<p><span style="color: #000000;"><strong>(ពិភពលោក)៖</strong> ប្រសិនបើលោកមានការរំខានដោយសារការស្ទះចរាចរណ៍ ការស្វែងរកចំណតរថយន្ត និងការចំណាយប្រាក់ទៅលើប្រេងឥន្ទនៈ ឬឧស្ម័ននោះ អ្នកអាចរីករាយជាមួយនឹងដំណើរកំសាន្តនៅទីតាំង១០លើពិភពលោក ដែលមិនអនុញ្ញាតឱ្យមានរថយន្ត។ អ្នកអាចជ្រើសរើសការធ្វើដំណើរដោយកង់ និងរីករាយជាមួយដំណើរកំសាន្តដ៏ស្រស់ថ្លា ដោយគ្មានផ្សែងបំពុល និងសម្លេងរំខាន ជាមួយនឹងទីតាំងទាំង១០ដូចខាងក្រោម៖</span></p>
<p><span style="color: #000000;"><strong>១. កោះ Mackinac រដ្ឋMichigan សហរដ្ឋអាមេរិក៖</strong></span><br /><span style="color: #000000;">កោះនេះ ស្ថិតនៅក្នុងបឹង Huron ដែលបានហាមឃាត់រាល់យាន្តជំនិះផ្សេងៗ តាំងពីឆ្នាំ១៨៩៨មកម្ល៉េះ។ បច្ចុប្បន្ន រមនីយដ្ឋានសម្រាប់រដូវក្តៅមួយនេះ បានទាក់ទាញក្រុមគ្រួសារជាច្រើន ដែលស្រឡាញ់ធម្មជាតិ និងប្រវត្តិសាស្ត្រ។ នៅទីនោះមានតែកង់ និងរទេះសេះប៉ុណ្ណោះសម្រាប់ធ្វើដំណើរ។</span></p>
<p><span style="color: #000000;"><img src="http://image.freshnewsasia.com/2017/fn-2017-01-22-18-08-00-3.jpg" alt="" width="730" /></span></p>
<p><span style="color: #000000;"><strong>២. កោះ Sark ចក្រភពអង់គ្លេស៖</strong></span><br /><span style="color: #000000;">កោះនេះស្ថិតនៅក្បែរតំបន់ Normandy ប្រទេស បារាំង និងជាផ្នែកមួយនៃកោះនៅចក្រភពអង់គ្លេស។ កោះនេះតូចពិតមែន តែសម្បូរទៅដោយទេសភាពដ៏ស្រស់ស្អាត និងពិតជាសាកសមសម្រាប់ដំណើរកំសាន្តដោយថ្មើរជើង ឬដោយការជិះកង់ឡើងភ្នំ។ នៅទីនេះ មានតែត្រាក់ទ័រតែប៉ុណ្ណោះជាយាន្តជំនិះត្រូវបានអនុញ្ញាតឱ្យប្រើប្រាស់។ ក្រៅពីនោះគឺមានរទេះសេះ កង់ និងការដើរដោយថ្មើរជើង។</span></p>
<p><span style="color: #000000;"><img src="http://image.freshnewsasia.com/2017/fn-2017-01-22-18-08-00-2.jpg" alt="" width="730" /></span></p>
<p><span style="color: #000000;"><strong>៣. ទីក្រុង Vinice ប្រទេស អ៊ីតាលី៖</strong></span><br /><span style="color: #000000;">ដងផ្លូវនានានៅទីនេះ អាចនឹងមិនមានស្ថានភាពស្រស់ស្អាតបែបនេះទេ ប្រសិនបើរថយន្តត្រូវបានអនុញ្ញាតឱ្យបើកបរឆ្លងកាត់។ នៅទីនោះ អាចមានតែរថយន្តទេចរណ៍ប្រភេទបណ្តែតលើទឹកប៉ុណ្ណោះសម្រាប់ដឹកប្រជាពលរដ្ឋ Venetians និងអ្នកទេសចរណ៍ជុំវិញកោះ Venice និងកោះដែលនៅក្បែរៗនោះ។</span></p>
<p><span style="color: #000000;"><img src="http://image.freshnewsasia.com/2017/fn-2017-01-22-18-08-00-1.jpg" alt="" width="730" /></span></p>
<p><span style="color: #000000;"><strong>៤. តំបន់ Fes el-Bali ប្រទេស ម៉ារ៉ុក៖</strong></span><br /><span style="color: #000000;">Fes el-Bali ជាតំបន់ដែលមានដងផ្លូវកើតឡើងតាំងពីយុគសម័យកណ្តាលមកម្ល៉េះ ហើយមិនសូវសម្បូររថយន្តបើកកាត់ទីនេះឡើយ ធ្វើឱ្យវាក្លាយជាទីក្រុងដែលគ្មានរថយន្ត និងជាកន្លែងដ៏អស្ចារ្យមួយ។ អ្នកអាចរីករាយក្នុងការចូលហាងលក់ទំនិញ ភោជនីយដ្ឋាន ព្រះវិហារឥស្លាមដោយការធ្វើដំណើរដោយថ្មើរជើង។</span></p>
<p><span style="color: #000000;"><img src="http://image.freshnewsasia.com/2017/fn-2017-01-22-18-08-00-0.jpg" alt="" width="730" /></span></p>
<p><span style="color: #000000;"><strong>៥. ក្រុង La Cumbrecita ប្រទេស អាហ្សង់ទីន៖</strong></span><br /><span style="color: #000000;">ជាទីក្រុងដ៏ស្រស់ស្អាតតូចមួយនៅក្បែរជ្រលងភ្នំ Calamuchita។ ភូមិនេះលំអដោយដើមឈើខៀវស្រងាត់ មានគោលនយោបាយមួយគឺអនុញ្ញាតឱ្យមានតែកង់តែប៉ុណ្ណោះសម្រាប់ជាមធ្យោយបានធ្វើដំណើរ ដែលវាជាការចូលរួមចំណែកក្នុងការផ្តល់ភាពស្រស់ស្អាតដល់ក្រុងមួយនេះ។ អ្នកនិយមអេកូទេសចរណ៍ភាគច្រើនចូលចិត្តមកកំសាន្តនៅទីនេះ ដោយការដើរឡើងលើភ្នំ ព្រៃឈើ និងទស្សនាទឹកធ្លាក់ ឬការបោះជំរុំមើលមេឃ និងផ្កាយ ក្នុងពេលរាត្រី។</span></p>
<p><span style="color: #000000;"><img src="http://image.freshnewsasia.com/2017/fn-2017-01-22-18-07-51-0.jpg" alt="" width="730" /></span></p>
<p><span style="color: #000000;"><strong>៦. ក្រុង Hydra ប្រទេស ក្រិច៖</strong></span><br /><span style="color: #000000;">ជាមួយទីតាំងដែលមានទិដ្ឋភាពដ៏អស្ងារ្យ ក្បែរសមុទ្រ Aegean ធ្វើឱ្យHydra ក្លាយជាស្ថានសួគ៌លើផែនដី។ គ្មានរថយន្តណាមួយត្រូវបានអនុញ្ញាតឱ្យប្រើប្រាស់នៅទីនេះឡើយ ធ្វើឱ្យដងផ្លូវនានា ស្ងប់ស្ងាត់គឺមានតែការធ្វើដំណើរដោយថ្មើរជើង និងសត្វលាតែប៉ុណ្ណោះ។ ដោយវាជាផ្នែកមួយនៃកោះ Saronic ធ្វើឱ្យHydra មានភាពល្បីល្បាញ ដោយសារស្ថាបត្យកម្មដ៏ល្អឥតខ្ជោះ ទឹកសមុទ្រពណ៌ខៀវស្រងាត់ ឆ្នេរសមុទ្រ និងផ្លូវដើរដោយថ្មើរជើងក្បែរមាត់សមុទ្រយ៉ាងស្រស់ស្អាត។</span></p>
<p><span style="color: #000000;"><img src="http://image.freshnewsasia.com/2017/fn-2017-01-22-18-07-40-2.jpg" alt="" width="730" /></span></p>
<p><span style="color: #000000;"><strong>៧. កោះ Bald Head រដ្ឋការ៉ូលីណាខាងជើង សហរដ្ឋអាមេរិក៖</strong></span><br /><span style="color: #000000;">អ្នកគួរតែបោះបង់ទុក្ខព្រួយ និងរថយន្តរបស់អ្នកចោលសិន នៅពេលដែលអ្នកបានទៅកំសាន្តនៅទីនេះ។ កោះដែលមានទេសភាពស្រស់ស្អាតមួយនេះ ជាទីតាំងដ៏សាកសមសម្រាប់ថ្ងៃវិស្សមកាល ជាមួយនឹងឆ្នេរខ្សាច់ ទីលានវាយកូនហ្គោលជាដើម។ មធ្យោបាយធ្វើដំណើរនៅទីនេះ មានតែរទេះសម្រាប់អ្នកវាយកូនហ្គោល កង់ និងការធ្វើដំណើរដោយថ្មើរជើងប៉ុណ្ណោះ។</span></p>
<p><span style="color: #000000;"><img src="http://image.freshnewsasia.com/2017/fn-2017-01-22-18-07-40-1.jpg" alt="" width="730" /></span></p>
<p><span style="color: #000000;"><strong>៨. ភូមិ Gienthoorn ប្រទេស ហូឡង់៖</strong></span><br /><span style="color: #000000;">មានទីតាំងស្ថិតនៅចម្ងាយប្រមាណ៥៥ម៉ាល៍ភាគឥសានទីក្រុង អាស្ទ័រដាម។ នៅទីនោះមានរហូតដល់១៨០ស្ពានពីលើប្រឡាយទឹកដែលមើលទៅហាក់ដូចជាគំនូរ។ អ្នកអាចធ្វើដំណើរតាមប្រឡាយទឹកជាមួយនឹងទេសភាពស្រស់ស្អាតបែបធម្មជាតិ ដោយទូក និងមើលទីតាំងផ្សេងៗទៀតដោយការដើរដោយថ្មើរជើង។</span></p>
<p><span style="color: #000000;"><img src="http://image.freshnewsasia.com/2017/fn-2017-01-22-18-07-40-0.jpg" alt="" width="730" /></span></p>
<p><span style="color: #000000;"><strong>៩. កោះភ្លើង ទីក្រុង ញ៉ូវយក សហរដ្ឋអាមេរិក៖</strong></span><br /><span style="color: #000000;">គឺជាកោះមួយដែលពេញនិយមសម្រាប់រដូវក្តៅ មានទីតាំងស្ថិតនៅក្បែរឆ្នេរខាងត្បូង។ កោះនេះបានផ្តល់នូវឆ្នេរ សួនច្បារ និងសហគមន៍ដ៏បុរាណមួយ ដែលមានមនុស្សមកកំសាន្តភាគច្រើននៅរដូវក្តៅ។ អ្នកនៅក្នុងតំបន់ និងអ្នកទេសចរណ៍មកទីនេះដោយការជិះកង់ ជុំវិញកោះ ឬដើរកំសាន្តជាមួយនឹងបរិយាកាសយ៉ាងទាក់ទាញ។</span></p>
<p><span style="color: #000000;"><img src="http://image.freshnewsasia.com/2017/fn-2017-01-22-18-07-30-0.jpg" alt="" width="730" /></span></p>
<p><span style="color: #000000;"><strong>១០.ទីក្រុង Zermatt ប្រទេស ស្វីស៖</strong> </span><br /><span style="color: #000000;">ទីក្រុង Zermatt ស្ថិតនៅផ្នែកខាងក្រោមក្បែរកំពូលភ្នំខ្ពស់ក្នុងនោះរួមទាំងភ្នំដ៏ល្បីល្បាញមួយគឺភ្នំ Matterhorn។ ទីក្រុងដែលមានភ្នំខ្ពស់ៗនេះ មានភាពទាក់ទាញ និងល្បីល្បាញជាគោលដៅទេសចរណ៍សម្រាប់អ្នកដែលនិយមការជិះស្គី និងលេងកីឡានារដូវរងា។ ដោយសារទីនេះគ្មានវត្ថមានរថយន្តឡើយ ធ្វើឱ្យទីក្រុងនេះគ្មានខ្យល់បំពុលឡើយ៕</span></p>
<p><span style="color: #000000;"><img src="http://image.freshnewsasia.com/2017/fn-2017-01-22-18-07-22-0.jpg" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>