<p><span style="color: #000000;"><strong style="font-size: 12px;">(</strong><strong style="font-size: 12px;">ម៉ាដាហ្គាស្កា)៖</strong><span style="font-size: 12px;"> មនុស្សយ៉ាងហោចណាស់ ៤៥នាក់បានបាត់បង់ជីវិត ក្នុងនោះរួមមានទាំងគូស្វាមីភរិយាថ្មី ដែលបានត្រៀមខ្លួនចូលរោងការផងដែរ ដោយសារតែរថយន្តដែលពួកគេជិះបានជ្រុលចង្កូតធ្លាក់ចូលទៅក្នុងទឹកទន្លេក្នុងក្រុង Anjozorobe ដែលមានចម្ងាយ ៩០គីឡូម៉ែត្រភាគឦសាននៃ រដ្ឋធានី Anjozorobe របស់ប្រទេសដីកោះម៉ាដាហ្គាស្កា ក្នុងតំបន់អាហ្វ្រិកខាងកើត។ នេះបើតាមការចេញផ្សាយដោយទីភ្នាក់ងារព័ត៌មានចិនស៊ិនហួរ នាយប់ថ្ងៃសៅរ៍ ទី២៨ ខែមករា ឆ្នាំ២០១៧។</span></span></p>
<p><span style="color: #000000;">អភិបាលក្រុង Anjozorobe បានប្រាប់ស៊ិនហួរតាមទូរស័ព្ទដូច្នេះថា <strong>«</strong><strong>មនុស្សដែលបានស្លាប់ទាំង៤៥នាក់នោះ រួមមានកុមារ ០៩នាក់</strong><strong>, </strong><strong>ស្ត្រី ២៧នាក់</strong><strong>, </strong><strong>និងបុរស០៩នាក់ ខណៈមនុស្ស២៤នាក់ផ្សេងទៀតរងរបួសធ្ងន់ និងស្រាល។ រថយន្តឡូរីបានដឹកមនុស្សសរុប៧០នាក់ មានទាំងសាច់ញាតិ របស់គូស្វាមីភរិយាថ្មីផងដែរ ដែលពេលមកដល់ចំណុចស្ពានមួយ វាក៏ជ្រុលចង្កូតធ្លាក់ចូលក្នុងទន្លេតែម្តង</strong><strong>»</strong>។</span></p>
<p><span style="color: #000000;">គួរបញ្ជាក់ថាសម្រាប់មូលហេតុ ដែលបណ្តាលឲ្យកើតរឿងរ៉ាវដ៏អកុសល្យនេះឡើង នៅមិនទាន់មានការបញ្ជាក់នោះឡើយ ខណៈតៃកុងឡានក៏បានស្លាប់ផងដែរ។ តំបន់ដាច់ស្រយាលនៃប្រទេសម៉ាដាហ្គាស្កា ផ្លូវថ្នល់មានសភាពទ្រុឌទ្រោម និងខូចខាតខ្លាំង ដែលជាហេតុនាំឲ្យគ្រោះថ្នាក់ចរាចរណ៍កើតមានឡើងជារឿយៗ៕</span></p>
<p><span style="color: #000000;"><br /><a class="thickbox" title="" href="/FileManager/Commons/2017/1/30/01i-30-01-2017--11-26-01.jpg"><img src="/FileManager/Articles/mce/2017/1/30/01i-30-01-2017--11-26-01.jpg" alt="" /></a><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>