<p><span style="color: #000000;"><strong>(គូឡាឡាំពួរ)៖</strong> ប្រទេសម៉ាឡេស៊ីបានប្រកាសថា ខ្លួននឹងផ្តល់ប្រាក់រង្វាន់ដល់ក្រុមហ៊ុនឯកជនណាមួយក៏ដោយ ដែលមានសមត្ថភាពរកឃើញតួខ្លួននៃយន្តហោះដឹកអ្នកដំណើរ MH370 របស់អាកាសចរណ៍ម៉ាឡេស៊ីដែលបានបាត់ខ្លួនសូន្យឈឹង នៅក្រោយពេលប្រតិបត្តិតាមស្វែងរុករកដែលបានចំណាយពេលចំនួន០៣ឆ្នាំ ដោយពុំទទួលបានលទ្ធផលជាផ្លែផ្កាអ្វីទាំងអស់នោះត្រូវបានបញ្ឈប់។ នេះបើតាមការចេញផ្សាយដោយសារព័ត៌មាន Channel News Asia នៅយប់ថ្ងៃព្រហស្បតិ៍ ទី១៩ ខែមករា ឆ្នាំ២០១៧។</span></p>
<p><span style="color: #000000;"><br /><a class="thickbox" title="" href="/FileManager/Commons/2017/1/20/10c-20-01-2017--09-54-18.jpg"><img src="/FileManager/Articles/mce/2017/1/20/10c-20-01-2017--09-54-18.jpg" alt="" /></a><br /></span></p>
<p><span style="color: #000000;">អនុរដ្ឋមន្រ្តីក្រសួងដឹកជញ្ជូនម៉ាឡេស៊ីលោក Abdul Aziz Kaprawi បានថ្លែងថា រដ្ឋាភិបាលបានបើកចំហយ៉ាងទូលាយដល់បណ្តាក្រុមហ៊ុនឯកជននានា ក្នុងការស្វែងរកយន្តហោះដឹកអ្នកដំណើរដែលមានជោគវាសនាដ៏អភ័ព្វនេះ ហើយនឹងប្រគល់ជាប្រាក់រង្វាន់ដល់ក្រុមហ៊ុនណាដែលរកឃើញតួយន្តហោះ ប៉ុន្តែលោក Kaprawi បានគូសបញ្ជាក់ដូច្នេះថា <strong>«រាល់ការចំណាយទាំងអស់ក្នុងប្រតិបត្តិការរុករកគឺជាបន្ទុករបស់ពួកគេ ដោយយើងនឹងផ្តល់រង្វាន់ជូនក្រុមហ៊ុនទាំងនោះ លុះត្រាតែពួកគេទទួលជោគជ័យ»</strong>។</span></p>
<p><span style="color: #000000;">ចំណែកឯទំហំនៃប្រាក់រង្វាន់វិញ មិនទាន់ត្រូវបានសម្រេចនៅឡើយទេ ដោយលោកអនុរដ្ឋមន្រ្តីបានលើកឡើងថា បើក្រុមហ៊ុនណាមានបំណងចង់ ចាប់ផ្តើមប្រតិបត្តិការ ត្រូវតែទាក់ទងជាមួយរដ្ឋាភិបាល ហើយនាពេលនោះប្រាក់រង្វាន់នឹងត្រូវប្រកាសឲ្យដឹង។</span></p>
<p><span style="color: #000000;">ដោយឡែកការស្វែករកនៅក្នុងបរិវេណ១២០,០០០គីឡូម៉ែត្រក្រឡា នៅភាគខាងត្បូងមហាសមុទ្រឥណ្ឌា បានចំណាយថវិកាសរុបអស់ប្រមាណជា១៥០លានដុល្លារ ប៉ុន្តែប្រទេសទាំងបីរួមមាន ចិន អូស្ត្រាលី និងម៉ាឡេស៊ី ដែលបានចូលរួមពាក់ព័ន្ធមានការស្ទាក់ស្ទើរក្នុងការបន្តប្រតិបត្តិការទៅទៀត ដោយគ្មានភស្តុតាងថ្មីជាក់លាក់បញ្ជាក់ពីកន្លែងធ្លាក់របស់យន្តហោះ MH370 នោះ ក៏បានសម្រេចផ្អាកតែម្តង។ ជុំវិញការផ្អាកនេះដែរ ក្រុមគ្រួសារសាច់ញាតិ ជនរងគ្រោះបានសម្ដែងការមិនពេញចិត្តជាខ្លាំង និងបានស្នើឱ្យអាជ្ញានៃប្រទេសទាំងបី ចាប់ផ្ដើមប្រតិបត្តិការរបស់ពួកគេឡើងវិញ។</span></p>
<p><span style="color: #000000;">សូមជំរាបថា យន្ដហោះដឹកអ្នកដំណើរ MH370 និងក្រុមបុគ្គលិកយន្ដហោះសរុប២៣៩នាក់បានបាត់ខ្លួនដោយអាថ៌កំបាំងជាទីបំផុតនៅលើផ្ទៃអាកាសនៃឈូងសមុទ្រថៃ កាលពីវេលាព្រឹកថ្ងៃទី០៨ ខែមីនា ឆ្នាំ២០១៤ ក្នុងគោលដៅហោះហើរពីទីក្រុងគូឡាឡាំពួរ ឆ្ពោះទៅកាន់ទីក្រុងប៉េកាំងនៃប្រទេសចិន៕</span></p>
<p><span style="color: #000000;"><img src="http://image.freshnewsasia.com/2017/fn-2017-01-19-23-48-56-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/fn-2017-01-19-23-48-56-1.jpg" alt="" width="730" /></span></p>
<p style="text-align: right;"><span style="color: #000000;">ប្រភព ៖ ប៊ីប៊ីស៊ី </span></p>
<p> </p>