<p><span style="color: #000000;"><strong>ភ្នំពេញ៖</strong> ក្រសួងអប់រំ យុវជន និងកីឡា តាមរយៈលោក អ៊ឹង ង៉ោហុក ប្រធាននាយកដ្ឋានមធ្យម សិក្សាចំណេះដឹងទូទៅ បានលើកឡើងថា ប្រឡងបាក់ឌុបនៅក្នុងឆ្នាំ២០១៥នេះ បើសិនមានករណី ចាំបាច់ណាមួយកើតឡើងនោះ ក្រសួងអាចនឹងស្នើទៅរាជរដ្ឋាភិបាល ដើម្បីសុំការប្រឡងជាលើក ទី២។</span></p>
<p><span style="color: #000000;">នៅក្នុងសន្និសីទសារព័ត៌មានស្តីពី ការរៀបចំការប្រឡងសញ្ញាប័ត្រទុតិយភូមិ ឆ្នាំ២០១៥ នៅរសៀលថ្ងៃទី២៧ ខែកក្កដា ឆ្នាំ២០១៥ នាទីស្តីការក្រសួង លោក អ៊ឹង ង៉ោហុក បានមានប្រសាសន៍ ថា ការប្រឡងលើកនេះ មិនដូចការប្រឡងដូចឆ្នាំកន្លងទៅនោះទេ បេក្ខជនគ្រប់រូបក៏បានដឹងស្រាប់ ហើយ ព្រោះថា កំណែទម្រង់នេះក្រសួងអប់រំ គឺធ្វើមែន ហើយបេក្ខជនក៏បានត្រៀមខ្លួនរួចជាស្រេច តាំងតែពីដើមឆ្នាំ ដែលឆ្នាំនេះ គឺគ្មានការប្រឡងលើកទី២ទេ ប៉ុន្តែ មានបញ្ហាអ្វីជាលក្ខណៈធ្ងន់ធ្ងរអាច ស្នើទៅរាជរដ្ឋាភិបាលសុំនូវ គោលការណ៍។</span></p>
<p><span style="color: #000000;">លោកថា “ក្រសួងបានទុកច្រកមួយថា មិនមានការប្រឡងលើកទី២ហ្នឹង គឺយើងមានពាក្យ មួយម៉ាត់បើកច្រកថា បើសិនជាមាន ប្រធានស័ក្តិ កើតឡើងជាយថាហេតុធ្ងន់ធ្ងរ ឯកឧត្តមរដ្ឋមន្ត្រី អាចនឹងស្នើសុំគោលការណ៍ សម្តេចនាយកវិញក៏ថាបាន ប៉ុន្តែ ប្រធានស័ក្តិហ្នឹង យើងមិនរំពឹងថា កើតឡើងបានទេ”។</span></p>
<p><span style="color: #000000;">លោក អ៊ឹង ង៉ោហុក បានបញ្ជាក់ថា តាមការប្រជុំជាមួយថ្នាក់ដឹកនំាក្រសួង ដែលមានលោក រដ្ឋមន្ត្រី ហង់ ជួនណារ៉ុន ដឹកនំាកន្លងមកនោះបានវាយតម្លៃថា លទ្ធផលប្រឡងសញ្ញាបត្រនៅថ្ងៃ ខាងមុខនេះ នឹងបានល្អ ឬខ្ពស់ជាងឆ្នាំមុន ឬអាចនិយាយបាន បើយកពីឆ្នំាមុនៗបូកគ្នាទៅទៀត។ ព្រោះក្រសួងបានរៀបចំ ឯកសារវិញ្ញាសារឲ្យមានលក្ខណៈ តាមលទ្ធភាពដែលសិស្សអាច ធ្វើបានពី កម្រិតទាបទៅខ្ពស់។</span></p>
<p><span style="color: #000000;">អ្នកនាំពាក្យក្រសួងអប់រំ យុវជន និងកីឡា លោក រស់ សាលី បានមានប្រសាសន៍ថា សម្រាប់ការ ប្រឡងបាក់ឌុបឆ្នាំនេះ មានបេក្ខជន ៨៨.៤៨៨នាក់ និងមាន១៤៩មណ្ឌល និងចែកចេញ ជាបន្ទប់៣៥៧៦បន្ទប់។</span></p>
<p><span style="color: #000000;">លោក បន្តថា “ចំពោះអ្នកសង្កេតការណ៍ ដែលចូលរួមសង្កេតការណ៍ នៅក្នុងសម័យប្រឡងក្នុង ថ្ងៃទី២៤-២៥ ខែសីហា ខាងមុខនេះ បើតាមការឲ្យដឹងជាបឋម របស់អង្គភាពប្រឆាំងអំពើពុករលួយ បានឲ្យដឹងថា មានប្រហែលជាង ៣ពាន់នាក់ហើយ”។</span></p>
<p><span style="color: #000000;">គួរបញ្ជាក់ថា ការប្រលងបាក់ឌុប កាលពីឆ្នាំ២០១៤ មានអ្នកសង្កេតការណ៍ប្រមាណ ៤.០០០ នាក់ មកពីគ្រប់មជ្ឈដ្ឋាន រួមទាំង អង្គការសង្គមស៊ីវិលផងដែរ និងមានចំនួនសិស្សប្រឡង ជាង៩ម៉ឺននាក់។ សម្រាប់សិស្សណា ដែលល្មើសបទបញ្ជាក្នុង ពេលប្រឡង ត្រូវជាប់ពន្ធនាគារ រយៈពេល៦ខែទៅមួយឆ្នាំ ប៉ុន្តែអនុវត្តទោសសូន្យថ្ងៃ៕</span></p>
<p><span style="color: #000000;"><img src="http://image.dap-news.com:81/dap-news/dap-images/2015/July/id-014/that-0730.jpg" alt="Photo by DAP-News" width="550" /></span></p>
<p style="text-align: right;"><br /><span style="color: #000000;">ផ្ដល់សិទ្ធដោយ៖ ដើមអម្ពិល</span></p>