<p><strong>ព័ត៌មានជាតិ ៖</strong> ព្រះរាជវាំងបានបើកទ្វារទទួលមហាជន ទូទៅអោយចូលគោរពព្រះវិញ្ញាណក្ខន្ធ<br />សម្តេចឳហើយបន្ទាប់ពីព្រះរាជពិធី កាន់ទុក្ខរយៈពេល៧ថ្ងៃបានបញ្ចប់ទៅ។ ប៉ុន្តែ ដើម្បីអាចចូល<br />គោរពព្រះបរមសពរបស់ព្រះបាទនរោត្តម សីហនុដោយផ្ទាល់នៅក្នុងព្រះបរមរាជវាំងបានគេត្រូវ<br />ដាក់ពាក្យសុំជាមុន ពោលគឺ មហាជនមិនអាចចូលបានដោយសេរីនោះទេ។ និតីវិធីនេះធ្វើអោយ<br />ប្រជាពលរដ្ឋមួយចំនួនខកចិត្តពីព្រោះតែពួកគេ យល់ថា មានលក្ខណៈស្មុគស្មាញពេក ។ យ៉ាង<br />ណាក៏ដោយ បញ្ហាសណ្តាប់ធ្នាប់និងសន្តិសុខ ត្រូវបានគេលើកយកសំអាងដើម្បីពន្យល់ តបនឹង<br />កង្វល់នេះ។</p>
<p><a class="thickbox" title="" href="/FileManager/Commons/2012/10/26/10-26-10-2012--08-20-12.jpg"><img src="/FileManager/Articles/mce/2012/10/26/10-26-10-2012--08-20-12.jpg" alt="" width="484" height="270" /></a></p>
<p>ក្រោយពីការគោរពព្រះវិញ្ញាណក្ខន្ធរបស់ព្រះបាទនរោត្តម សីហនុ នៅក្រៅព្រះបរមរាជវាំងអស់<br />មួយសប្តាហ៍កន្លងមក ប្រជាពលរដ្ឋទូទៅអាចត្រូវបានអនុញ្ញាតឲ្យចូលគោរពព្រះវិញ្ញាក្ខន្ធ របស់<br />អង្គសម្តេចឪដោយផ្ទាល់នៅក្នុងព្រះបរមរាជវាំង។ ក៏ប៉ុន្តែពួកគេមិនអាចចូលដោយសេរីទេគឺត្រូវ<br />ដាក់ពាក្យសុំជាមុនសិន បើតាមព្រះអង្គម្ចាស់មួយអង្គដែលសុំមិនបញ្ចេញព្រះនាម ការដែលមិន<br />បើកចំហសំរាប់មនុស្សទូទៅបែបនេះ គឺដោយសារ តែមានអ្នកសុំចូលគោរពព្រះបរមសពរបស់<br />អង្គសម្តេចឪច្រើនពេក មានទាំងមន្ត្រីក្នុងស្រុក ក្រៅស្រុក និង មិត្តបរទេសផង។</p>
<p>នៅថ្ងៃនេះ វិទ្យុបារាំងអន្តរជាតិមិនអាចសុំការអត្ថាធិប្បាយពីលោក ញឹកប៊ុន ឆៃ ដែលជាអនុប្រ<br />ធានគណៈកម្មាធិការជាតិរៀបចំព្រះរាជពិធីបុណ្យព្រះបរមសព របស់ព្រះមហាវីរក្សត្រ ស្តីពីការ<br />ចូលគោរពព្រះវិញ្ញាណក្ខន្ធនោះបានទេ ។ ក៏ប៉ុន្តែ លោកបានមានប្រសាសន៍ប្រាប់កាសែតក្នុង<br />ស្រុកមួយថា អ្នកដែលចង់ចូលគោរពព្រះវិញ្ញាណក្ខន្ធរបស់ព្រះមហាវីរក្សត្រ ត្រូវដាក់ពាក្យ និង<br />ត្រូវប្រាប់ពីចំនួនមនុស្ស និងអាសយដ្ឋាន ដើម្បីគណៈកម្មាធិការអាចកំនត់ថ្ងៃជូនពួកគាត់បាន ។</p>
<p><a class="thickbox" title="" href="/FileManager/Commons/2012/10/26/ella12e-26-10-2012--08-21-12.jpg"><img src="/FileManager/Articles/mce/2012/10/26/ella12e-26-10-2012--08-21-12.jpg" alt="" width="484" height="273" /></a></p>
<p>នីតិវិធីនេះបានធ្វើឲ្យប្រជាពលរដ្ឋមួយចំនួនដែលគោរពស្រលាញ់ព្រះបិតា ឯករាជ្យជាតិមានការ<br />ខកចិត្ត ដោយពួកគាត់យល់ឃើញថា គ្រាន់តែទៅគោរពព្រះបរមសពសម្តេចឪសោះ ហេតុអ្វីក៏<br />មាននីតិវិធីស្មុគស្មាញម្ល៉េះ។ ជាងនេះអ្នកខ្លះក៏បានលើកឡើងថាពួកគាត់មិនដឹងដាក់ពាក្យស្នើសុំ<br />យ៉ាងម៉េច ហើយបើបានដាក់ពាក្យហើយ តើពួកគាត់ទទួលចម្លើយតាមរបៀបណា និងនៅពេល<br />ណានោះទេ។</p>
<p>ព្រះបាទសម្តេចព្រះនរោត្តមសីហនុ បានយាងសោយទិវង្គតកាលពីថ្ងៃទី១៥ តុលា នៅមន្ទីរពេទ្យ<br />ក្រុងប៉េកាំងប្រទេសចិន។ ព្រះបរមសពរបស់ព្រះអង្គត្រូវបានដង្ហែមកដល់ កម្ពុជា កាលពីថ្ងៃ១៧<br />តុលា។ រដ្ឋាភិបាលបានចេញសារាចរណ៍ឲ្យកាន់ទុក្ខព្រះបរមសពរបស់ព្រះអង្គ រយៈពេល៧ថ្ងៃ។<br /> ទើបតែថ្ងៃម្សិលមិញនេះទេ ដែលគណៈកម្មាធិការជាតិ រៀបចំព្រះរាជពិធីបុណ្យ ព្រះបរមសព<br />សម្តេចឪទទួល ពាក្យចូលគោរពព្រះបរមសពដោយផ្ទាល់ពីសំណាក់មហាជនទូទៅ។</p>
<p>គួររំឭកផងដែរថា នៅអំឡុងនៃការគោរពព្រះវិញ្ញាណក្ខន្ធព្រះបិតាឯករាជ្យជាតិមួយសប្តាហ៍កន្លង<br />ទៅ បើតាមមន្ទីរសុខាភិបាលរាជធានីភ្នំពេញ មានប្រជាពលរដ្ឋប្រមាណ ២៣៣ នាក់ បានដួល<br />សន្លប់ និងត្រូវបានបញ្ចូនទៅមន្ទីរពេទ្យដោយសារតែមានមនុស្សច្រើនពេក៕</p>
<p style="text-align: right;">ដោយ ៖ មង្គល<br />ប្រភព ៖ khmer.rfi</p>