<p><span style="font-size: 12px; color: #000000;">(ញូយ៉ក)៖ តម្លៃប្រេងឆៅបានធ្លាក់ចុះភ្លាមៗនៅថ្ងៃអង្គារ ខណៈអ៊ីរ៉ង់បានថ្លែងថា ខ្លួនមិនមានគំរោងបង្កកការផលិតប្រេងឡើយ បើទោះជាបច្ចុប្បន្នការផ្គត់ផ្គង់ប្រេងឆៅ នៅលើទីផ្សារអន្តរជាតិ កំពុងលើស ពីតម្រូវការក៏ដោយ ដែលនេះជាការផ្ដល់ភាពអស់សង្ឃឹម សម្រាប់ទីផ្សារប្រេង រួមទំាងកិច្ចព្រមព្រៀង បង្កកទិន្នផលប្រេង រវាងបណ្ដាប្រទេសជាសមាជិក អង្គការអ្នកនំាចេញប្រេង ឬហៅថា OPEC។ នេះបើ តាមការចុះផ្សាយរបស់ទីភ្នាក់ងារព័ត៌មានចិន ស៊ិនហួរ នៅព្រឹកថ្ងៃពុធ ទី២៨ ខែកញ្ញា ឆ្នាំ២០១៦។</span></p>
<p><span style="color: #000000;">ថ្លែងក្នុងឱកាសចូលរួមក្នុងកិច្ចប្រជុំនៃ វេទិកាថាមពលអន្តរជាតិ ដែលរៀបចំឡើងចាប់ពីថ្ងៃទី២៦ ដល់ថ្ងៃទី២៨ ខែកញ្ញានេះ នៅប្រទេស អាល់ហ្សេរី រដ្ឋមន្រ្តីប្រេងអ៊ីរ៉ង់ លោក Bijan Namdar Zanganeh បាននិយាយថា «ទីក្រុងតេហេរ៉ង់ ចង់បង្កើនការផលិតប្រេងឆៅរបស់ខ្លួនពី ៣.៦លាន បារ៉ែល ដល់ ៤លានបារ៉ែលក្នុងមួយថ្ងៃ ដូច្នេះកិច្ចព្រមព្រៀង នៅក្នុងក្របខណ្ឌនៃកិច្ចចរចា របស់អង្គការ OPEC នៅប្រទេសអាល់ហ្សេរី មិនមែនជាបំណងរបស់យើងឡើយ»។ </span></p>
<p><span style="color: #000000;">ប៉ុន្តែទោះបីជាយ៉ាងណាក៏ដោយ អ្នកជំនាញមួយចំនួន យល់ថាបណ្ដាប្រទេសជាសមាជិក អង្គការ OPECសំខាន់ៗដូចជា អារ៉ាប៊ី សាអ៊ូឌីត និង កាតា ជាដើម អាចនឹងឈានដល់កិច្ចព្រមព្រៀងបង្កក ការផលិតប្រេង ឬកាត់បន្ថយការផលិតប្រេង របស់ពួកគេ ក្នុងគោលបំណងធ្វើឱ្យទីផ្សារប្រេង មានស្ថេរភាពឡើងវិញ។</span></p>
<p><span style="color: #000000;">គួរបញ្ជាក់ថា គិតត្រឹមថ្ងៃអង្គារ (ពេលវេលានៅអាមេរិក) ប្រភេទប្រេងឆៅ WTI របស់សហរដ្ឋអាមេរិក សម្រាប់លក់ក្នុងខែវិច្ឆិកា បានធ្លាក់ថ្លៃជាង ១.២៦ ដុល្លារ ឬស្មើនឹង៤៤.៦៧ ដុល្លារក្នុងមួយបារ៉ែល នៅក្នុង ទីផ្សារហ៊ុន NYMEX នៃទីក្រុងNew York ចំណែកឯប្រេងឆៅ Brent របស់អឺរ៉ុបមានតម្លៃ ៤៥.៩៧ដុល្លារ ក្នុងមួយបារ៉ែល បន្ទាប់ពីធ្លាក់ថ្លៃអស់ ១.៣៨ដុល្លារ សម្រាប់ទីផ្សារហ៊ុន ICE ក្នុងទីក្រុងឡុងដ៍៕</span></p>
<p><span style="color: #000000;"><br /><a class="thickbox" title="" href="/FileManager/Commons/2016/9/28/03-28-09-2016--11-25-01.jpg"><img src="/FileManager/Articles/mce/2016/9/28/03-28-09-2016--11-25-01.jpg" alt="" /></a><br /></span></p>
<p style="text-align: right;"><span style="color: #000000;">ប្រភព ៖ ស៊ិនហួរ</span></p>