<p><span style="line-height: 1.8; color: #000000;"><strong>(ភ្នំពេញ)៖</strong> សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានស្នើឱ្យក្រុមប្រឆាំងជ្រុលនិយមមួយចំនួន កុំជេរប្រមាថសម្តេច និងប្រជាជនរួមទាំងក្រុមហ៊ុន Facebook នៅពេលដែលចំនួន Like ទំព័ររបស់សម្តេចតេជោ ហ៊ុន សែន បានកើនឡើងច្រើនជាងគេ។</span></p>
<p><span style="color: #000000;">ការលើកឡើងរបស់សម្តេចតេជោ ហ៊ុន សែន បានធ្វើឡើងនៅលើបណ្តាញសង្គម Facebook ស្របពេលដែលចំនួនអ្នកគាំទ្រទំព័រ Facebook របស់សម្តេចតេជោ ហ៊ុន សែន ដែលទើបបង្កើតជាផ្លូវការបាន៤ខែ កាន់តែប្រគៀកនឹងចំនួនអ្នកគាំទ្រ ទំព័រ Facebook លោក សម រង្ស៊ី ប្រធានគណបក្សប្រឆាំង។</span></p>
<p><span style="color: #000000;">សម្តេចតេជោ ហ៊ុន សែន បានលើកឡើងថា<strong> «មុននោះគេតែងស្តីបន្ទោសគណៈកម្មាការបោះឆ្នោត នៅពេលគេចាញ់ការបោះឆ្នោតម្តងៗ។ លើកនេះប្រសិនគេច្រណែននឹងប្រជាជនចូលចិត្តហើយ Likes ឱ្យ Facebook ខ្ញុំ សង្ឃឹមថា ពួកគេមិនទៅរករឿងក្រុមហ៊ុន Facebook នោះទេ ហើយក៏មិនចោទខ្ញុំថា យកសារ៉ុង ប៊ីចេងទៅទិញទឹកចិត្តប្រជាជន ឬគំរាមប្រជាជនឱ្យចុច Like ឱ្យខ្ញុំនោះដែរ»។</strong></span></p>
<p><span style="color: #000000;">សម្តេចតេជោ បានបន្ថែមថា «សង្ឃឹមថា រៀមច្បងដែលអួតអាង និងតាំងខ្លួនជាស្តេច Facebook នៅកម្ពុជា មេត្តាយោគយល់ព្រោះខ្ញុំ ជាអ្នកចំណូលថ្មី ទើបបានប្រមាណ៤ខែប៉ុណ្ណោះ។ ប្រសិនប្រជាជន Like ឱ្យខ្ញុំច្រើនជាង សូមកុំជេរខ្ញុំ កុំជេរប្រជាជន និងកុំជេរក្រុមហ៊ុន Facebook» ។</span></p>
<p><span style="color: #000000;">រហូតមកដល់ពេលនេះ ចំនួនអ្នកគាំទ្រ (Like) ទំព័រ Facebook សម្តេចតេជោ ហ៊ុន សែន មានចំនួន មានជាង ១,៩លាននាក់ ខណៈដែលចំនួនអ្នកគាំទ្រ (Like) ទំព័រ Facebook របស់លោក សម រង្ស៊ី មានចំនួនជាង ២,០លាននាក់ ។ ចំនួនអ្នកគាំទ្រសម្តេចតេជោ ហ៊ុន សែន បានកើនឡើងយ៉ាងគំហុក ចាប់តាំងពីប្រកាស់ជាផ្លូវការ កាលពីប៉ុន្មានខែមុន។</span></p>
<p><span style="color: #000000;">សម្តេចតេជោ ហ៊ុន សែន បានបន្តថា «ទន្ទឹមនឹងការកើនឡើងនៃចំនួនអ្នកគាំទ្រខ្ញុំជាងមួយម៉ឺននាក់ក្នុងមួយថ្ងៃនៅក្នុង Facebook គឺខ្ញុំកាន់តែមានអារម្មណ៍ថា ពលរដ្ឋទាំងក្នុងនិងក្រៅប្រទេស បានបង្កើននូវជំនឿទុកចិត្តកាន់តែខ្លាំងមកលើសមត្ថភាពដឹកនាំកសាងប្រទេសរបស់ខ្ញុំដែលបាននាំមកនូវសន្តិភាព និង ការរីកចម្រើនពិតប្រាកដដល់ជាតិ។ តាមរយៈទំនាក់ទំនងរវាងខ្ញុំ និងពលរដ្ឋដោយផ្ទាល់ក្នុង Facebook គឺខ្ញុំមានឱកាសដោះស្រាយផលប្រយោជន៍ជូនជាតិ និងប្រជាជនបានកាន់តែច្រើនឡើងៗ។ សូមអរគុណដែលប្រជាពលរដ្ឋ និងយុវជនប្រើប្រាស់ Facebook ក្នុងការទំនាក់ទំនងមកកាន់ខ្ញុំ»៕</span></p>
<p style="text-align: center;"><span style="color: #000000;"><img src="https://scontent-hkg3-1.xx.fbcdn.net/hphotos-xtf1/v/t1.0-9/12592547_943487889033042_7332367483396074738_n.jpg?oh=2a0bf49c62353faba7dee6033a120d18&oe=573539E3" alt="" width="730" /></span></p>
<p style="text-align: center;"><span style="color: #000000;"><img src="https://scontent-hkg3-1.xx.fbcdn.net/hphotos-xpf1/v/t1.0-9/12592230_943487882366376_1304955754212017676_n.jpg?oh=29c220ebd312e8f18b1b58e17eb91e90&oe=573AAB09" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>