<p><span style="color: #000000;"><strong>(ម៉ានីល)៖</strong> កីឡាករប្រដាល់ជនជាតិហ្វីលីពីន ដ៏ល្បីល្បាញ លោក Manny Pacquiao បានសម្តែងការគាំទ្រ ចំពោះប្រធានាធិបតីរបស់ខ្លួន គឺលោក Rodrigo Duterte លើយុទ្ធនាការប្រយុទ្ធប្រឆាំង គ្រឿងញៀននៅហ្វីលីពីន ដោយស្របពេលជាមួយគ្នានេះដែរ ប្រធានាធិបតីអាមេរិកលោក បារ៉ាក់ អូបាម៉ា បាននិយាយថា លោកមិនដែលខ្វល់ ពីសម្តីរបស់លោក Rodrigo Duterte ដែលបានត្មិះដៀលកាលពី ប៉ុន្មានថ្ងៃមុននោះឡើយ។ នេះបើតាមការផ្សាយដោយ Reuters នៅថ្ងៃសុក្រ ទី០៩ ខែកញ្ញា ឆ្នាំ២០១៦។</span></p>
<p><span style="color: #000000;"><a class="thickbox" title="" href="/FileManager/Commons/2016/9/9/14a-09-09-2016--14-51-16.jpg"><img src="/FileManager/Articles/mce/2016/9/9/14a-09-09-2016--14-51-16.jpg" alt="" /></a><br /><br /></span></p>
<p><span style="color: #000000;">នៅក្នុងកិច្ចសម្ភាសន៍មួយ លោក Pacquiao បាននិយាយថា «ប្រធានាធិបតីប្រទេសខ្ញុំ បានសូមទោសចំពោះ អ្វីដែលលោកបាននិយាយ ហើយពេលខ្លះលោកនិយាយស្តី ដោយប្រើពាក្យពេជន៍មួយចំនួន ដែលមនុស្ស នៅជុំវិញខ្លួនលោកមិនពេញចិត្ត ប៉ុន្តែខ្ញុំតែងតែគាំទ្រជានិច្ច ចំពោះប្រធានាធិបតីរបស់ខ្ញុំ»។</span></p>
<p><span style="color: #000000;">លោក Pacquiao ក៏បានបង្ហាញពីទស្សនរបស់លោកលើ យុទ្ធនាការបង្រ្កាបគ្រឿងញៀន នៅហ្វីលីពីនដែរ ដោយលោកបានបញ្ជាក់ថា លោកគាំទ្រយ៉ាងពេញទំហឹង នូវយុទ្ធនាការមួយនេះ ទោះបីជាវាបណ្តាលឲ្យ មានមនុស្សស្លាប់ច្រើនក្តី ព្រោះថាដើម្បីកម្ចាត់គ្រឿងញៀន ឲ្យអស់ពីប្រទេសហ្វីលីពីន រដ្ឋាភិបាលហ្វីលីពីន ត្រូវតែប្រើមធ្យោបាយ តឹងរឹងបែបនេះ។</span></p>
<p><span style="color: #000000;">ជាមួយគ្នានេះដែរ នៅក្នុងសន្និសីទសារព័ត៌មានមួយ ប្រធានាធិបតីអាមេរិក លោក បារ៉ាក់ អូបាម៉ា បាននិយាយថា «ខ្ញុំមិនយកពាក្យសម្តីរបស់លោក Duterte ដែលបាននិយាយកាលពីប៉ុន្មានថ្ងៃមុន មកដាក់ខ្លួនទេ ព្រោះថាវាហាក់ដូចជាការប្រើពាក្យ មិនសមរម្យទាំងអស់នេះ គឺជាទម្លាប់នៃការនិយាយស្តីររបស់លោក Duterte ទៅហើយ» ។</span></p>
<p><span style="color: #000000;">គួររំឭកថា នៅដើមសប្តាហ៍នេះ លោកប្រធានាធិបតីហ្វីលីពីន Rodrigo Duterte បានប្រើពាក្យសម្តី មិនសមរម្យ សំដៅទៅលើ ប្រធានាធិបតីអាមេរិកលោក បារ៉ាក់ អូបាម៉ា បន្ទាប់ពីមេដឹកនាំពិភពលោក រូបនេះ បានចោទសួរ លើបញ្ហាការសម្លាប់ក្រៅប្រព័ន្ធតុលារ ក្នុងយុទ្ធនាការប្រឆាំងគ្រឿងញៀន របស់លោក Duterte ហើយក្រោយពីបានជ្រាបដំណឹងនេះ លោក អូបាម៉ា បានលុបចោលជំនួបទ្វេភាគី រវាងមេដឹកនាំទាំងពីរ។</span></p>
<p><span style="color: #000000;">យ៉ាងណាមិញ លោក អូបាម៉ា និងលោក Duterte ទើបនឹងបានជួបពិភាក្សាគ្នារយៈពេលខ្លី នៅអំឡុងពេលនៃកិច្ចប្រជុំអាស៊ាន នៅវៀងច័ន្ទ ប្រទេសឡាវដែលទើបនឹងបញ្ចប់ទៅ ថ្មីៗនេះ៕</span></p>
<p style="text-align: right;"><span style="color: #000000;">ប្រភព ៖ Reuters </span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>