<div class="item-page">
<p><span style="color: #000000;"><strong>(កណ្តាល)៖</strong> ជនសង្ស័យ២នាក់ បានធ្វើសកម្មភាពកាច់កម៉ូតូ នៅចំណុចផ្សារបឹងខ្យាង ភូមិបឹងខ្យាង ឃុំបឹងខ្យាង ស្រុកកណ្តាលស្ទឹង ខេត្តកណ្តាល តែមិនបានសម្រេច ក៏ត្រូវម្ចាស់ម៉ូតូពួតដៃជាមួយប្រជាពលរដ្ឋដេញចាប់បានម្នាក់ ព្រលះម្នាក់ដៃមួយជើងឡើងទ្រោមខ្លួន ទើបប្រគល់ជូនកម្លាំងនគរបាលស្រុកកណ្ដាលស្ទឹង ចំណែកម្នាក់ទៀតជិះម៉ូតូរបស់ខ្លួនរត់គេចបាត់។</span></p>
<p><span style="color: #000000;">នគរបាលបានឲ្យដឹងថា សកម្មភាពលួចខាងលើនេះ កើតឡើងនៅយប់ថ្ងៃទី០២ ខែមករា ឆ្នាំ២០១៧។ ម្ចាស់ម៉ូតូមានឈ្មោះ ងិន វិច្ឆិកា អាយុ២៣ឆ្នាំ មានមុខរបរជាងជួសជុលទូរស័ព្ទ រស់នៅភូមិ-ឃុំកើតខាងលើ។ ម៉ូតូម៉ាកស៊ុយសាគីនិច ពណ៌ស សេរីឆ្នាំ២០១៤ ពាក់ស្លាកលេខ ភ្នំពេញ 1FR-8059។</span></p>
<p><span style="color: #000000;">ចំណែកជនសង្ស័យ ដែលកម្លាំងនគរបាលឃាត់ខ្លួនបាន មានឈ្មោះ វ៉ាន់ នឿន អាយុ៣១ឆ្នាំ និងម្នាក់ទៀតកំពុងរត់គេចខ្លួន ឈ្មោះ ពៅ អាយុ៣៨ឆ្នាំ រស់នៅភូមិស្រះចក សង្កាត់ស្រះចក ខណ្ឌដូនពេញ រាជធានីភ្នំពេញ ជាមួយគ្នា។</span></p>
<p><span style="color: #000000;">នគរបាលបានបន្តថា មុនពេលកើតហេតុ គេឃើញម្ចាស់ម៉ូតូឈប់ម៉ូតូចោល នៅចំណុចកើតហេតុខាងលើ ស្រាប់តែមានជនសង្ស័យ ២នាក់នោះ ជិះម៉ូតូមកដល់ ម្នាក់ចុះធ្វើសកម្មភាពកាច់កម៉ូតូ ភ្លាមនោះម្ចាស់ម៉ូតូបានឃើញទាន់ រួចស្រែកថា ចោរៗ ធ្វើឲ្យជនសង្ស័យភ័យស្លន់រត់គេចខ្លួន។</span></p>
<p><span style="color: #000000;">ភ្លាមៗនោះដែរ ម្ចាស់ម៉ូតូសហការជាមួយប្រជាពលរដ្ឋ បានដេញប្រផាប់ចាប់ប្រភីងបានម្នាក់ ចំណែកម្នាក់ទៀត បានបើកម៉ូតូរត់គេចខ្លួនបាត់។ ក្រោយឃាត់ខ្លួនបាន កម្លាំងនគរបាលស្រុកកណ្ដាលស្ទឹង បានធ្វើការឆែកឆេររកឃើញវត្ថុតាងនៅជាប់នឹងខ្លួន មានសោរាងអក្សរ L មួយដើម។</span></p>
<p><span style="color: #000000;">បច្ចុប្បន្ន ជនសង្ស័យត្រូវបានឃុំខ្លួនបណ្ដោះអាសន្ន នៅអធិការដ្ឋាននគរបាលស្រុកកណ្ដាលស្ទឹង ដើម្បីកសាងសំណុំបញ្ជូនទៅកាន់តុលាការចាត់ទៅតាមផ្លូវច្បាប់៕</span></p>
<p><span style="color: #000000;"><img src="http://image.freshnewsasia.com/2016/019/05/fn-2017-01-03-09-45-49-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2017-01-03-09-45-49-1.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2017-01-03-09-45-49-2.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>
</div>