<p><span style="color: #000000;"><strong>(ភ្នំពេញ)៖</strong> ប្រជាពលរដ្ឋនៅជាយរាជធានីភ្នំពេញ ប៉ែកខាងលិច និងខាងត្បូងរាជធានីភ្នំពេញ កំពុងប្រឈមនឹងការអត់ទឹកប្រើប្រាស់ បន្ទាប់ពីការដាច់ចរន្តអគ្គិសនី នៅសង្កាត់ស្រះចក ខណ្ឌដូនពេញ បណ្តាលរោងចក្រផលិតទឹកស្អាត នៅរដ្ឋាករទឹកស្វយ័តក្រុងភ្នំពេញ ជិតស្ថានីយរថភ្លើង ផ្អាកការផ្គត់ផ្គង់ទឹកជាបណ្តោះអាសន្ន រហូតដល់មានអគ្គិសនីឡើងវិញ។</span></p>
<p><span style="color: #000000;">ជាក់ស្តែងនៅព្រឹកថ្ងៃទី១៤ ខែមិថុនា ឆ្នាំ២០១៦នេះ ផ្ទះប្រជាពលរដ្ឋជាច្រើនគ្រួសារ នៅតំបន់ភ្នំពេញថ្មី ខណ្ឌសែនសុខ គ្មានទឹកប្រើប្រាស់ឡើយ។</span></p>
<p><span style="color: #000000;">លោក ម៉ាណូ រ៉ាវីន ប្រធាននាយកដ្ឋានគ្រប់គ្រងបណ្តាញ នៃរដ្ឋាករទឹកស្វយ័តរាជធានីភ្នំពេញ បានប្រាប់អង្គភាព Fresh News នៅព្រឹកថ្ងៃទី១៤ ខែមិថុនានេះថា ដោយសារតែការដាច់ចរន្តអគ្គិសនី នៅសង្កាត់ស្រះចក តាំងពីយប់មិញមក ដូច្នេះធ្វើឲ្យរោងចក្រផ្គត់ផ្គង់ទឹកស្អាត នៅរដ្ឋាករទឹកស្វយ័តក្រុងភ្នំពេញ មិនដំណើរការ ខណៈរោងចក្រ៣ទៀតនៅដំណើរការ។ ការមិនដំណើរការរោងចក្រផលិតទឹកស្អាតនេះ បានធ្វើឲ្យចរន្តទឹកនៅក្នុងរាជធានីភ្នំពេញធ្លាក់ចុះ ហើយនៅតំបន់ជាយក្រុងភាគខាងលិច និងខាងត្បូងរាជធានីភ្នំពេញ ប្រឈមមុខខ្លាំងជាងគេ។</span></p>
<p><span style="color: #000000;">មន្ត្រីរដ្ឋាករទឹកស្វយ័តក្រុងភ្នំពេញ រូបនេះ បានសូមការអធ្យាស្រ័យចំពោះ ការអាក់ខាតនៃការផ្គត់ផ្គង់ទឹក ជូនប្រជាពលរដ្ឋប្រើប្រាស់នេះ និងព្យាយាមធ្វើការយ៉ាងជិតស្និទជាមួយអគ្គិសនីកម្ពុជា ដើម្បីដោះស្រាយឲ្យបានលឿន តាមដែលអាចធ្វើទៅបាន។</span></p>
<p><span style="color: #000000;">ជាមួយគ្នានេះ ដែរអគ្គិសនីកម្ពុជា នៅយប់ថ្ងៃទី១៣ ខែមិថុនា ឆ្នាំ២០១៦ បានបញ្ជាក់ពីការដាច់ចរន្តអគ្គិសនី នៅតំបន់ខាងលើនេះផងដែរ។ អគ្គិសនីកម្ពុជាឲ្យដឹងថា មានការដាក់ចរន្តអគ្គិសនី ពីអនុស្ថានីយ៍ទី1 (GS1-F5A,F6A) នៅវេលាម៉ោង៩៖៤៤នាទីយប់ ដែលធ្វើឲ្យដាច់ចរន្តអគ្គិសនីនៅ ផ្លូវលេខ៧៥ ផ្លូវលេខ៨៤ សង្កាត់ស្រះចក ខណ្ឌដូនពេញ រាជធានីភ្នំពេញ។ មូលហេតុដោយសារមានកំហូច កាបក្រោមដីបណ្ដាញតង់ស្យុងមធ្យម (MV)។</span></p>
<p><span style="color: #000000;">អគ្គិសនីកម្ពុជាបានបញ្ជាក់ទៀតថា ក្រុមការងារបច្ចេកទេស បានធ្វើការជួសជុល និងភ្ជាប់ចរន្តអគ្គិសនី ប្រើប្រាស់ឡើងវិញនៅវេលាម៉ោង១១៖៤០នាទី។ ដោយឡែកនៅបន្ទប់ភ្លើងលេខ 562 របស់រដ្ឋាករទឹកស្វយ័តក្រុងភ្នំពេញ ក្រុមការងារបច្ចេកទេសកំពុងធ្វើការត្រួតពិនិត្យ និងជួសជុលដើម្បីឱ្យឆាប់មានចរន្តអគ្គិសនីឡើងវិញ៕</span></p>
<p><span style="color: #000000;"><img src="http://image.freshnewsasia.com/2016/019/03/fn-2016-06-14-07-55-40-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/03/fn-2016-06-14-08-21-22-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/03/fn-2016-06-14-08-21-23-1.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី</span></p>