<p><span style="color: #000000;"><strong>(វ៉ាស៉ីនតោន)៖</strong> នៅក្នុងឆ្នាំនេះសហរដ្ឋអាមេរិកបានវ៉ាដាច់ប្រទេសបារាំង និងរុស្ស៉ីនៅក្នុងការលក់សព្វាវុធ ជាមួយនឹងទឹកប្រាក់ចំនួន ៤០ពាន់លានដុល្លារ ដែលប្រហាក់ ប្រហែលនឹងពាក់កណ្តាលនៃចំណូលដែលរកបានពីការលក់អាវុធទាំងអស់នៅទូទាំងពិភពលោកកាលពីឆ្នាំមុន ហើយប្រការនេះបានធ្វើឲ្យអាមេរិកក្លាយជាប្រទេសដែលគ្រប់គ្រងទីផ្សារអាវុធសកល ដោយស្ថិតនៅចំណាត់ថ្នាក់កំពូល។ នេះបើតាមការចេញផ្សាយដោយសារព័ត៌មានរុស្ស៉ី Sputnik នៅមុននេះបន្តិចនាព្រឹកថ្ងៃពុធ ទី២៨ ខែធ្នូ ឆ្នាំ២០១៦។</span></p>
<p><br /><a class="thickbox" title="" href="/FileManager/Commons/2016/12/28/15a-28-12-2016--14-13-05.jpg"><img src="/FileManager/Articles/mce/2016/12/28/15a-28-12-2016--14-13-05.jpg" alt="" /></a></p>
<p><span style="color: #000000;">យោងតាមរបាយការណ៍ចុងក្រោយបំផុត ចំណូលដែលរកបានពីការលក់សព្វាវុធនៅទូទាំងសកលលោក បានថមថយពី ៨៩ពាន់លានដុល្លារនៅក្នុងឆ្នាំ២០១៤ មកត្រឹម ៨០ពាន់លានដុល្លារនៅក្នុងឆ្នាំ២០១៥ ប្រហែលជាបានបណ្តាលមកពីការធ្លាក់ចុះនៃតម្លៃប្រេងដែលជាកត្តាដាក់កំណត់ទៅលើចំនួនទឹកប្រាក់ប្រទេសមួយចំនួនអាចបង្វែរចូលទៅក្នុងការទិញសព្វាវុធ ប៉ុន្តែទោះជាយ៉ាងនេះក្តីប្រទេសកាតា បានចំណាយលុយប្រហែល ១៧ពាន់លានដុល្លារទៅលើការជាវសព្វាវុធពីអាមេរិក។</span></p>
<p><span style="color: #000000;">បន្ថែមពីនេះការបញ្ជាទិញថ្មីពីសំណាក់ព្រះរាជាណាចក្រ អារ៉ាប់ប៊ី សាអ៊ូឌីត, អ៉ីរ៉ាក់, និងកូរ៉េខាងត្បូង បានចូលរួមចំណែកយ៉ាងធំធេងនៅក្នុងចំណូល ដែលរកបានពីការលក់ សព្វាវុធរបស់សហរដ្ឋអាមេរិក ហើយជាងនេះទៅទៀតទំនាក់ទំនងដ៏យូរអង្វែង ជាមួយអ្នកទិញបរិក្ខារយោធានៅជុំវិញពិភពលោក បានជួយឲ្យប្រទេសមហាអំណាចមួយនេះធានាបាននូវការបញ្ជាទិញថ្មីៗជាច្រើនពីប្រជាជាតិទាំងឡាយ ដែលធ្លាប់បានប្រើប្រាស់ផលិតផលសព្វាវុធ របស់អាមេរិកអស់រយៈពេលយូរគួរសម។</span></p>
<p><span style="color: #000000;">ជាមួយគ្នានេះដែររបាយការណ៍ខាងលើបានគូសបញ្ជាក់ទៀតថា កិច្ចព្រមព្រៀងនៃការលក់ប្រភេទសព្វាវុធរបស់សហរដ្ឋអាមេរិកក៏ត្រូវបានពង្រីកវិសាលភាពផងដែរ ដោយរួមមានទាំងគ្រឿងបន្លាស់, គ្រាប់, ការបំពាក់បំប៉ន, សេវាកម្មគាំទ្រផ្សេងៗ ដែលមានតម្លៃថ្លៃគួរឲ្យកត់សម្គាល់ភ្ជាប់ទៅជាមួយពួកវា។</span></p>
<p><span style="color: #000000;">គួរបញ្ជាក់ថាបើយោងតាមប្រភពដដែលសម្រាប់ការលក់សព្វាវុធរបស់ប្រទេសរុស្ស៉ីវិញ គឺមានប្រទេសចិនសំខាន់ជាងគេរួមជាមួយ និងឥណ្ឌា, ម៉ាឡេស៊ី, វៀតណាម, ព្រុយណេ, និងឥណ្ឌូណេស៊ី ដែលជាអ្នកជំរុញ។ អ្វីដែលទាក់ទាញអតិថិជនរបស់រុស្ស៊ីបំផុតនោះ គឺមីស៊ីល និងយន្តហោះចម្បាំង ប៉ុន្តែប្រព័ន្ធសព្វាវុធខាងវិស័យយោធាជើងទឹកវិញពុំសូវមានប្រជាប្រិយភាពនោះឡើយ៕</span></p>
<p><span style="color: #000000;"><br /><a class="thickbox" title="" href="/FileManager/Commons/2016/12/28/12b-28-12-2016--11-20-59.jpg"><img src="/FileManager/Articles/mce/2016/12/28/12b-28-12-2016--11-20-59.jpg" alt="" /></a></span></p>
<p><br /><span style="color: #000000;"><a class="thickbox" title="" href="/FileManager/Commons/2016/12/28/12b-28-12-2016--11-20-59.jpg"></a></span></p>
<p><br /><span style="color: #000000;"><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>