<div class="item-page">
<div>
<p><span style="color: #000000;"><strong>(ភ្នំពេញ)៖</strong> ក្រុមវេស្ទើន បានធ្លាក់ពីការប្រកួតជម្រុះក្នុងពូលនៃពាន Hun Sen Cup ហើយ ក្រោយបរាជ័យក្រោមថ្វីជើងក្រុម CMAC ដោយលទ្ធផល ២-១ នៅលើទីលានពហុកីឡដ្ឋានជាតិម្សិលមិញ ។ ចំណែកក្រុមអគ្គស្នងការដ្ឋាននគរបាលជាតិ (ប៉ូលិស) ប៉ះក្រុមខេត្តសៀមរាប បានត្រឹមស្មើគ្នា ១-១ ប៉ុណ្ណោះ ជាហេតុនាំឲ្យក្រុមទាំងពីរមានសង្ឃឹមស្វែងរកកៅអីឡើងទៅវគ្គបន្ដដូចគ្នា នៅក្នុងការប្រកួតសប្ដាហ៍ចុងក្រោយ ។</span></p>
<p><span style="color: #000000;">សម្រាប់លទ្ធផលការប្រកួតពូលC ពេលនេះបានរកឃើញក្រុមឡើងវគ្គ ១/៤ផ្ដាច់ព្រ័ត្រហើយ គឺមានក្រុមភ្នំពេញក្រោន និងក្រុម CMAC ។ ភ្នំពេញក្រោន បានយកឈ្នះក្រុមម្ចាស់ផ្ទះខេត្តកំពត ៥-១ ម្សិលមិញ ដែលធ្វើឲ្យភ្នំពេញក្រោនមាន ១២ពិន្ទុឈរកំពូលតារាង ខណៈក្រុមមស៊ីម៉ាក់មាន ១២ពិន្ទុដូចគ្នា ក្រោយទម្លាក់ក្រុមវេស្ទើន ដើម្បីបន្ដដំណើរទៅវគ្គបន្ទាប់ ។</span></p>
<p><span style="color: #000000;">ចំណែកដោយឡែកពូលD ក្រោយបញ្ចប់ការប្រកួតសប្ដាហ៍ទី៤ លទ្ធផលបណ្ដោះអាសន្នរឹតតែតានតឹង ត្បិតទើបរកឃើញ ១ក្រុមឡើងវគ្គ ១/៤ផ្ដាច់ព្រ័ត្រ គឺក្រុមណាហ្គាវើល ដែលមាន ១២ពិន្ទុក្នុងដៃ ក្រោយរកបាន ៣ពិន្ទុបន្ថែម ដោយសារគូប្រកួតក្រុមព្រះវិហារ ប្រកាសបោះបង់ការប្រកួតកាលពីសប្ដាហ៍មុន ។ រីឯ ១ក្រុមទៀត នៅមិនទាន់ដឹងក្រុមណាឡើយ ព្រោះពេលនេះមាន ៣ក្រុមកំពុងមានពិន្ទុប្រកៀកប្រកិតគ្នា ។</span></p>
<p><span style="color: #000000;">ក្រុមប៉ូលិស, សៀមរាប និងក្រុមខេត្តស្វាយរៀង សុទ្ធតែមានពិន្ទុប្រដេញគ្នា ដែលត្រូវចាំអ៊ុតលទ្ធផលការប្រកួតសប្ដាហ៍ចុងក្រោយ ដើម្បីកំណត់រកក្រុមឡើងវគ្គបន្ដ ។ សម្រាប់លទ្ធផលការប្រកួតម្សិលមិញ ក្រុមប៉ុលិស ប្រកួតស្មើខេត្តសៀមរាប ១-១ ដែលឲ្យប៉ូលិសមាន ៨ពិន្ទុ ឯសៀមរាប មាន៧ពិន្ទុ ។ ប៉ុន្ដែក្រុមស្វាយរៀង ក៏មាន៧ពិន្ទុដែរ ក្រោយយកឈ្នះក្រុមខេត្តក្រចេះ ៥-១ នៅលើទឹកដីរបស់ខ្លួន ៕</span></p>
<p><span style="color: #000000;"><img src="https://scontent-sin1-1.xx.fbcdn.net/v/t1.0-9/13254195_1733383746901143_4682185642965757773_n.jpg?oh=0ddf9fa0f2067af144cd84c0b8dd1201&oe=57DA0D1E" alt="" width="730" /></span></p>
<p><span style="color: #000000;"><img src="https://scontent-sin1-1.xx.fbcdn.net/v/t1.0-9/13256339_1733383743567810_3535438168007100505_n.jpg?oh=f183136e84a1e446d8fad962b3b4351a&oe=57E11234" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ខ្មែរថកឃីង</span></p>
</div>
</div>
<div id="aside" class="span3">
<div class="well ">
<div class="custom"></div>
</div>
</div>