<div class="item-page">
<p><span style="color: #000000;"><strong>(ភ្នំពេញ)៖</strong> លោក ច័ន្ទ សុបិន្ដ ដែលត្រូវបានឈ្មោះ ឡុង ដារ៉ា ប្ដឹងទៅអយ្យការអមសាលាដំបូងរាជធានីភ្នំពេញ ពីបទឆបោកប្រាក់ ចំនួន៦ម៉ឺនដុល្លារ និងយកឈ្មោះសម្ដេចក្រឡាហោម ស ខេង ទៅគំរាមកំហែងនោះ បានចេញមកបកស្រាយ និងច្រានចោលយ៉ាង ដាច់ខាត ចំពោះការចោទប្រកាន់ទាំងនេះ។</span></p>
<p><span style="color: #000000;">លោក ច័ន្ទ សុបិន្ដ អាយុ៦២ឆ្នាំ រស់នៅភូមិទន្សាយជប់ហឹម ឃុំដូងកឹង ស្រុកកំចាយមារ ខេត្តព្រៃវែង បានបកស្រាយថា លោកត្រូវ បានឈ្មោះ ឡុង ដារ៉ា ដែលតំណាងឲ្យប្រជាជន មានផ្ទៃដីសរុបជាង៣០ហិចតា រស់នៅភូមិដួង សង្កាត់ព្រែកព្នៅ ខណ្ឌព្រែកព្នៅ បានឲ្យលោក (ជាអ្នកគួសដី) ជួយរកម៉ូយដើម្បីលក់ដីទាំងនេះ។</span></p>
<p><span style="color: #000000;">ក្រោយពីពឹងពាក់លោករួចមក នៅថ្ងៃទី២៧ ខែតុលា ឆ្នាំ២០១៦ ឈ្មោះ ឡុង ដារ៉ា បានធ្វើកិច្ចព្រមព្រៀង ស្ដីពីការជូនប្រាក់សុគុណ ទៅឲ្យលោក ក្នុងមួយហិចតា៣,០០០ដុល្លារ និងផ្ទះមួយល្វែងកន្លះទៀតផង។</span></p>
<p><span style="color: #000000;">បន្ទាប់មកលោកបាននាំឈ្មោះ ណេប សុវណ្ណារិទ្ធិ ម្ចាស់បុរីមហាសេដ្ឋី ទៅទិញដីទាំងនោះ ជា២ដំណាក់កាល ដោយលើកទី១-នៅថ្ងៃទី៣១ ខែតុលា ឆ្នាំ២០១៦ បានចំនួន១២ហិចតា មានតម្លៃទឹកប្រាក់សរុប៦០ម៉ឺនដុល្លារ ដោយនៅថ្ងៃទី៣០ ខែតុលា បានកក់៤ម៉ឺនដុល្លាររួចប្រគល់ អស់នៅថ្ងៃទី៥ ខែវិច្ឆិកា ហើយលោកបានទទួលប្រាក់សាគុណ (កម្លៃជើងសារ) ៣,៦០០០ដុល្លារ និងលើកទី២-ទើបតែកក់ប្រាក់លើផ្ទៃដី ទំហំ២១ហិចតា មានតម្លៃទឹកប្រាក់៨៤ម៉ឺនដុល្លារ ដោយកក់៥ម៉ឺនដុល្លារ នៅថ្ងៃទី៥ ខែវិច្ឆិកា ហើយឈ្មោះ ឡុង ដារ៉ា បានប្រគល់ប្រាក់ សាគុនទៅលោក ចំនួន២,៤០០០ដុល្លារ។</span></p>
<p><span style="color: #000000;">ជាមួយគ្នានេះ លោក ច័ន្ទ សុបិន្ដ បានបដិសេធយ៉ាងដាច់ខាតថាលោកយកឈ្មោះសម្ដេចក្រឡាហោម ទៅគំរាមកំហែងតែតាមការពិត ឈ្មោះ ឡុង ដារ៉ា បានសន្យាឲ្យផ្ទះមួយល្វែងកន្លះ មកឲ្យលោក តែលោកយកតែកន្លះល្វែងទេ៕</span></p>
<p><span style="color: #000000;"><img src="http://image.freshnewsasia.com/2016/099/fn-2016-11-11-13-47-08-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/099/fn-2016-11-11-13-47-08-1.jpg" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>
</div>