<div class="item-page">
<p><span style="color: #000000;"><strong>(តាកែវ)៖</strong> អធិការនគរបាលស្រុកបាទី ខេត្តតាកែវ លោក ង៉ាន់ សារី នៅរសៀលថ្ងៃទី២៦ ខែកក្កដា ឆ្នាំ២០១៦នេះ បានរៀបរាប់លម្អិតលើករណីកាប់ប្រហារនារី ជាមន្រ្តីនៅមន្ទីរទេសចរណ៍ខេត្តកណ្តាល ទម្លាក់ទឹកនៅក្នុងតំបន់កំសាន្តទន្លេបាទី កាលពីសប្តាហ៍មុននោះ គឺផ្តើមចេញពីការប៉ុនប៉ងប្លន់ទ្រព្យសម្បត្តិ ហើយជនដៃដល់បានរៀបផែនការ សម្លាប់នេះតាំងពីថ្ងៃទី១៩ ខែកក្កដា ឆ្នាំ២០១៦មកម្ល៉េះ ពីព្រោះជនរងគ្រោះជាមនុស្សមានទ្រព្យសម្បត្តិគ្រាន់បើ។</span></p>
<p><span style="color: #000000;">លោកអធិការបានបញ្ជាក់ថា ជនដៃដល់ជាមនុស្សស្រីម្នាក់ញៀននឹងល្បែងខ្លាំងណាស់ និងពុំមានមុខរបរមិនប្រាកដនោះឡើយ។</span></p>
<p><span style="color: #000000;">សូមបញ្ជាក់ថា ករណីឃាតកម្មនេះបានកើតឡើងព្រឹកថ្ងៃទី២០ ខែកក្កដា ឆ្នាំ២០១៦ នៅតំបន់ទេសចរណ៍ទន្លេបាទី ស្ថិតក្នុងភូមិទន្លេបាទី ឃុំក្រាំងធ្នង់ ស្រុកបាទី ខេត្តតាកែវ ដែលនារីវ័យក្មេងរងគ្រោះឈ្មោះ ជា សុជាតិ អាយុ២៣ឆ្នាំ រស់នៅភូមិព្រែកសំរោង ក្រុងតាខ្មៅ ខេត្តកណ្តាល ហើយជាមន្ត្រីជាប់កិច្ចសន្យា នៅមន្ទីរទេសចរណ៍ខេត្តកណ្តាល។</span></p>
<p><span style="color: #000000;">សម្រាប់ករណីឃាតកម្មមួយនេះ កម្លាំងនគរបាលស្រុកបាទី សហការជាមួយកម្លាំងនគរបាលជំនាញ ក្រោមដឹកនាំបញ្ជាផ្ទាល់ពីអធិការស្រុក និងស្នងការនគរបាលខេត្ត តាមស្រាវជ្រាវ រហូតចាប់ខ្លួនជនដៃដល់នៅរសៀលថ្ងៃទី២៥ ខែកក្កដា ឆ្នាំ២០១៦ ស្ថិតនៅចំណុចផ្សារតានី ក្នុងស្រុកអង្គរជ័យ ខេត្តកំពត។</span></p>
<p><span style="color: #000000;">លោក ង៉ាន់ សារី បានបញ្ជាក់ថា មុនពេលកើតហេតុ ជនរងគ្រោះ និងជនសង្ស័យបានស្គាល់គ្នារយះពេលប្រមាណ១ឆ្នាំមកហើយ។ ក្នុងរយះពេលស្គាល់គ្នានេះ ជនសង្ស័យ ឃើញជនរងគ្រោះមានទ្រព្យសម្បត្តិគ្រាន់បើ នៅជាប់នឹងខ្លួន ហើយម្យ៉ាងខ្លួនញៀនល្បែងទៀតនោះ ក៏ចាប់ផ្តើមរៀបចំផែនការសម្លាប់ជនរងគ្រោះតែម្តង។ នៅថ្ងៃទី១៩ ខែកក្កដា ឆ្នាំ២០១៦ ជនសង្ស័យបានណាត់ជាមួយជនរងគ្រោះ ទៅលេងនៅទន្លេបាទី លុះព្រឹកថ្ងៃកើតហេតុនោះ ជនរងគ្រោះបានជិះម៉ូតូម៉ាកវ៉េវ ទៅដឹកជនសង្ស័យនៅជិតស្ពានព្រែកហូរ បន្តដំណើរទៅទន្លេបាទី ដោយយកកាបិតប៉័ងតោ ដាក់នៅក្នុងកាបូបរួចជាស្រេច។</span></p>
<p><span style="color: #000000;">ពេលទៅដល់ទន្លេបាទីពួកគេទាំង២នាក់ បានជួលផ្ទះទឹកមួយដើម្បីអង្គុយ និងកម្មង់ឲ្យគេធ្វើម្ហូប។ លុះពេលឃើញមានសភាពស្ងាត់នោះ ជនសង្ស័យក៏ទាញកំាបិតប៉័ងចេញពីកាបូបកាប់ទៅលើជនរងគ្រោះ ជាច្រើនកាំបិតរួចរុញទម្លាក់ទឹកតែម្តង។</span></p>
<p><span style="color: #000000;">ក្រោយកាប់សម្លាប់ជនរងគ្រោះហើយ ជនសង្ស័យបានជូតឈាម ហើយដើរចេញមកក្រៅដោយប្រាប់អ្នកធ្វើម្ហូបថា ម្ហូបដែលកម្មង់នោះខ្ចប់វិញ ហើយរូបគេទៅតាមមិត្តភក្តិ២ម៉ូតូទៀតដែលវង្វេងផ្លូវ។</span></p>
<p><span style="color: #000000;">ពេលអ្នកលក់សួរថា ចុះមិត្តិភក្តិទៅណាហើយមិនឃើញ ជនសង្ស័យបានឆ្លើយថា គេជិះទូកទៅបេះផ្កាឈូកបាត់ហើយ។ លុះពេលជនសង្ស័យចេញទៅ ហើយអ្នកលក់លើកម្ហូបយកទៅផ្ទះទឹកនោះ ស្រាប់តែឃើញឈាម បង្កជាកការភ្ញាក់ផ្អើលឆោឡោតែម្តង។</span></p>
<p><span style="color: #000000;">លោកអធិការស្រុកបាទី បានបន្តទៀតថា ពេលចេញមកនោះ ជនសង្ស័យបានដោះយកខ្សែក កងដៃ និងទូរស័ព្ទអាយហ្វនមួយគ្រឿងរបស់ជនរងគ្រោះ ព្រមទាំងម៉ូតូផងដែរ ដោយជិះមកព្រែកហូរវិញ ហើយលក់ទូរស័ព្ទបានប្រាក់ចំនួន៦០ដុល្លារ។</span></p>
<p><span style="color: #000000;">បន្ទាប់មកជនសង្ស័យបានយកម៉ូតូរបស់ជនរងគ្រោះទៅលក់ បានចំនួន៣៥០ដុល្លារ នៅណាហ្គា ដូច្នេះបានលុយសរុប៦១០ដុល្លារ ស្រាប់តែទៅយកលុយនេះ ទៅលេងបៀរ នៅក្នុងណាហ្គាអស់រលីង។ ពេលចាញ់ល្បែងអស់លុយជនសង្ស័យ បានយកខ្សែកលក់ (៣៥ដុល្លារ) និងកងដៃលក់(៩០ដុល្លារ) រួចបន្តដំណើរទៅក្រុងប៉ោយប៉ែត ដើម្បីទៅលេងផ្ទះបងនៅទីនោះ មុនពេលត្រឡប់ទៅតានីទូកមាស ខេត្តកំពត ជាផ្ទះរបស់ឪពុកខ្លួនមានប្រពន្ធចុងនៅទីនោះ។</span></p>
<p><span style="color: #000000;">ពេលទៅដល់ផ្ទះឪពុកខ្លួនកម្លាំងនគរបាល ក៏បានចុះចាប់តែម្តង។ លោក ង៉ាន់ សារី បានបន្តទៀតថា នៅថ្ងៃនេះ លោកបាននាំជនសង្ស័យមកណាហ្គា ដើម្បីឲ្យបង្ហាញកន្លែងលក់ម៉ូតូ មុននាំខ្លួនទៅសួរនាំបន្តទៀត ដើម្បីកសាងសំណុំរឿងបញ្ជូនទៅកាន់តុលាការ។ ជនសង្ស័យរូបនេះមានឈ្មោះ សាត មករា ហៅនី ភេទស្រី អាយុ២៥ឆ្នាំ រស់នៅភូមិត្រពាំងលាន ឃុំចំបក់ ស្រុកបាទី៕</span></p>
<p><span style="color: #000000;"><img src="https://fbcdn-sphotos-a-a.akamaihd.net/hphotos-ak-xat1/t31.0-8/13735073_1144129708993302_5077906178981560380_o.jpg" alt="" width="730" /></span></p>
<p><span style="color: #000000;"><img src="https://scontent-kul1-1.xx.fbcdn.net/t31.0-8/13737587_1144129712326635_347671200726385732_o.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/010/fn-2016-07-25-17-50-31-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/010/fn-2016-07-25-17-50-32-1.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/010/fn-2016-07-25-17-50-32-2.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2016-07-26-14-40-43-0.jpg" alt="" width="730" /></span></p>
<p><span style="color: #000000;"><strong>រូបជនរងគ្រោះកាលនៅរស់</strong></span></p>
<div></div>
<div style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី</span></div>
</div>