<p><span style="color: #000000;"><strong>ភ្នំពេញ៖</strong> ជនជាប់ពាក់ព័ន្ធចំនួន ៤នាក់ផ្សេងទៀត រួមមានឪពុក-ម្តាយ ប្អូនប្រុសបង្កើត និងប្អូនស្រីសាច់ថ្លៃរបស់ លោកឧកញ៉ា ថោង សារ៉ាត់ នឹងត្រូវសមត្ថកិច្ចបញ្ជូនខ្លួនទៅកាន់សាលាដំបូងនៅថ្ងៃទី០៦ ខែធ្នូ ឆ្នាំ២០១៤ ស្អែកនេះ ដើម្បីសាកសួរជុំវិញការលួចលាក់អាវុធខុសច្បាប់ ៦ដើម និងការព្យាយាមលាក់បាំងជនល្មើស។</span></p>
<p><span style="color: #000000;">មន្រ្តីនគរបាល នៃស្នងការដ្ឋាននគរបាលរាជធានីភ្នំពេញមួយរូប ដែលសុំមិនបញ្ចេញឈ្មោះ បានថ្លែងប្រាប់មជ្ឈ មណ្ឌលព័ត៌មានដើមអម្ពិលនៅព្រលប់ថ្ងៃទី០៥ ខែធ្នូ ឆ្នាំ២០១៤នេះថា លោក ថោង ចំរើន លោកស្រី កែវ សារី មន្រ្តីយោធាស័ក្តិ៤កន្លះនៅក្រសួងការពារជាតិ លោកថោង បូណា និងភរិយា ដែលត្រូវជាឪពុក-ម្តាយ ប្អូនប្រុស បង្កើត និងប្អូនស្រីសាច់ថ្លៃ របស់លោកឧកញ៉ា ថោង សារ៉ាត់ នឹងត្រូវបញ្ជូនទៅកាន់សាលាដំបូងនៅថ្ងៃស្អែក ដើម្បីឲ្យមន្រ្តីតុលាការសាកសួរលើបទល្មើសលាក់ទុកអាវុធខុសច្បាប់ និងការព្យាយាមរាំងការងារសមត្ថកិច្ច លាក់បាំងជនល្មើស។</span></p>
<p><span style="color: #000000;">ប្រភពពីសមត្ថកិច្ច ក៏បានឲ្យដឹងផងដែរថា កាំភ្លើងខ្លី ៦ដើម ដែលសមត្ថកិច្ចរកឃើញក្នុងផ្ទះរបស់ឧកញ៉ា ថោង សារ៉ាត់ នៅសង្កាត់ចាក់អង្រែក្រោម ខណ្ឌមានជ័យ កាលពីរាត្រីថ្ងៃទី០៣ ខែធ្នូ ឆ្នាំ២០១៤នោះ មានពីរដើមបាន តកាណុងបាញ់មិនឲ្យឮសំឡេង។</span></p>
<p><span style="color: #000000;">សូមបញ្ជាក់ជុំវិញករណីឃាតកម្មបាញ់សម្លាប់ឧកញ៉ា អ៊ឹង ម៉េងជឺ រហូតដល់ល្ងាចថ្ងៃទី០៥ ខែធ្នូ ឆ្នាំ២០១៤នេះ ចៅក្រមស៊ើបសួរសាលាដំបូងរាជធានីភ្នំពេញ លោក លី សុខឡេង បានចេញដីកាឃុំខ្លួនបណ្ដោះអាសន្ន នៅពន្ធនាគារ ព្រៃស លើអង្គរក្សរបស់ឧកញ៉ា ថោង សារ៉ាត់ ទាំង៤រូប ជាជនដៃដល់ហើយ។ លោកចៅក្រម លី សុខឡេង បានសម្រេច ចោទប្រកាន់ជនដៃដល់ទាំង៤នាក់ ពីបទឃាតកម្មគិតទុកជាមុន។ បើតាមមាត្រា២០០ នៃក្រមព្រហ្មទណ្ឌបទចោទ ប្រកាន់ឃាតកម្មគិតជាទុកមុន ជនជាប់ចោទទាំង៤នាក់ អាច ជាប់ពន្ធនាគារអស់មួយជីវិត។</span></p>
<p><span style="color: #000000;">អង្គរក្សទាំង៤នាក់ ដែលលោក លី សុខឡេង សម្រេចចោទប្រកាន់នេះ រួមមាន៖ ឈ្មោះ សៀង វាសនា ជាអ្នកបាញ់ប្រហារ, ទី២. ឈ្មោះលី សៅ ជាជនជាតិវៀតណាម អ្នកឌុបជនដៃដល់, ទី៣ ឈ្មោះ មាស សម្បត្ដិ ជាអ្នកជិះម៉ូតូបិទគូទ និងទី៤. ឈ្មោះ កុយ ចាន់ថុល ជាអ្នកជិះពីក្រោយជាមួយ មាស សម្បត្ដិ ដើម្បីពិនិត្យជាក់ស្ដែងថា តើជនរងគ្រោះស្លាប់ហើយឬនៅ?</span><br /><span style="color: #000000;">សូមបញ្ជាក់ថា ឧកញ៉ា អ៊ឹង ម៉េងជឺ ថៅស៊ីម៉ង់តិ៍ត្បូងពេជ្រ និង ម្ចាស់ហាងលក់គ្រឿងអលង្ការហុងកុង ត្រូវបាន ឃាតក បាញ់សម្លាប់ជាច្រើនគ្រាប់កាលពីយប់ថ្ងៃទី២២ ខែវិច្ឆិកា ឆ្នាំ២០១៤ ពេលកំពុងចុះទិញផ្លែឈើនៅក្បែរ ពហុកីឡដ្ឋានអូរឡាំពិក។</span></p>
<p><span style="color: #000000;">កម្លាំងនគរបាលរាជធានីភ្នំពេញ បានប្រើជំនាញរបស់ខ្លួន បើកការស៊ើបអង្កេតឃាតកម្មដ៏ឃោរឃៅកណ្តាលរាជ ធានីភ្នំពេញ ដែលផ្តើមចេញពីជម្លោះក្នុងមុខជំនួញរវាងឧកញ៉ា និងឧកញ៉ា ដែលសុទ្ធតែជាអ្នកមានទ្រព្យសម្បត្តិ ស្តុកស្តម្ភ ដោយប្រើរយៈត្រឹមជាងមួយសប្តាហ៍បានឈានដល់ការឃាត់ខ្លួនជនពាក់ព័ន្ធជាបន្តបន្ទាប់៕</span></p>
<p><span style="color: #000000;"><a class="thickbox" title="" href="/FileManager/Commons/2014/12/6/12-6-2014-7-50-44-am-06-12-2014--07-56-06.png"><img src="/FileManager/Articles/mce/2014/12/6/12-6-2014-7-50-44-am-06-12-2014--07-56-06.png" alt="" /></a></span></p>
<p><a class="thickbox" title="" href="/FileManager/Commons/2014/12/6/12-6-2014-7-50-31-am-06-12-2014--07-56-18.png"><img src="/FileManager/Articles/mce/2014/12/6/12-6-2014-7-50-31-am-06-12-2014--07-56-18.png" alt="" /></a></p>
<p><a class="thickbox" title="" href="/FileManager/Commons/2014/12/6/12-6-2014-7-50-20-am-06-12-2014--07-56-31.png"><img src="/FileManager/Articles/mce/2014/12/6/12-6-2014-7-50-20-am-06-12-2014--07-56-31.png" alt="" /></a></p>
<p><a class="thickbox" title="" href="/FileManager/Commons/2014/12/6/12-6-2014-7-50-04-am-06-12-2014--07-56-44.png"><img src="/FileManager/Articles/mce/2014/12/6/12-6-2014-7-50-04-am-06-12-2014--07-56-44.png" alt="" /></a></p>
<p><a class="thickbox" title="" href="/FileManager/Commons/2014/12/6/12-6-2014-7-49-46-am-06-12-2014--07-56-57.png"><img src="/FileManager/Articles/mce/2014/12/6/12-6-2014-7-49-46-am-06-12-2014--07-56-57.png" alt="" /></a><span style="color: #000000;"><br /></span></p>
<p style="text-align: right;"><span style="color: #000000;">ផ្ដល់សិទ្ធដោយ៖ ដើមអម្ពិល</span></p>