<div class="article-content">
<p><strong>វ៉ាស៊ីនតោន៖</strong> សហរដ្ឋអាម៉េរិក នៅថ្ងៃសុក្រ ទី២០ ខែធ្នូ បានលើកឡើងថា ប្រទេសកូរ៉េខាងជើង (DPRK) នឹង មិនសម្រេចនូវ អ្វីនោះទេ ពីការគម្រាមកំហែង និងការឈ្លានពាន របស់ពួកគេ មក លើប្រទេស កូរ៉េខាងត្បូង។</p>
<p>ទីភ្នាក់ងារព័ត៌មានចិន ស៊ិនហួ ចេញផ្សាយនៅថ្ងៃសៅរ៍ ទី២១ ខែធ្នូ ឆ្នាំ២០១៣ថា លោកស្រី ចេននីហ្វ័រ សាគី អ្នក នាំពាក្យក្រសួង ការបរទេសអាម៉េរិក បានលើកឡើងក្នុង ប្រតិកម្មតប ទៅនឹងសេចក្តី រាយការណ៍ដែលថា ប្រទេស កូរ៉េខាងជើង គម្រាមវាយប្រហារ ប្រទេសកូរ៉េ ខាងត្បូង ដោយគ្មានការជូនដំណឹងជាមុន បន្ទាប់ពីមាន ការប្រមូលផ្តុំ មួយ ក្នុងទីក្រុងសេអ៊ូល ប្រឆំាងកូរ៉េខាងជើង។</p>
<p>លោកស្រី សាគី បន្តថា ការគម្រាមកំហែងរបស់ កូរ៉េខាងជើងនេះ នឹងធ្វើឲ្យអន្តរាយដល់កិច្ច ខិតខំ ប្រឹងប្រែង របស់អន្តរជាតិ ក្នុងការនាំមកនូវ សន្តិភាព និងសន្តិសុខ នៅអាស៊ីឦសាន ផងដែរ។</p>
<p>យោងតាមប្រភពពីប្រទេសកូរ៉េខាងត្បូង បានឲ្យដឹងថា គណៈកម្មាការការពារជាតិកូរ៉េខាងជើង កាលពីថ្ងៃ ព្រហស្បតិ៍ កន្លងទៅនេះ បានព្រមានវាយប្រហារប្រឆាំងនឹងកូរ៉េខាងត្បូង ដោយគ្មាន ការជូនដំណឹងជាមុន ដោយ ប្រទេសនេះ ចោទថា កូរ៉េខាងត្បូងកាលពីពេលថ្មីៗចុងក្រោយនេះ បានជេរប្រមាថនាំឲ្យខូច សេចក្តីថ្លៃថ្នូរ របស់ខ្លួន។</p>
<p>ជាមួយគ្នានោះដែរ ប្រជាជនមួយចំនួនក្នុងប្រទេសកូរ៉េខាងត្បូង ក៏បានផ្ទុះកំហឹងយ៉ាងខ្លំាងផងដែរ ប្រឆំាងនឹង មេដឹកនាំ កូរ៉េខាងជើង។ ចំណែកអ្នកនាំពាក្យក្រសួងការបរទេសចិន លោក ហ៊ួរ ឈុនយីង បាននិយាយកាលពី ថ្ងៃសុក្រថា ប្រទេសចិន ក៏បានដឹងរួចហើយដែរ អំពីបញ្ហានេះ ហើយចិនក៏បានប្រឆំាងផងដែរ ចំពោះសកម្មភាព ណាមួយ ដែលធ្វើឲ្យអន្តរាយដល់សន្តិភាព និងស្ថិរភាពនៅឧបទ្វីបកូរ៉េ ៕</p>
<p style="text-align: center;"><img src="http://image.dap-news.com:81/dap-news/dap-images/2013/December/id-078/Lay-424.jpg" alt="Photo by DAP-News" width="500" /></p>
<p style="text-align: right;">ផ្តល់សិទ្ធិដោយ៖ <a href="http://www.dap-news.com/2011-06-14-02-40-26/77867-2013-12-21-04-01-56.html"><span style="color: #0000ff;">ដើមអំពិល</span></a></p>
</div>