<div class="ja-content-main">
<div class="article-content">
<p><strong>កំពត៖</strong> ក្រុមចោរ៤នាក់ ប្រដាប់ដោយកាំភ្លើង អាការ៣ដើម បានចូលប្លន់ផ្ទះប្រជាពលរដ្ឋ ដែលស្ថិតនៅមុខប៉ុស្តិ៍ នគរបាលឃុំព្រែកត្នោត តែមិនបានយកទ្រព្យសម្បត្តិអ្វីទាំងអស់ ដោយសារមានកិច្ចអន្តរាគមន៍ភ្លាមៗពីក្រុមសត្ថកិច្ច។ ម្ចាស់ផ្ទះ ឪពុក និងកូន បានរងរបួសធ្ងន់ ដោយសារក្រុមចោរកាប់ជាច្រើនកាំបិតលើរូបរាងកាយពួកគេ។</p>
<p>បើយោងតាមប្រភពពីសមត្ថកិច្ច បានបញ្ជាក់ថា ក្រុមចោរបានធ្វើសកម្មភាពប្លន់នៅវេលាម៉ោងប្រមាណជា ៨ និង ៤០នាទីយប់ថ្ងៃទី១៥ ខែឧសភា ឆ្នាំ២០១៤ ស្ថិតក្នុងភូមិព្រែកត្នោត ឃុំព្រែកត្នោត ស្រុកទឹកឈូ ខេត្តកំពត។</p>
<p>សមត្ថកិច្ច បានបន្តថា សកម្មភាពប្លន់នេះ មិនបានសម្រេចនោះទេ ដោយសារភ្លាមៗមានកិច្ចអន្តរាគមន៍ ពីអ្នកភូមិជិតខាង និងសមត្ថកិច្ច។ ទោះបីជាយ៉ាងបុរសម្ចាស់ផ្ទះជាឪពុក និងកូនរបស់ខ្លួន បានរងរបួសជាទម្ងន់ ដោយសារក្រុមចោរកាប់ទៅលើពួកគេជាច្រើនកំាបិត។ រីឯក្រុមចោរបាននាំគ្នារត់គេចខ្លួនបាត់អស់ ទាំងមិនបាន យកទ្រព្យសម្បត្តិអ្វីទាំងអស់។</p>
<p>បុរសរងគ្រោះជាឪពុកមានឈ្មោះ ហោ ប៊ុនហុង អាយុ ៥០ឆ្នាំ។ កូនប្រុសមានឈ្មោះ ហុង ហេង អាយុ ២៥ឆ្នាំ។ ជនរងគ្រោះប្រកបរបរបើករថយន្តដឹកកម្មករតាមរោងចក្រ។</p>
<p>ក្រោយកើតហេតុភ្លាមៗ ជនរងគ្រោះត្រូវបានបញ្ជូនមកសង្រ្គោះនៅមន្ទីរពេទ្យបង្អែកខេត្តកំពត តែដោយសារស្ថានភាពរបួសធ្ងន់ពេក សមត្ថកិច្ចបានបញ្ជូនទៅសង្រ្គោះបន្តនៅប្រទេសវៀតណាម។ ដោយឡែកសមត្ថ កិច្ចកំពុងបើកការស៊ើបអង្កេតស្វែងរកក្រុមចោរទាំងអស់នោះ៕</p>
<p><img src="http://111.92.240.170:81//dap-news/dap-images/2014/May/id-009/saray-004.jpg" alt="Photo by DAP-NEWS" width="550" /></p>
<p><img src="http://111.92.240.170:81//dap-news/dap-images/2014/May/id-009/saray-005.jpg" alt="Photo by DAP-NEWS" width="550" /></p>
<p><img src="http://111.92.240.170:81//dap-news/dap-images/2014/May/id-009/saray-006.jpg" alt="Photo by DAP-NEWS" width="550" /></p>
<p style="text-align: right;"><br />ផ្តល់សិទ្ធិដោយ៖ ដើមអម្ពិល</p>
<div></div>
</div>
</div>