<p><span style="font-size: 12px; color: #000000;">ក្រសួងយុត្ដិធម៌អាមេរិក បាននិយាយកាលពីថ្ងៃពុធថា គីងសម្ងាត់ម្នាក់មកពីក្រសួងសន្ដិសុខរដ្ឋចិន ត្រូវបានចាប់ខ្លួន និងចោទប្រកាន់ជាផ្លូវការពីបទ ឈ្លបយកការណ៍សម្ងាត់ផ្នែកសេដ្ឋកិច្ច និងព្យាយាមលួចយកឯកសារសម្ងាត់ពាណិជ្ជកម្មពីក្រុមហ៊ុនអាកាសចរណ៍ និងក្រុមហ៊ុនអវកាសអាមេរិកជាច្រើន។ </span></p>
<p><span style="color: #000000;">ក្រសួងយុត្ដិធម៌អាមេរិក បាននិយាយនៅក្នុងសេចក្ដីថ្លែងការណ៍មួយថា ភ្នាក់ងារសម្ងាត់លោក Yanjun Xu អនុប្រធាននាយកដ្ឋាននៃក្រសួងសន្ដិសុខរដ្ឋប្រចាំនៅខេត្ដ Jiangsu ត្រូវបានចោទប្រកាន់ពីបទប៉ុនប៉ងលួចយកការសម្ងាត់ពាណិជ្ជកម្មក្រុមហ៊ុនអវកាសជាច្រើដូចជា ក្រុមហ៊ុនអាកាសចរណ៍ GE និងបុត្រសម្ព័ន្ធនៃក្រុមហ៊ុន General Electric Co, ។</span></p>
<p><span style="color: #000000;"><a class="thickbox" title="" href="/FileManager/Commons/2018/10/11/5-11-10-2018--11-51-04.PNG"><img src="/FileManager/Articles/mce/2018/10/11/5-11-10-2018--11-51-04.PNG" alt="" /></a><br /></span></p>
<p><span style="color: #000000;">ក្រុមហ៊ុនអាកាសចរណ៍ GE គឺជាសហគ្រាសដ៏ធំបំផុត ដែលផលិតយន្ដហោះ ម៉ាស៊ីនយន្ដហោះ និងសមាសភាគផ្សំសម្រាប់យន្ដហោះយោធា ពាណិជ្ជកម្ម និងយន្ដហោះទូទៅសម្រាប់ក្រុមហ៊ុនអាកាសចរណ៍។ ក្រុមហ៊ុននេះ បានផ្គត់ផ្គង់ម៉ាស៊ីនយន្ដហោះទៅឱ្យក្រុមហ៊ុនខ្នាតធំ Boeing Co និងផ្គត់ផ្គង់យន្ដហោះទៅឱ្យក្រុមហ៊ុន Airbus SE ហើយបច្ចុប្បន្នសហគ្រាសនេះ កំពុងធ្វើការផលិតម៉ាស៊ីនជំនាន់ថ្មីសម្រាប់យន្ដហោះពាណិជ្ជកម្ម និងឧទ្ធម្ភាគចក្រយោធាប្រភេទផ្ទុកទម្ងន់ធ្ងន់។</span></p>
<p><span style="color: #000000;">របាយការណ៍ខាងលើ បានឱ្យដឹងថា ក្រសួងសន្ដិសុខរដ្ឋ គឺជាភ្នាក់ងារសន្ដិសុខ និងស៊ើបការណ៍សម្ងាត់របស់ចិន ដែលទទួលខុសត្រូវ ឈ្លបយកការណ៍នយោបាយប្រឆាំង ស៊ើបការណ៍កិច្ចការបរទេស និងសន្ដិសុខនយោបាយ។ ក្រសួងនេះ មានអំណាចទូលំទូលាយ ក្នុងការឈ្លបយការណ៍សម្ងាត់ទាំងក្នុង និងក្រៅប្រទេស។</span></p>
<p><span style="color: #000000;">ការចោទប្រកាន់នេះ ធ្វើឡើងស្របពេលដែលសហរដ្ឋអាមេរិក បង្កើនសម្ពាធទៅលើចិន រឿងគោលនយោបាយពាណិជ្ជកម្ម និងបទលួចកម្មសិទ្ធិបញ្ញារបស់ក្រុមហ៊ុនអាមេរិក។</span></p>
<p><span style="color: #000000;">របាយការណ៍ដដែលបានឱ្យដឹងថា លោក Xu ត្រូវបានឃាត់ខ្លួន នៅប្រទេសបែលហ្សិក កាលពីខែមេសា ដោយយោងតាមពាក្យបណ្ដឹងសហព័ន្ធ និងត្រូវបានធ្វើបត្យាប័នបញ្ជូនទៅអាមេរិក កាលពីថ្ងៃអង្គារ។ កាសែត Washington Post បានរាយការណ៍ថា រូបលោកត្រូវបានបញ្ឆោតឱ្យទៅប្រទេសបែលហ្សិក ដោយភ្នាក់ងារអនុវត្ដច្បាប់សហព័ន្ធអាមេរិក។</span></p>
<p><span style="color: #000000;">លោក John Demers ជំនួយការអគ្គរដ្ឋអាជ្ញាអាមេរិក ទទួលបន្ទុកផ្នែកសន្ដិសុខជាតិ បាននិយាយថា៖ “ ដីកាចោទប្រកាន់នេះ បានលើកការចោទប្រកាន់ថា មន្ដ្រីស៊ើបការណ៍ចិនម្នាក់ ប៉ុនប៉ងលួចយកការសម្ងាត់ពាណិជ្ជកម្ម និងព័ត៌មានរសើបផ្សេងទៀតពីក្រុមហ៊ុនមួយរបស់អាមេរិក ដែលអាចនាំឱ្យដឹងពីការសម្ងាត់អវកាស” ៕</span></p>
<p><span style="color: #000000;"><a class="c_tab" href="http://mekongnet.com.kh/pages/SpecialOfferCamnews.aspx" target="_blank"><img src="/FileManager/Articles/mce/2018/10/11/mekongnet-11-10-2018--11-51-17.PNG" alt="" /></a><br /></span></p>
<p style="text-align: right;"><span style="color: #000000;">អត្ថបទ៖ សារ៉ាត</span></p>
<p style="text-align: right;"><span style="color: #000000;">ប្រភព៖ សុីអិនប៊ីសុី</span></p>