<p><span style="color: #000000;"><strong style="font-size: 12px;">(</strong><strong style="font-size: 12px;">អាមេរិក)៖</strong><span style="font-size: 12px;"> «ដំណាក់កាលនេះ មិនមែនជាពេលដែលគ្រាន់តែនិយាយតទៅទៀតនោះទេ តែជាពេលដែលត្រូវធ្វើឱ្យចេញជាសកម្មភាព និងលទ្ធផលតាមការ សន្យាវិញម្តង»។ ការសន្យា និងសេចក្តីប្រកាសរបស់ប្រធានាធិបតីប្រកបដោយថ្វីមាត់ លោក ដូណាល់ ត្រាំ ក្នុងថ្ងៃឡើងកាន់អំណាច បច្ចុប្បន្នកំពុងក្លាយ ទៅជារង្វាស់មួយសម្រាប់វាយតម្លៃសមត្ថភាពរបស់លោកផ្ទាល់វិញម្តងថា តើលោកមានសមត្ថភាពកម្រិតណាក្នុងការធ្វើកំណែទម្រង់ នយោបាយរបស់អាមេរិក និងស្ថានភាពពិភពលោក។</span></span></p>
<p><span style="color: #000000;">កម្មវិធីឡើងកាន់ដំណែង ជាថ្ងៃដំបូងរបស់សេតវិមាន ដែលបានបើកទ្វាសម្រាប់ដំណាក់កាលថ្មីក្នុងអាណត្តិលោក ត្រាំ ក្នុងនាមជាអ្នកនយោបាយម្នាក់។ នេះជាដំណាក់កាលនៃការចាប់ផ្តើមពិសោធន៍ ទៅលើពាក្យសន្យារបស់លោក ដោយប្រៀបធៀបជាមួយនឹងសកម្មភាពជាក់ស្តែង។ <strong>ប៉ុន្តែដើម្បីជោគជ័យតាមការសន្យា តើលោកត្រាំ គួរចាប់ផ្តើមពីចំណុចណា</strong><strong>?</strong></span></p>
<p><span style="color: #000000;">ជាដំបូងលោកត្រូវ ប្រញាប់ប្រើប្រាស់ដំណែងក្នុងនាមជាប្រធានាធិបតី ដើម្បីរៀបចំគណៈរដ្ឋមន្ត្រី រដ្ឋាភិបាល និងបក្សនយោបាយរបស់លោក ស្របពេលដែល លោកកំពុងប្រឈមមុខនឹងឧបសគ្គជាច្រើន ដែលអាចចាត់ទុកថា ជាកិច្ចការដ៏លំបាកបំផុតលើលោក។</span></p>
<p><span style="color: #000000;">ប្រធានាធិបតីថ្មីរូបនេះ ចាប់ផ្តើមជាមួយនឹងកិច្ចការដ៏មមាញឹកពេញមួយសប្តាហ៍ដំបូងតែម្តង។ ជាក់ស្តែងនៅថ្ងៃចន្ទ លោកមានកិច្ចជំនួបឯកជនជាមួយ អ្នកនាំពាក្យម្នាក់ គឺលោក Paul Ryan បន្ទាប់មកនឹងមានកម្មវិធីបដិសណ្ឋារកិច្ចជាមួយមេដឹកនាំសភា កិច្ចប្រជុំជាមួយមេដឹកនាំពាណិជ្ចកម្ម និងមេដឹកនាំសហព័ន្ធ និងការចុះហត្ថលេខាលើបទបញ្ជាដែលត្រូវប្រតិបត្តិការបន្ថែមទៀត។</span></p>
<p><span style="color: #000000;">ប្រធានាធិបតីទើបឡើងកាន់ដំណែងរូបនេះ បានទទួលស្គាល់ថា វាជាសប្តាហ៍ដ៏មមាញឹកមួយ តាមរយៈការបង្ហោះសារលើប្រព័ន្ធទំនាក់ទំនង Twitter នៅព្រឹកថ្ងៃចន្ទនេះថា <strong>«</strong><strong>សប្តាហ៍ដ៏មមាញឹកនេះ គ្រោងនឹងប្រព្រឹត្តទៅដោយផ្តោតយ៉ាងសំខាន់ទៅលើការងារ និងសន្តិសុខជាតិ។ កិច្ចការដ៏ចាំបាច់នឹងប្រព្រឹត្ត ទៅវេលាម៉ោង៩ព្រឹក ដើម្បីពិភាក្សាពីវិស័យឧស្សាហកម្មអាមេរិក</strong><strong>»</strong><strong>។</strong></span></p>
<p><span style="color: #000000;">កាលពីថ្ងៃចុងសប្តាហ៍កន្លងទៅនេះ លោកបានចំណាយពេលរិះគន់សារព័ត៌មាន ដែលបានផ្សព្វផ្សាយពីដំណើរទស្សនកិច្ចរបស់លោក ទៅកាន់កន្លែងរំលឹក វិញ្ញាណក្ខ័ន្ធអតីតភ្នាក់ងារ CIA ដោយអ្នកសារព័ត៌មានទាំងនោះ បានសរសេរអត្ថបទមួយចង់បង្ហាញខ្លឹមសារថា ការពិតទៅវត្តមានហ្វូងមនុស្សច្រើន សន្ធឹកសន្ធាប់ក្នុងថ្ងៃលោកកាន់អំណាច មិនប្រាកដថា ពួកគេសុទ្ធតែពេញចិត្តនឹងលោកនោះទេ។ ហើយកាលពីថ្ងៃសៅរ៍កន្លងទៅនេះ សារព័ត៌មានក៏បានសរសេរផងដែរ អំពីបាតុកម្មប្រឆាំងការឡើងកាន់អំណាចរបស់លោក។</span></p>
<p><span style="color: #000000;">លោក ដូណាល់ ត្រាំ បានប្រាប់ភ្នាក់ងារ CIA ក្នុងអំឡុងនៃទស្សនកិច្ចនៅការិយាល័យនៅរដ្ឋ Virginia កាលពីថ្ងៃសៅរ៍នោះថា<strong> «</strong><strong>ក្នុងពេលស្ថិតនៅ វ័យក្មេងនៅឡើយ យើងតែងតែយកជ័យជម្នះលើកិច្ចការផ្សេងៗ។ ហេតុនេះយើងក៏នឹងយកជ័យជម្នះទៅលើវិស័យពាណិជ្ជកម្ម យើងនឹងយកឈ្នះ ទៅលើសង្គ្រាម</strong><strong>»</strong><strong>។</strong></span></p>
<p><span style="color: #000000;">ប៉ុន្តែទស្សនវិស័យរបស់លោក ត្រាំ ក្នុងគោលនយោបាយការបរទេសអាមេរិក នៅតែស្ថិតនៅក្នុងស្ថិតក្នុងតំណាក់កាលធ្វើតេសន៍សាកល្បងនៅឡើយ។ នៅថ្ងៃសុក្រខាងមុខនេះ លោកនឹងបង្ហាញការស្វាគមន៍ចំពោះភ្ញៀវបរទេសទីមួយ គឺនាយករដ្ឋមន្ត្រីអង់គ្លេស លោកស្រី Theresa May។</span></p>
<p><span style="color: #000000;">ក្នុងពេលឆាប់ៗខាងមុខប្រធានាធិបតីរូបនេះ នឹងធ្វើកិច្ចជំនួបជាមួយមេដឹកនាំប្រទេស កាណាដា និងម៉ិចស៊ិក ដើម្បីចាប់ផ្តើមកិច្ចចរចាទៅលើ កិច្ចព្រមព្រៀងពាណិជ្ចកម្មសេរីអាមេរិកខាងជើង។ «ខ្ញុំគិតថា ក្នុងសប្តាហ៍នេះ យើងនឹងធ្វើកិច្ចពិភាក្សាអំពីវិស័យពាណិជ្ចកម្ម គឺធ្វើកិច្ចពិភាក្សាពីរឿងនេះ នៅថ្ងៃស្អែកតែម្តង» នេះជាសំដីរបស់ប្រធានបុគ្គលិកប្រចាំសេតវិមាន លោក Reince Priebus តាមរយៈសារព័ត៌មាន Fox News កាលពីថ្ងៃអាទិត្យកន្លងទៅនេះ។</span></p>
<p><span style="color: #000000;">លោកបានបន្ថែមថា «ខ្ញុំគិតថា យើងនឹងពិភាក្សាអំពីជនអន្តោប្រវេសន៍នៅសប្តាហ៍នេះ ហើយយើងនឹងមានពេលក្នុងការជជែកពិភាក្សាអំពីបញ្ហាសន្តិសុខជាតិ ជាមួយនឹងរដ្ឋមន្ត្រីការពារជាតិ លោកឧត្តមសេនីយ៍ Mattis»។</span></p>
<p><span style="color: #000000;">ក្នុងនាមជាប្រធានាធិបតីម្នាក់ ចាំបាច់ត្រូវធ្វើឱ្យចេញជាសកម្មភាព និងលទ្ធផលផ្សេងៗ ជាជាងគ្រាន់តែនិយាយក្នុងថ្ងៃឡើងកាន់ដំណែង។ ស្ថានភាពនេះ ត្រូវប្រឈមមុខនឹងឧបសគ្គដ៏មហិមា។ លោក ត្រាំ បានសន្យាក្នុងការស្តារវិស័យឧស្សាហកម្មអាមេរិកឡើងវិញ ដែលនេះជាគោលដៅទាមទារឱ្យ លោកត្រូវផ្លាស់ប្តូរសកលភាវូបនីយ៍កម្ម។</span></p>
<p><span style="color: #000000;"><strong>លោកបានប្តេជ្ញាក្នុងការលុបបំបាត់ភេរវករអ៊ីស្លាមពីផែនដី។ បើទោះបីជាវាហាក់ដូចជាគោលដៅមួយ ដែលមិនអាចទៅរួចក្តី យ៉ាងហោចណាស់លោកបានបង្ហាញគោលនយោបាយមួយ ដែលគ្មានប្រទេសលោកខាងកើតណាមួយ អាចសម្រេចបានក្នុងរយៈពីរទសវត្សរ៍កន្លងទៅនេះ។</strong></span></p>
<p><span style="color: #000000;">វាជាកាតព្វកិច្ចដ៏សំខាន់ក្នុងការឆ្លើយតបទៅវិញ តាមសំណូមពររបស់ប្រជាពលរដ្ឋដែលបានបោះឆ្នោតគាំទ្រ ព្រមទាំងបញ្ជូនលោកទៅកាន់សេតវិមាន។ កាតព្វកិច្ចទាំងនេះអាចសម្រេចបានតាមរយៈការដំណើរឱ្យបានឆាប់រហ័ស និងចាប់ផ្តើមរដ្ឋាភិបាល និងបំពេញកិច្ចការប្រកបដោយភាពផ្លែផ្កា ដើម្បីផ្តល់ក្តីសង្ឃឹម និងភាពជោគជ័យសម្រាប់អាមេរិកក្នុងពេលអនាគត៕</span></p>
<p><span style="color: #000000;">បកប្រែ និងសម្រួលដោយ៖ អ៊ឹត ចណ្ណា</span></p>
<p><span style="color: #000000;"><br /><a class="thickbox" title="" href="/FileManager/Commons/2017/2/8/03b-08-02-2017--16-14-39.jpg"><img src="/FileManager/Articles/mce/2017/2/8/03b-08-02-2017--16-14-39.jpg" alt="" /></a><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>