<p><span style="color: #000000;"><strong>(ភ្នំពេញ)៖</strong> ស្ថានទូតអាមេរិកប្រចាំនៅកម្ពុជា បានគូសបញ្ជាក់ថា គ្មានការលើកលែងទិដ្ឋាការសម្រាប់ពលរដ្ឋខ្មែរ ដែលមានបំណងទៅជាន់ដីអាមេរិកនោះឡើយ ពោលប្រជាពលរដ្ឋខ្មែរទាំងអស់ នៅតែទាមទារឲ្យបំពេញបែបបទស្នើសុំទិដ្ឋាការដដែល មុននឹងចូលជាន់លើទឹកដីអាមេរិក។</span></p>
<p><span style="color: #000000;">ការចេញមកបញ្ជាក់របស់ស្ថានទូតអាមេរិកនេះ បានធ្វើឡើងបន្ទាប់ពីមានប្រព័ន្ធផ្សព្វផ្សាយ ដែលមិនមានប្រភពច្បាស់លាស់មួយនៅថ្ងៃទី០៥ ខែកុម្ភៈ ឆ្នាំ២០១៧ម្សិលមិញនេះ បានផ្សព្វផ្សាយថា ប្រធានាធិបតីថ្មីរបស់អាមេរិក លោក ដូណាល់ ត្រាំ បានចុះហត្ថលេខាលើកលែងទិដ្ឋាការ ជូនប្រជាពលរដ្ឋខ្មែរ រយៈពេលប្រមាណ៣០ថ្ងៃ។ ព័ត៌មាននេះ ក៏បានផ្សព្វផ្សាយថា លោក ត្រាំ លើកលែងទិដ្ឋាការ សម្រាប់ប្រជាពលរដ្ឋកាមេរ៉ូនផងដែរ។</span></p>
<p><span style="color: #000000;">នៅថ្ងៃទី០៦ ខែកុម្ភៈ ឆ្នាំ២០១៧នេះ ស្ថានទូតអាមេរិកប្រចាំនៅកម្ពុជា បានចេញមកច្រានចោលព័ត៌មានទាំងនេះ និងបានចាត់ទុកការផ្សព្វផ្សាយទាំងនេះ ជាការបោកប្រាស់។ ស្ថានទូតអាមេរិក បានគូសបញ្ជាក់យ៉ាងដូច្នេះ <strong>«ស្ថានទូតអាមេរិកប្រចាំនៅកម្ពុជា បានកត់សម្គាល់ឃើញ ថាមានសេចក្តីរាយការណ៍ព័ត៌មាន ដែលត្រូវបានគេប្រឌិតឡើង ទាក់ទិននឹងការធ្វើដំណើរទៅកាន់ទឹកដីអាមេរិក ដោយគ្មានទាមទារទិដ្ឋាការសម្រាប់ប្រជាពលរដ្ឋខ្មែរ។ សេចក្តីរាយការណ៍ទាំងនេះគឺ មិនពិតនោះឡើយ ដោយប្រជាជនខ្មែរ នៅតែតម្រូវឲ្យធ្វើការបំពេញបែបបទស្នើសុំទិដ្ឋាការ ដើម្បីអាចធ្វើដំណើរទៅកាន់សហរដ្ឋអាមេរិកដូចមុនដដែល ទោះបីជាពួកគេគ្រោងស្នាក់នៅរយៈពេលប៉ុន្មាននោះឡើយ»</strong>៕</span></p>
<p><span style="color: #000000;"><a class="thickbox" title="" href="/FileManager/Commons/2017/2/6/05a-06-02-2017--15-50-47.jpg"><img src="/FileManager/Articles/mce/2017/2/6/05a-06-02-2017--15-50-47.jpg" alt="" /></a><br /><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>