<p><span style="color: #000000;"><strong>(ភ្នំពេញ)៖</strong> រាជរដ្ឋាភិបាលកម្ពុជាកំពុងពិចារណាទិញនាវាចម្បាំងពីរគ្រឿង បំពាក់ដោយសព្វាវុធទំនើប និងមីស៊ីលពីប្រទេសចិន ដើម្បីការពារបូរណភាពទឹកដី កុំឲ្យប្រទេសជិតខាងមើលងាយ។ តែបើតាមមេទ័ពជើងទឹក បានលើកឡើងថា គម្រោងនេះ មិនទាន់សម្រេចពីរាជរដ្ឋាភិបាលនៅឡើយទេ។</span></p>
<p><span style="color: #000000;">ក្នុងជំនួបជាមួយលោកឧត្តមនាវីទោ យូ ម៉ាន់ជាំង (Yu Manjiang) នាយរងសេនាធិកា និងមេបញ្ជាការប្រចាំការនៅសមុទ្រចិនខាង ត្បូងរបស់កងទ័ពប្រជាជនចិននាថ្ងៃទី២៤ ខែកុម្ភៈ ឆ្នាំ២០១៦នេះ នាទីបញ្ជាការកងទ័ពជើងទឹក នាយឧត្តមនាវី ទៀ វិញ អគ្គមេបញ្ជាការកងទ័ពជើងទឹកកម្ពុជា បានបញ្ជាក់ថា កម្ពុជាពិតជាចង់បាននាវាចំនួនពីរគ្រឿង ដែលផលិតនៅប្រទេសចិន តែកម្ពុជាមិនយកមក ធ្វើសង្រ្គាមជាមួយប្រទេសណានោះទេ គឺយកមកដើម្បីការពារបូរណភាពទឹកដីរបស់ខ្លួនតែប៉ុណ្ណោះ។</span></p>
<p><span style="color: #000000;">នាយឧត្តមនាវាបានលើកឡើងយ៉ាងដូច្នេះថា <strong>«នាវា ដែលខ្ញុំចង់បាននោះ គឺមិនវែងដូចនាវាចិន ដែលបានមកសំចតនៅដែនទឹកកម្ពុជានោះទេ គឺមានប្រវែងត្រឹមតែ១៤០ម៉ែត្រ ដោយមានបំពាក់សព្វាវុធ និងមីស៊ីលការពារផ្សេងៗ រួមនឹងផ្ទុកនាវឹកប្រហែលជាងមួយរយនាក់ ហើយការទិញនោះ ក៏ដើម្បីកុំឲ្យប្រទេសជិតខាងមើលងាយផងដែរ»</strong>។</span></p>
<p><span style="color: #000000;">ភាគីចិន មិនបានឆ្លើយតបនឹងការលើកឡើងរបស់នាយឧត្តមនាវីនៅឡើយទេ ដោយគ្រាន់តែអះអាងថា កងទ័ពប្រជាជនចិន និងកងទ័ពជើងទឹកកម្ពុជា នឹងកាន់តែមានភាពស្និទ្ធស្នាលបន្ថែមទៀត តាមរយៈបង្កើនការហ្វឹកហ្វឺនតាមលំហរសមុទ្ររួមគ្នានោះ។</span></p>
<p><span style="color: #000000;">លោកឧត្តមសេនីយ៍ទោ យូ ម៉ាន់ជាំង(Yu Manjiang) បានលើកឡើង ចំពោះមុខនាយឧត្តមនាវីថា <strong>«កងទ័ពចិននឹងបង្កើនភាពស្និទ្ធស្នាលជាមួយកងទ័ពកម្ពុជា ឲ្យកាន់តែខ្លាំងក្លាបន្ថែមទៀត ដើម្បីធ្វើយ៉ាងរក្សាសន្តិសុខនៅតាមលំហរសមុទ្រនិងក្នុងតំបន់»</strong>។</span></p>
<p><span style="color: #000000;">ក្នុងជំនួបប្រហែលមួយម៉ោងនាព្រឹកមិញនេះ នាយឧត្តមនាវី ទៀ វិញ ជាមួយលោកឧត្តមសេនីយ៍ទោ យូ ម៉ាន់ជាំង ក៏បានលើកឡើង អំពីបញ្ហាសមុទ្រចិនខាងត្បូងផងដែរ។ តែបញ្ហានេះត្រូវបាននាយឧត្តមនាវីបញ្ជាក់ថា កម្ពុជានៅតែទទូចឲ្យភាគីពាក់ព័ន្ធទាំងអស់ ដោះស្រាយគ្នាតាមសន្តិវិធីដោយកុំយកយោធាទៅដោះស្រាយ។</span></p>
<p><span style="color: #000000;">នាយឧត្តមនាវីទៀ វិញ បានបញ្ជាក់ទៅកាន់ភាគីចិនថា <strong>«មានភាគីបរទេសជាច្រើនតែងតែជំរុញឲ្យខ្ញុំ លើកអំពីបញ្ហាសមុទ្រចិនខាងត្បូងមកនិយាយនៅពេលកិច្ចប្រជុំផ្សេង ជាពិសេសកិច្ចប្រជុំកងទ័ពជើងទឹកអាស៊ាន តែខ្ញុំមិនដែលយល់ព្រម ចំពោះការស្នើសុំរបស់ពួកគេនោះឡើយ ហើយកម្ពុជានៅតែជាមិត្ត និងស្រលាញ់ចិនតែមួយគ្មានស្រលាញ់ចិនទីពីរ និងទីបីនោះទេ»</strong>។</span></p>
<p><span style="color: #000000;">សូមរំលឹកថា នៅក្នុងកិច្ចជំនួបនោះលោកឧត្តមនាវីទោ យូ ម៉ាន់ជាំង ក៏បានថ្លែងកោតសរសើរ ចំពោះកងទ័ពជើងទឹកកម្ពុជាផងដែរ ដែលបានថែរក្សានាវាបានល្អប្រសើរ រួមទាំងមានសមត្ថភាពរក្សាសន្តិសុខតាមលម្ហរសមុទ្រប្រកបដោយភាពល្អប្រសើរ៕</span></p>
<p style="text-align: center;"><span style="color: #000000;"><img src="https://scontent-kul1-1.xx.fbcdn.net/hphotos-xaf1/v/t1.0-9/12321646_233380710327772_5309134454482912147_n.jpg?oh=bc73e33b0310a67b5e46c0bfe9bff541&oe=576B1257" alt="" width="730" /></span></p>
<p style="text-align: center;"><span style="color: #000000;"><img src="https://scontent-kul1-1.xx.fbcdn.net/hphotos-xfl1/v/t1.0-9/12734202_233380720327771_2545381331240688059_n.jpg?oh=9887d8b6137d35fa2d604b377d165970&oe=576FFB14" alt="" width="730" /></span></p>
<p style="text-align: center;"><span style="color: #000000;"><img src="https://fbcdn-sphotos-c-a.akamaihd.net/hphotos-ak-xpt1/v/t1.0-9/12717954_233380716994438_260335257817795184_n.jpg?oh=7e544e23f2ec1cd1de76a909fceae754&oe=5724D456&__gda__=1462222109_288b09e9a3d023aa479b0be0c0680555" alt="" width="730" /></span></p>
<p style="text-align: center;"><span style="color: #000000;"><img src="https://scontent-kul1-1.xx.fbcdn.net/hphotos-xtp1/v/t1.0-9/12495253_233380746994435_7386380317995009886_n.jpg?oh=a0e0db7c75342810c3717e766ec5c920&oe=57263FD5" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>