<p><span style="color: #000000;"><strong>(ក្រចេះ)៖</strong> សេចក្តីរាយការណ៍ឲ្យដឹងថា នៅយប់ថ្ងៃទី២១ ខែឧសភា ឆ្នាំ២០១៦ មានការបង្រ្កាបបទល្មើសដឹកឈើមួយករណី ពីសំណាក់ក្រុមមន្រ្តីអាវុធហត្ថក្រុងក្រចេះ។ ក្រោយពីមានការចាប់ឃាត់មន្រ្តីអាវុធហត្ថបាននាំយក គោយន្តចំនួន២គ្រឿង ដែលមានផ្ទុកឈើគ្រឿងផ្ទះជាងកន្លះមែត្រគូប មករក្សាទុកនៅទីបញ្ជាការ។</span></p>
<p><span style="color: #000000;">ក្រោយភ្លាមៗប្រជាពលរដ្ឋជាម្ចាស់ គោយន្តដឹកឈើទាំងពីរគ្រឿង បានព្យាយាមចូលទៅសម្របសម្រួល យកគោយន្តមកវិញ តែត្រូវទទួលការគំរាមពីលោកមេបញ្ជាការក្រុង ដោយលោកគំរាមនឹងវាយខ្នោះ ប្រសិនបើនៅតែមានការចេញចូលក្នុងទីបញ្ជាការ។ មិនទាន់បានប៉ុន្មាននាទីផង សំឡេងផ្ទុះអាវុធដោយកាំភ្លើង AK ជាការបាញ់ឡើងលើរបស់លោកមេបញ្ជាការ បានបន្លឺឡើងលាន់ឮ ផ្អើលអ្នកស្រុក ពិសេសម្ចាស់គោយន្ត រត់បាតជើងសព្រាត។</span></p>
<p><span style="color: #000000;">សេចក្តីរាយការណ៍ បានឲ្យដឹងថា រាប់ទាំងករណីលើកនេះទៀត ជាការបាញ់លើកទី២ហើយ របស់មេប៉េអឹមក្រុងក្រចេះ ដោយកាលពីចុងខែមេសា កន្លងទៅមេប៉េអឹមរូបនេះ ក៏ធ្លាប់បាញ់គំរាមជាច្រើនគ្រាប់ ទៅលើក្រុមអ្នករកស៊ីដឹកជន្លង់ម្រេច នៅចំនុនខ្លារស្ទុះ សង្កាត់អូរឬស្សី ក្រុងក្រចេះ ក៏បណ្តាលឲ្យមានការភ្ញាក់ផ្អើលដូចគ្នា។</span></p>
<p><span style="color: #000000;">បើទោះជាបែបណា មេបញ្ជាការអាវុធហត្ថក្រុងក្រចេះ លោក ផាន សុភក្រ្កវាសនា បានច្រានចោលទៅនឹងការចោទប្រកាន់ថា លោកបានផ្ទុះអាវុធគំរាមអ្នកដឹកឈើ។ ដោយលោកមេបញ្ជាការបានបញ្ជាក់ឲ្យដឹងតាមទូរសព្ទថា ករណីនេះជាការចុះបង្រ្កាបដោយមានការរួមសហការរវាងអាវុធហត្ថក្រុង ជាមួយនឹងមេព្រៃ ហើយឈើទាំងនេះបាននាំយកមករក្សាទុកនៅទីបញ្ជាការ ដើម្បីមានចំណាត់ការតាមនិតិវិធី៕</span></p>
<p><span style="color: #000000;"><img src="http://image.freshnewsasia.com/2016/019/03/fn-2016-05-22-10-52-52-1.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/03/fn-2016-05-22-10-52-52-2.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/03/fn-2016-05-22-10-52-52-3.jpg" alt="" width="730" /></span></p>
<p> </p>
<div id="news_detail" class="postcontainer">
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>
</div>
<div class="detail_bottom_function">
<div class="facebook_like"></div>
</div>