និងអណ្តូង ដែលធ្វើឲ្យពលរដ្ឋមួយចំនួន ជាពិសេសកុមារ ជួបបញ្ហារាគរូស នៅពេលដែលពួកគាត់ខ្វះអនាម័យ។</span></p>
<p><span style="color: #000000;">កញ្ញាថា៖ «ពេលខ្លះអ្នកភូមិមួយចំនួនដែលគាត់អត់ទាន់មានការយល់ដឹងពីអនាម័យទឹកស្អាត គាត់នាំគ្នាទៅងូតទឹកនៅក្បែរប្រភពទឹកទាំងនោះ ហើយអ្នកខ្លះក៏បន្ទោរបង់ក្បែរនោះ អីចឹងទៅវាអាចមានមេរោគបង្កជាជំងឺរាគរូសជាដើម។ អីចឹងហើយ ខ្ញុំចង់ឲ្យសេវាទឹកស្អាតឆាប់មានដល់តំបន់ជនបទ ក៏ដូចជាតំបន់ដែលខ្ញុំរស់នៅ ដើម្បីឲ្យពលរដ្ឋជនបទមានទឹកស្អាតប្រើប្រាស់ និងជួយលើកកម្ពស់សុខមាលភាពរបស់ប្រជាពលរដ្ឋផងដែរ»។</span></p>
<p><span style="color: #000000;">តំណាងអង្គការយូនីសេហ្វប្រចាំនៅកម្ពុជា លោកស្រី Cristian Munduate បានថ្លែងថា ការប្រែប្រួលអាកាសធាតុ ក៏ដូចជាការកើនឡើងសីតុណ្ហភាពនៅឆ្នាំនេះ អាចធ្វើឲ្យប៉ះពាល់ដល់ភាពងាយរងគ្រោះនៃការខ្វះទឹកស្អាតប្រើប្រាស់នៅកម្ពុជា។ តែយ៉ាងណា លោកស្រីថា ផែនការសកម្មភាពជាតិឆ្នាំ២០១៩-២០២៣ និងគោលដៅអភិវឌ្ឍន៍ប្រកបដោយចីរភាពសម្រាប់កម្មវិធីទឹកស្អាត និងអនាម័យ បានបង្ហាញពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការសម្រេចបាននូវចក្ខុវិស័យ និងផែនកការយុទ្ធសាស្ត្រជាតិដែលថា នៅឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទ នឹងទទួលបានសេវាកម្មផ្គត់ផ្គង់ទឹកស្អាត និងអនាម័យប្រកបដោយសុវត្ថិភាព ព្រមទាំងរស់នៅក្នុងបរិស្ថានដែលមានអនាម័យ៕</span></p>
<p><span style="color: #000000;"><a class="c_tab" href="https://www.khmertimeskh.com/" target="_blank"><img src="/FileManager/Articles/mce/2019/3/27/khmertime-27-03-2019--11-32-54.png" alt="" /></a><br /></span></p>
<p style="text-align: right;"><span style="color: #000000;">ប្រភព ៖ khmertimes</span></p>
<div id="khmer-359300945" class="khmer-content_3"><ins class="adsbygoogle" data-ad-client="ca-pub-7981514788931893" data-ad-slot="4059842397" data-ad-format="auto" data-full-width-responsive="true" data-adsbygoogle-status="done"><ins id="aswift_1_expand"></ins></ins></div>