<p><span style="color: #000000;"><strong>(ភ្នំពេញ)៖</strong> អតីតសង្ឃល្មោភកាមមួយអង្គ ដែលរំលោភសេពសន្ថវៈក្មេងស្រីអាយុ១៤ឆ្នាំ ត្រូវបានលោក សឹង បញ្ញាវុឌ្ឈ ប្រធានក្រុមប្រឹក្សាជំនុំជម្រះតុលាការកំពូល នៅព្រឹកថ្ងៃទី២ ខែវិច្ឆិកា ប្រកាសសាលដីកាតម្កល់សេចក្ដីសម្រេចរបស់សាលាឧទ្ធរណ៍ទុកជាបានការដដែល ពោលគឺ ផ្តន្ទាទោសជនជាប់ចោទដាក់ពន្ធនាគារ១០ឆ្នាំ។</span></p>
<p><span style="color: #000000;">មន្ត្រីតុលាការកំពូលបញ្ជាក់ថា ជនជាប់ចោទឈ្មោះ អែវ នី ហៅចឺម អាយុ៣៣ឆ្នាំ ត្រូវបានសាលាដំបូងខេត្តតាកែវ និងសាលាឧទ្ធរណ៍ផ្តន្ទាទោសដាក់ពន្ធនាគាររយៈពេល១០ឆ្នាំ ក្រោមការចោទប្រកាន់ពីបទ រំលោភសេពសន្ថវៈ ប្រព្រឹត្តនៅវត្តសោថាណារាម ភូមិអង្គសង្កែ ឃុំពោធិ៍រំចាក ស្រុកព្រែកកប្បាស ខេត្តតាកែវ កាលពីថ្ងៃទី២៨ ខែកញ្ញា ឆ្នាំ២០១៤។</span></p>
<p><span style="color: #000000;">ម្តាយក្មេងស្រីរងគ្រោះសុំមិនបញ្ចេញឈ្មោះ បានរៀបរាប់ថា កូនស្រី ត្រូវបានឪពុកម្ដាយនាំទៅកាន់ វត្ដសោថាណារ៉ាម ដើម្បីឱ្យព្រះសង្ឃអង្គនេះស្ដោះផ្លុំ ព្រោះ សង្ស័យថា ត្រូវអំពើរបស់គេ។ ពេលទៅដល់វត្ដ ព្រះសង្ឃបានហៅកូនស្រី ចូលទៅកុដិ ដោយមានជញ្ជាំងបិទជិត ខណៈ ដែលឪពុកម្ដាយរបស់នាងនៅខាងក្រៅ។</span></p>
<p><span style="color: #000000;">នៅពេលដែលធ្វើសកម្មភាពចាប់រំលោភបានសម្រេចរួចហើយនោះ កូនស្រីបានដើរចេញពីកុដិវិញ ពេលនោះឪពុកម្ដាយរបស់នាង បានឃើញឈាមហូរតាមជើង។ ប៉ុន្ដែមុនដំបូងមិនចាប់អារម្មណ៍នោះឡើយ ដោយសង្ស័យថា អាចធ្លាក់រដូវ។ លុះពេលនាំទៅដល់ផ្ទះ ឈាមនៅតែបន្ដធ្លាក់មិនឈប់ ទើបឪពុកម្ដាយបាននាំទៅ ឱ្យពេទ្យពិនិត្យមើល ទើបដឹងថា ប្រដាប់ភេទរបស់នាងដាច់រលាត់ ព្រោះតែការចាប់រំលោភពីព្រះសង្ឃអង្គនេះ។</span></p>
<p><span style="color: #000000;">ដោយឡែក ក្មេងស្រីរងគ្រោះបាននិយាយថា ពេលចូលទៅដល់កុដិព្រះ សង្ឃអង្គនេះបានយកធូប ៣សរសៃ មកស្ដោះ ផ្លុំនិងចាក់នៅលើដើមទ្រូង ក្បាលពោះនិង នៅលើប្រដាប់ភេទ រួចក៏ធ្វើសកម្មភាពរំលោភ និងប្រើអណ្ដាតទៀតផង។</span></p>
<p><span style="color: #000000;">ក្រោយចេញពីបន្ទប់សវនាការ ក្មេងស្រីរងគ្រោះយំឡើងញ័រឱបម្តាយ ដោយនិយាយថា ខ្លាចព្រះសង្ឃអង្គនេះ។ ជាមួយគ្នានេះជនជាប់ចោទឈ្មោះ អែវ នី ហៅចឺម បានបដិសេធថា ខ្លួនពុំបានចាប់រំលោភសេពសន្ថវៈដូចការចោទប្រកាន់នោះទេ៕</span></p>
<p><span style="color: #000000;"><img src="http://image.freshnewsasia.com/2016/019/05/fn-2016-11-02-09-18-36-0.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>