<p style="text-align: left;"><span style="color: #000000;"><strong>(ភ្នំពេញ)៖</strong> បន្ទាប់ពីក្រុមចោរប្លន់ប្រដាប់អាវុធបាញ់សម្លាប់បុរសម្នាក់ និងធ្វើឲ្យនារីពីរនាក់រងរបួសនៅជិតផ្សារសុវណ្ណា ត្រូវបានចាប់ខ្លួន បង្ហាញមុខជាសាធារណៈនៅរសៀលថ្ងៃទី២៦ ខែមករា ឆ្នាំ២០១៧នេះ ស្រាប់តែបុរសម្នាក់ជាមន្រ្តីនគរបាលដែរនោះ បានចេញបញ្ជាក់ថា ជនសង្ស័យប្លន់ប្រដាប់អាវុធនេះ ធ្លាប់បានចាប់ខ្លួនម្តងមកហើយកាលពីពីរឆ្នាំមុន ក្នុងបទល្មើសប្លន់ប្រដាប់អាវុធយករថយន្តពីកំពង់ចាម ជិះចូលរាជធានីភ្នំពេញ។</span></p>
<p style="text-align: left;"><span style="color: #000000;">ជាមួយរូបភាពរបស់ជនសង្ស័យដែលបានចាប់ខ្លួនកាលពីពីរឆ្នាំមុន បុរសដែលអះអាងថា ជាមន្រ្តីនគរបាល បានបង្ហោះសារនៅលើ Facebook ឈ្មោះ «Pheap Bo» ដោយបង្ហាញការឌឺដងថា ជនសង្ស័យនេះជាប់ពន្ធនាគារមិនទាន់បានពីរឆ្នាំផងស្រាប់តែរួចខ្លួនមកប្លន់ជាថ្មីទៅវិញ។ បុរសរូបនេះ បានចោទសំណួរបែបឌឺដងថា ប្រហែលជាជនសង្ស័យចេះសីល្ប៍ហែកគុកហើយមើលទៅ ព្រោះជាប់មិន បានពីរឆ្នាំផងរួចខ្លួនទៅហើយ (Sic)។</span></p>
<p style="text-align: left;"><span style="color: #000000;">បុរសដែលមាន Facebook «Pheap Bo» បានបញ្ជាក់ដូច្នេះ <strong>«ពួកខ្ញុំទើបតែចាប់ខ្លួនថ្ងៃមុនសោះ ប្លន់ឡាន Camry 07 ពីកំពង់ចាម មកភ្នំពេញ។ មិនទាន់បាន២ឆ្នាំស្រួលបួលផង ចេះសីល្ប៍ហែកទ្វារគុគចេញបាត់។ ទោសស្រាលពេកត្រឹមតែបទល្មើសប្លន់ដោយប្រើអាវុធ បើទោសធ្ងន់ គឺពួកឆក់ត្រីយកទៅស៊ីដើម្បីរស់»</strong>។</span></p>
<p style="text-align: left;"><span style="color: #000000;">បុរសរូបនេះ ក៏បានរិះគន់ទៅដល់ចំណាត់ការរបស់តុលាការផងដែរ។ <strong>«កងកម្លាំងម្នាក់ៗ គ្មានបានដេកពួន អីទេទម្រាំចាប់បាន ស្រាប់តែពេលពួកអស់លោកជញ្ជីងគាត់ចេញពីឱបស្រីក្នុង karaoke មកយកប៊ិចស៊ីញ៉េខ្វាច់ ដោះលែងអស់ ឃឹមអីទៀតស្រែខ្មុក ចឹងបានជាពួកគាត់ចាយលុយដូចក្រដាស ជិះ៥៧០ នៅសុទ្ធតែស្វីលឡា ចញ្ចឹមស្រីក្មេង៤-១០នាក់លេង»</strong>។</span></p>
<p style="text-align: left;"><span style="color: #000000;">បុរសដែលបង្ហាញការអាក់អន់ចិត្តជាមួយចោរដែលខ្លួនចាប់បានហើយ បែរជាត្រូវមានសេរីភាពឡើងវិញ ដោយជាប់គុកមិនបានមួយចំអិនកំពិសរូបនេះ បានធានាអះអាងជាមួយការលើកឡើងរបស់ខ្លួន ហើយមានសំណុំរឿងនៅក្នុងដៃថែមទៀតផង។<strong> «មានអីត្រូវខ្លាច បើក្រុមពួកខ្ញុំជាអ្នកចាប់ បញ្ជូនទៅតុលាការផ្ទាល់សំណុំរឿងមានទាំងអស់ហ្នឹង»</strong>។</span></p>
<p style="text-align: left;"><span style="color: #000000;"><strong>មន្ត្រីជាន់ខ្ពស់នៃស្នងការដ្ឋានរាជធានីភ្នំពេញ សុំមិនបញ្ចេញឈ្មោះបានថ្លែងឲ្យដឹងថា ខ្មាន់កាំភ្លើងខាងលើនេះ បានធ្វើពុតជាឈឺ ហើយត្រូវបានមន្ត្រីពន្ធនាគារ បញ្ជូនទៅកាន់មន្ទីរពេទ្យ ហើយបានរត់គេចខ្លួនតែម្តង រហូតដល់ចាប់បាននៅពេលនេះ</strong>។ <strong>មិនមានខាងណាជាអ្នកដោះលែងនោះទេ។</strong></span></p>
<p style="text-align: left;"><span style="color: #000000;">សូមបញ្ជាក់ថា ខ្មាន់កាំភ្លើង និងបក្ខពួកសរុប ២នាក់ ដែលបានប្លន់ និងបាញ់សម្លាប់បុរសម្នាក់ ហើយធ្វើឲ្យនារី២នាក់រងរបួសធ្ងន់ស្រាល នៅជិតផ្សារសុវណ្ណា សង្កាត់ទំនប់ទឹក ខណ្ឌចំការមន កាលពីសប្ដាហ៍មុន ធ្វើឲ្យកក្រើកពេញបណ្តាញសង្គម Facebook តាមរយ:វីដេអូយ៉ាងសហាវនោះ នៅរសៀលថ្ងៃទី២៦ ខែមករា ឆ្នាំ២០១៧នេះ ត្រូវបាននាយកដ្ឋានព្រហ្មទណ្ឌក្រសួងមហាផ្ទៃ បង្ហាញមុខសាធារណៈ មុនបញ្ជូនឡើងតុលាការចាត់ការតាមនីតិវិធី។</span></p>
<p style="text-align: left;"><span style="color: #000000;">ការបង្ហាញមុខក្រុមចោរប្លន់បាញ់សម្លាប់នេះ បានធ្វើឡើងក្រោមវត្តមានលោកឧត្តមសេនីយ៍ផ្កាយ៣ សុខ ខេមរិន ប្រធាននាយកដ្ឋានព្រហ្មទណ្ឌ លោកឧត្តមសេនីយ៍ត្រី សុង លី ស្នងការរងនគរបាលរាជធានីភ្នំពេញ ព្រមទាំងមន្រ្តីនគរបាលពាក់ព័ន្ធមួយចំនួនទៀត។</span></p>
<p style="text-align: left;"><span style="color: #000000;"><strong>ជនដៃដល់ដែលបាញ់សម្លាប់ជនរងគ្រោះឈ្មោះ អ៊ុំ សួស្ដី ហៅ ពៅក្បាលធំ និងម្នាក់ទៀតឈ្មោះ ចាន់ សុវណ្ណ ហៅប៉ែត (ចាប់បានពីរនាក់ ខណៈម្នាក់ទៀតកំពុងរត់គេចខ្លួន)</strong>។</span></p>
<p style="text-align: left;"><span style="color: #000000;">មន្ដ្រីនគរបាល បានប្រាប់អង្គភាព Fresh News នៅព្រឹកថ្ងៃទី២៦ ខែមករា ឆ្នាំ២០១៧នេះថា ប្រតិបត្តិការតាមវែកមុខ និង ឃាត់ខ្លូនក្រុមប្លន់ប្រដាប់អាវុធដ៏សកម្មនៅក្នុងរាជធានីភ្នំពេញ បានធ្វើឡើងដោយមានកិច្ចសហការវាង កម្លាំងនគរបាលព្រហ្មទណ្ឌកម្រិតធ្ងន់ រាជធានីភ្នំពេញ កម្លាំងនគរបាលខណ្ឌចំការមន ជាមួយកម្លាំងនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ ក្រោមការសម្របសម្រួលពី លោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ។</span></p>
<p style="text-align: left;"><span style="color: #000000;">មន្ដ្រីនគរបាលបានឲ្យដឹងទៀតថា ជនសង្ស័យទាំង២នាក់ ត្រូវបានឃាត់ខ្លួន កាលពីម៉ោង១៣៖៣០នាទី ថ្ងៃទី២៥ ខែមករា ឆ្នាំ២០១៧ នៅបន្ទប់ជួលលេខ០០១ ផ្លូវទ្រុងមាន់ ភូមិតាងៅ សង្កាត់និរោធ ខណ្ឌច្បារអំពៅ។ ជាមួយការឃាត់ខ្លួន សមត្ថកិច្ចដកហូតបាន អាវុធ៣ដើម (M16កាត់០១ដើម, ម៉ាក Bareta ចំនួន០១ដើម និងមួយដើមទៀត ប្រភេទអាវុធខ្លី មិនស្គាល់ម៉ាក)។</span></p>
<p style="text-align: left;"><span style="color: #000000;">សូមបញ្ជាក់ថា កាលពីយប់ថ្ងៃទី២១ ខែមករា ឆ្នាំ២០១៧កន្លងទៅ មានករណីតាមប្លន់ដល់មុខផ្ទះ ស្ថិតនៅក្បែរសុវណ្ណា ខណ្ឌចំការមន។ ករណីប្លន់នេះ ក្រុមជនសង្ស័យដែលមានគ្នា៣នាក់ បានប្រតាយប្រតប់យកកាបូប ហើយបាញ់បុរសម្នាក់ ដែលព្យាយាមបើកឡានបុកពួកគេឲ្យស្លាប់បាត់បង់ជីវិត ខណៈដែលនារី២នាក់ទៀត ត្រូវជនសង្ស័យទាត់ធាក់ ឲ្យរងរបួសធ្ងន់ស្រាល។</span></p>
<p style="text-align: left;"><span style="color: #000000;">ក្រុមជនសង្ស័យ ដែលសមត្ថកិច្ចទើបចាប់ខ្លូនបាននេះ ក៏ត្រូវបាននារីរងគ្រោះផ្សេងទៀតអះអាងថា ធ្លាប់បានធ្វើសកម្មភាពប្លន់ពូកគេផងដែរ កាលពីខែធ្នូ ឆ្នាំ២០១៦ តែប្លន់មិនបានសម្រេចព្រោះក្រុមជនរងគ្រោះបានបើករថយន្ដចូលផ្ទះទាន់ពេលវេលា៕</span></p>
<p style="text-align: left;"><span style="color: #000000;"><img src="http://image.freshnewsasia.com/2017/112/fn-2017-01-26-19-58-29-0.png" alt="" width="730" /></span></p>
<p style="text-align: left;"><span style="color: #000000;"><img src="http://image.freshnewsasia.com/2017/112/fn-2017-01-26-19-46-05-0.jpg" alt="" width="730" /></span></p>
<p style="text-align: left;"><span style="color: #000000;"><img src="http://image.freshnewsasia.com/2017/010/fn-2017-01-26-15-40-53-0.jpg" alt="" width="730" /></span></p>
<p style="text-align: left;"><span style="color: #000000;"><img src="http://image.freshnewsasia.com/2017/010/fn-2017-01-26-15-40-53-1.jpg" alt="" width="730" /></span></p>
<p style="text-align: left;"><span style="color: #000000;"><img src="http://image.freshnewsasia.com/2017/010/fn-2017-01-26-15-27-16-0.jpg" alt="" width="730" /></span></p>
<p style="text-align: left;"><span style="color: #000000;"><img src="http://image.freshnewsasia.com/2017/010/fn-2017-01-26-15-27-22-0.jpg" alt="" width="730" /></span></p>
<p style="text-align: left;"><span style="color: #000000;"><img src="http://image.freshnewsasia.com/2017/010/fn-2017-01-26-15-27-22-1.jpg" alt="" width="730" /></span></p>
<p style="text-align: left;"><span style="color: #000000;"><img src="http://image.freshnewsasia.com/2017/010/fn-2017-01-26-15-27-22-2.jpg" alt="" width="730" /></span></p>
<p style="text-align: left;"><span style="color: #000000;"><img src="http://image.freshnewsasia.com/2017/010/fn-2017-01-26-15-27-22-3.jpg" alt="" width="730" /></span></p>
<p style="text-align: left;"><span style="color: #000000;"><img src="http://image.freshnewsasia.com/2017/010/fn-2017-01-26-15-27-23-4.jpg" alt="" width="730" /></span></p>
<p style="text-align: left;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>