<p><span style="color: #000000;"><strong>(កណ្តាល)៖</strong> មានហេតុការណ៍លិចទូកដ នៅកំពង់ចម្លងកោះកែវ ស្រុកល្វាឯម ខេត្តកណ្តាល នារសៀលថ្ងៃទី៨ ខែមិថុនា ឆ្នាំ២០១៦នេះ បណ្តាលឲ្យបាត់ខ្លួនមនុស្សចំនួន២នាក់ និងម៉ូតូ៣គ្រឿង ក្នុងចំណោមអ្នកជិះនៅលើទូកដ១០នាក់។</span></p>
<p><span style="color: #000000;">អធិការនគរបាលស្រុកល្វាឯម លោក ជា ថុល បានប្រាប់អង្គភាព Fresh News ថា ហេតុការណ៍នេះបានកើតឡើង ដោយសារតែ មានភ្លៀងធ្លាក់ខ្លាំង និងមានរលកធំជាងដំបូលផ្ទះទៅទៀត។</span></p>
<p><span style="color: #000000;">លោកថា ទូកដនេះពេលចេញពីកំពង់ចម្លងកោះកែវ នៅស្រុកល្វាឯម ឆ្ពោះទៅស្រុកកៀនស្វាយ បានប្រមាណ៥០ម៉ែត្រប៉ុណ្ណោះ ស្រាប់តែមានភ្លៀងធ្លាក់ខ្លាំង និងមារលកធំទើបធ្វើឲ្យលិចតែម្តង ពេលនោះព័ត៌មានជំហានដំបូងថា មានមនុស្ស១០នាក់បាត់ខ្លួន បន្ទាប់មក៨នាក់ បន្ទាប់មក៦នាក់ តែចុងក្រោយមានតែ២នាក់ប៉ុណ្ណោះ ដែលបាត់ខ្លួន អមដោយម៉ូតូចំនួន៣គ្រឿង រកមិនទាន់ឃើញនៅឡើយទេ ដោយសារតែទឹកមានជំរៅ រហូតដល់៤០ម៉ែត្រឯណោះ។</span></p>
<p><span style="color: #000000;">លោកអធិការបានបញ្ជាក់ថា តាមពិតភ្លៀងខ្លាំង គេមិនឲ្យទៅដែរតែម្ចាស់កំពង់ដរ ថា មិនអីទើបចេញទូកដស្រាប់តែជួបហេតុការណ៍នេះតែម្តង។ នៅពេលកម្លាំងសមត្ថកិច្ច បានចុះទៅជួយអន្តរាគមន៍ស្វែងរកជនរងគ្រោះ ទាំង២នាក់ ដែលសង្ស័យបានស្លាប់ទៅហើយនោះ៕</span></p>
<p><br /><a class="thickbox" title="" href="/FileManager/Commons/2016/6/8/3-08-06-2016--15-28-06.png"><img src="/FileManager/Articles/mce/2016/6/8/3-08-06-2016--15-28-06.png" alt="" /></a></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី</span></p>